穿越時空，冒充平行世界嘅另一個自己，再去呃佢條女上床: （38）

佢銀包無曬錢，就得張八達通，入面有三十蚊。

佢去七仔買罐可樂，行去土瓜灣碼頭，坐喺海旁聽下歌hea下。

um下褲袋，佢拎出嗰部俾錫紙包到密嘅時空裝置。

望一望左右同身後，子瑜似乎無再跟蹤自己。

Mike撻著部機，心思思又想玩穿越。





喺呢個時空生活得唔如意，佢想逃避現實，想穿越去其他時空見識下、屌下女。

碌下部機，隨手轉換立體投影出嚟嘅界面。

轉轉下，留意到Mike Cheung（BD-18）嘅界面，亦即係嗰個梳住All-back頭嘅美國人Mike，喺感情狀態一欄變左離婚。

Mike心諗，會唔會係嗰次Jenny發現自己喺廁所同Shelly扑嘢，搞到「美國Mike」俾老婆發現佢偷食，所以就離婚？

有可能，有可能。





佢再碌多幾下，見到有個界面，上面個Mike Cheung嘅樣，同琴日撞到嗰個鬍鬚佬一樣。

感情狀態一欄顯示，嗰條友真係結左婚，換妻單嘢睇嚟係真嘅。

Mike知道個鬍鬚佬周圍喺其他時空穿越緊，因此就諗緊好唔好乘虛而入，去搞人老婆。

「哦！！！仲捉你唔到！」

呢個時候，路過嘅子瑜意外發現，Mike手上揸住自己部時空裝置。





Mike嚇到彈起，隻手郁左兩下，轉走左鬍鬚佬，去左另外一個界面。

子瑜咬住條朱古力，隨即喺件衫入面，拎左支配槍出嚟指住Mike：「今次你斷正啦，原來真係你個死賊仔偷左我部時光機！」

Mike雙手舉高，唔敢亂郁：「喂喂喂…你…你要返部機…咁我咪俾返你囉…唔洗拎支槍出嚟下話？」

「我知你攞左我部機穿越左兩次，根據時空法三十二條第六章，任何人未經同意，都唔可以擅自使用時光機，所以我家下要拘捕你！」子瑜含住條朱古力講。

「俾條生路嚟行下啦，唔洗又拉又鎖咁大獲下話？」Mike求情。

「就係咁大獲！快啲交返部機出嚟！」子瑜舉槍警告。

Mike唔想俾人拉返去受審：「我有個問題，如果依家我穿越去第二個時空，咁你仲捉唔捉到我？」

「捉唔到，點解咁問？」子瑜傻下傻下，居然如實作答。





「哦！捉唔到就得啦，咁係咁先啦！」

講完，Mike㩒下時空裝置中間粒圓掣。

一瞬之間，頭上出現嘅光圈就將佢成個人吸走，並轉移到另一個時空。

喺㩒掣嗰下，Mike其實無睇清楚顯示嘅界面，只係隨意咁轉移時空，緊急逃離現場。

「頂！我真係蠢！做乜要同佢講咁多廢話！咁樣都俾佢走甩左！」子瑜好嬲咁咬一啖朱古力。

跟手佢拎部探測儀器出嚟，發現時光機已經去左另一個平行世界，然後佢轉換探測模式，搜索呢頭有無時空裂縫。

好好彩，真係好好彩，咁啱碼頭附近就出現一個時空裂縫，位置就係海邊。





正如之前提過，大部分時空裂縫出現嘅時間都好短，因此就算有時偵測到個位置，到真係去到嘅時候，時空裂縫多數都已經消失左。

事不宜遲，子瑜二話不說，含住舊朱古力，縱身跳落海。

最後喺時空裂縫消失之前，佢成功進入時空裂縫。