眨眼之間,Mike借住時光機嘅穿越能力,轉移到一個陌生嘅平行時空。

個人都未回過神,就俾眼前第一眼見到嘅景象震懾。

喺佢面前,棟左一隻全身綠色嘅人形怪物。

隻嘢身長至少兩米,額頭好似駝峰咁突起,雙眼無眼珠,個樣望落成隻外星人咁。

Mike呆撚左,以為自己有幻覺兼眼花。





下一秒,隻人形怪物發出刺耳嘅咆哮聲,並揮動兩隻好似螳螂一樣嘅鐮刀臂。

「小心!!!」

就喺呢個時候,一位英勇嘅男人撲埋嚟,捨身營救。

個男人身穿背心盔甲,正面為Mike擋下怪物嘅攻擊。

呢個咁英勇嘅男人,正是呢一個時空嘅Mike。





堅厚嘅裝甲被鋒利嘅刀刃劃破,化成碎片,散落一地。

「英勇Mike」並無就此退縮,隨即採取反擊。

佢單手舉起拳頭,高呼大嗌:「絕命弒魂閃電!」

即時喺四面八方,出現幾道耀眼嘅雷電,如利劍般刺向隻怪物。

Mike見到對方召喚出閃電攻擊,心裡不禁驚歎:嘩!勁呀!





隻人形怪物卻以敏捷嘅步法退後,避開一道道進擊嘅閃電。

避過攻擊後,隻怪物雙手拼合,將兩隻鐮刀臂合成一體,猶如變成一把兩葉風扇,且快速轉動,形成一股勁力十足嘅強風。

兩個Mike都始料不及,被強風吹到飛起,再狠狠咁撻落地。

仆落地嗰陣,「英勇Mike」盡量用身體護住Mike,唔俾對方受傷。

「你無嘢呀嘛?」「英勇Mike」關切問道。

「無嘢…我無嘢…」

「英勇Mike」再認真望多兩眼眼前呢個男人,發覺對方生得同自己好似樣:「點解...點解你個樣生得同我咁似嘅?」

最巧合嘅係,佢兩個連著緊嗰套衫都一樣。大家都係著住白色淨色tee,搭條軍綠色短褲。





「我其實係由另一個…」

Mike解釋到一半,對方就打斷佢話:「算啦,家陣唔好講呢啲嘢住,呢度好危險,你快啲搵個安全嘅地方匿埋先!」

的而且確,依家呢個情況咁危險,都係盡快離開現場穩陣啲。

Mike照對方所講,拿拿臨調頭逃跑。

一路上佢見到一架架翻側嘅汽車,以及唔少殘肢同屍體。

好在馬路寬闊,有啲鬆動位置等佢可以繞過啲車同屍體前行。

至於路邊兩旁係一座座工業味好濃嘅建築,樓層起得唔高而且疏落,感覺有少少似入左將軍澳、大埔嗰啲工業邨咁。





Mike大概跑左一百米左右,中途突然發現一路掛喺條頸度嘅耳機無左,再摸落褲袋,發覺部iPod Classic唔見左,連同嗰部時空裝置都唔見埋。

估計可能係頭先俾風吹起嗰陣跌左,然而兩部機對佢都非常重要,所以佢第一時間要返轉頭去搵。