穿越時空，冒充平行世界嘅另一個自己，再去呃佢條女上床: （42）

隻怪物咁犀利，二人知道唔夠抽，只能選擇逃跑。

Mike一邊跑，一邊問子瑜：「你仲有無其他武器？隻嘢死咬住我地唔放，咁落去唔係辦法，遲早會俾隻嘢追到。」

「無呀，係有其他武器我一早攞左出嚟啦。」

「咁…咁點算啊？」

「跑快兩步啦仲問！」子瑜望見後面隻怪物越追越近，不得不加快腳步，提升速度。





「Raughhhh—」

隻怪物追得好貼，兩隻鋒利嘅鐮刀臂好似切豆腐咁，將擋路嘅汽車以及雜物，統統斬開一舊舊。

Mike同子瑜索曬氣，流曬大汗。

跑跑下，子瑜仲一個唔小心，kick到地下一隻斷手，導致成個人失平衡仆低，兼撞跌埋Mike。

綠色高大身影遮擋住眼前嘅陽光，仆喺地下嘅二人目睹兩臂高舉嘅鐮刀，心諗：今次玩完啦…





就喺生死一刻間，一個掛滿炮仗嘅漁網從天而降，兜頭笠住隻怪物。

炮仗「噼嚦啪啦」咁爆開，同時間有架開蓬吉普車駛到。

車上面有兩個人，一個係阿榮，一個係占士。

「Mike！你無事呀嘛！」司機位嘅阿榮探身出車，伸手拉起Mike。

「無…無事…」Mike見到有救兵，個人都定返啲。





「呢一位係？」阿榮見到Mike旁邊，有個身穿黑色緊身衣嘅女仔。

雖然Mike同子瑜見過幾次，但其實一直都唔知對方叫咩名。

「我個名叫子瑜。」子瑜回答。

Mike心諗條女唔單止個樣似周子瑜，原來連個名都叫子瑜。

「Raughhhh—」

隻怪物連子彈射唔死，區區炮仗又點會傷到半分。

當炮仗燒完，怪物隨手兩下揮刀，就將身上嘅漁網斬爛。

「唔好講咁多啦，上車啦！」阿榮催促。





Mike同子瑜拿拿臨坐上車，隨即阿榮踩行油門，用最快嘅速度撤退。

「Mike，你無事呀嘛？有無受傷？」車上另一個人占士用關心嘅語氣問。

阿榮則幫Mike搶答：「Mike有神功護體架嘛，點會咁易受傷！」

跟住占士就同Mike解釋返，剛才無嚟支援嘅原因：「Sorry啊，我唔應該亂咁走開，最衰頭先我又遇到外星人攔路，否則我一定趕過嚟支援你！」

然而，Mike好唔習慣見到一個咁好聲好氣嘅占士，畢竟喺自己嘅時空，佢識得嘅占士，係一個好臭串嘅二世祖。

吉普車嘅速度好快，加上阿榮熟悉附近地形，過左兩三個彎位就擺脫左隻怪物。

馬路上有好多一個個被掘開嘅大窿，附近嘅建築主要都係工廠，當中唔少都受到嚴重破壞。





四周滿目瘡痍、人煙稀少，加上啱先嗰隻可怕怪物，令Mike不禁疑問：「阿榮…點解呢度會變成咁嘅？頭先隻怪物又係咩嚟架？」

阿榮聽到Mike咁問，覺得好奇怪：「你唔係失憶呀嘛？咁嘅問題都問得出？頭先嗰隻一睇就知係外星人啦。」

「做戲咩，呢個世界點會有外星人？」Mike回應話。

阿榮一手揸住軚盤，另一手伸去後面摸摸Mike個額頭：「你又唔係發燒，做咩今日咁奇怪嘅？」

喺咁嘅情況下，Mike唔打算掩飾自己嘅身份：

「實不相瞞，其實我唔係你地識嘅嗰一個Mike，我同子瑜都係從另一個平行時空穿越嚟到呢度，所以我地完全唔知呢個香港發生左咩事，至於你地所認識嘅嗰個Mike，剛才已經喺戰鬥中不幸喪生。」