穿越時空，冒充平行世界嘅另一個自己，再去呃佢條女上床: （41）

「good」一聲，Mike成條蟲吞左落口。

佢感到反胃，想扣喉嘔返條蟲出嚟，但就feel條蟲喺五臟六腑間，瞬間遊走左一次。

之後，佢全身感受到一股好強嘅力量。

呢股力量令到佢啲肌肉忍唔住漲大，然而Mike卻好擔心條蟲有毒：「你頭先嘔左嗰條係咩蟲嚟架？有無毒架？」

可惜「英勇Mike」已經斷左氣，以後都唔會再睜開眼，亦都無辦法回答佢嘅問題。





「Raughhhh—」耳邊傳嚟可怕嘅咆哮聲。

擰轉面一望，Mike見到嗰隻怪物從十幾米外嘅位置，正朝呢邊行緊過嚟。

隻嘢雖然個心口電到燶曬，不過依然仲行得企得。

手無寸鐵嘅Mike根本唔夠呢隻嘢打，唯一對策就係走佬，但問題係佢未揾得返嗰部時空裝置。

佢慌張咁快速掃視周圍，終於睄到部銀灰色嘅時空裝置，跌左喺前面十步之外處。





只不過，下一秒嗰隻怪物行過，巨型腳掌踩左落去，成部時空裝置即場爛到粉碎。

Mike當堂頹撚左：屌啦星！今次仆街啦！

「哈！仲唔俾我揾到你！」

呢個時候，身後出現一把女聲。

子瑜穿過時空裂縫，成功跟到Mike嚟到呢個時空。





由於中途要經過時空中轉站，所以佢比Mike慢左少少。

「精嘅就快啲交返部時光機出嚟，否則我對你唔客氣架！」子瑜一嚟就扯住Mike個衫領，叫對方快啲還返俾時光機出嚟。

Mike面無血色，指一指前面：「部機俾嗰隻嘢踩碎左…」

子瑜擰轉面先知，前面有一隻人形怪物就嚟殺到埋身。

當目光轉移落去地下，佢發現部時光機已不幸變成碎片：「點解...點解部機會爛成咁架？同埋呢隻綠色嘢係咩嚟架？」

「我都唔知呀，你快啲掹槍啦，呢隻嘢會殺人架！」

Mike話口未完，隻怪物近距離再次飛出迴力刀。

好在二人反應夠迅速，立即雙手抱頭，踎低避開。





「仲等咩呀，快啲開槍啦！」Mike催促。

子瑜拎出配槍，瞄準怪物，發射子彈。

「砰！」

子彈射中怪物左邊大髀，但似乎無造成咩損傷。

「再射啦，射到隻嘢死為止！」

「得啦！唔洗你講我知！」子瑜繼續開火，每一槍都準確無誤，命中目標。

然而對於隻怪物，呢種攻擊等同𢯎痕，隨後佢再使出鐮刀臂迴力標。





Mike同子瑜無法還擊，只能慌忙退後、躲避。

更嚇人場面接住發生，嗰隻怪物行到「英勇Mike」條屍面前，擘大口咬甩個頭，再一啖吞落肚。

Mike同子瑜驚到腳都震埋，心諗呢個時空究竟發生左咩事，點解會出現一隻咁嘅怪物？