其中一個𡃁仔體力下降,一個唔小心鬆開手,另外兩個𡃁仔捉住佢唔俾佢飛走。

八爪魚怪吸到盡,嗰三個𡃁仔再都撐唔住,全都鬆開曬手,俾股吸力扯上半空。

Mike唔想眼白白見住三人成為怪物嘅早餐,決定試下使出嗰一招旋風技。

佢慢慢鬆開一隻手,舉起並合實食指同中指。

憑右手嘅力量撐住個人,盡量唔俾吸力吸走,左手則指向八爪魚怪,但係,指尖卻無如期出現旋風。





眼見三個人就要俾隻怪物吸入口,Mike立即回想出招嘅畫面。

下一個瞬間,指尖忽然噴射出暴烈嘅旋風,直接射爆八爪魚怪其中一隻觸手。

「嘶!!!」怪物發出刺耳高頻嘅叫聲,口中嘅吸力隨之而消失。

身處半空嘅三個𡃁仔一瞬間失重下墜,阿榮同占士二話不說,衝去接住三人。

「嘩...乜真係練成左招技...」連Mike自己都估唔到真係使出左招旋風技。





隨即,八爪魚怪擺動剩低嘅七隻觸手,針住Mike嚟攻擊。

Mike左閃右避,同時使出旋風技反擊。

出技嘅時候,Mike感覺到身體有不斷力量湧出嚟。

勁力旋風猶如長矛一樣,快速直刺過去,再連續射爆多兩隻觸手,真係射到觸手成隻爆開嗰種「射爆」。

「Mike哥哥!犀利呀!」三個𡃁仔為Mike加油吶喊。





八爪魚怪體型龐大,加上無左三隻腳,令行動力變得更加緩慢。

「我醒起啦!我喺嗰本書度見過!」

Mike卒之諗返起自己喺「美國Mike」嘅書房度,見過一本古靈精怪嘅書,其中一頁嘅圖案就係呢隻怪物!

八爪魚怪再施展強大吸力,Mike掛住諗嗰本書,一時分左神,成個人瞬間被扯上半空。

「Mike,小心啊!」阿榮大嗌。

血盤大口逼近眼前,漂喺半空嘅Mike決定順勢進攻。

佢雙手伸前,食指同中指合埋一齊,指尖同時射出勁力旋風。

兩股風暴喺半空中劃過平行直線,透穿怪物之口。





下一秒,嗰棵巨大嘅捕蠅草成個爆開左,碎開嘅殘骸連同幾隻觸手散落四周。

Mike下墜跌落地,三個𡃁仔同阿榮一齊接住佢,只有占士一個呆左咁,棟喺度唔識郁。

「頭先嗰招新招嚟架?勁喎!」阿榮稱讚嗰招旋風技。

「係呀,嗰招真係好勁啊,頭先我直頭睇到呆左。」占士行過嚟讚埋一份。

然而Mike本人都唔敢相信,自己居然打敗左隻外星怪物,心裡感到非常不可思議。

同時亦都證實左本秘笈係堅有料,扑嘢真係可以練功!