穿越時空，冒充平行世界嘅另一個自己，再去呃佢條女上床: （54）

解決左八爪魚怪後，六人行入超市，裡面大部分貨架都被清空得七七八八。

Mike見子瑜鐘意食朱古力，特登認真喺貨架揾下，執左兩塊朱古力塞落褲袋，想用嚟討好對方。

塞滿兩袋食物同日用品後，佢地慢慢行出門口，離開超市。

「滴噠滴噠—」

正如阿榮出發嘅預測，灰沉嘅天空落起滂沱大雨。





佢地六個拿拿臨上車走人。

馬路上有一個個挖開左嘅大窿，啲泥連隨都被挖鬆左，當一落雨，條路就變得好難行。

「鏘！鏘！鏘！」前面傳出鋤地嘅聲音。

喺狂風驟雨下，前路睇得唔清，只係朦朦朧朧咁見到遠處有一個高大身影。

個身影唔知人定係外星人，阿榮兜路想繞過去，點不知無為意到路面旁邊，有個半米深嘅坑洞。





車頭左邊車轆陷左落個坑度，導致成架車無法繼續前行。

架車咁樣慣低左，六人唯有冒雨行落車，合力將架車推返上平路。

「一、二、三！」

六人全身被大雨沾濕，喺車頭出盡力向後推。

「Raughhh—」





遠處高大嘅身影朝住佢地行過嚟，並慢慢露出真面目。

未行到埋嚟，Mike就已經認得出，嗰一個猶如駝峰突起嘅額頭。

無錯，又係嗰隻綠色怪物！

「你地繼續推！隻怪物我嚟對付！」

Mike主動上前迎戰。佢抹走眼角嘅雨水望真啲，隻嘢心口有一忽好明顯嘅燒焦痕。

可以肯定，呢隻就係殺死左「英勇Mike」嘅鐮刀怪。

Mike要為另一個自己報仇，未等對方出招，佢就先聲奪人，連環射出兩道旋風。

鐮刀怪將兩把鐮刀拼合成兩葉扇，並快速轉動，轉到好似直升機咁，以此輕鬆化解Mike嘅旋風攻擊。





Mike繼續攻擊，可惜發出嘅每道勁力旋風，都被一一對方擋下。

一輪進攻無效，咁就輪到鐮刀怪反擊。

先嚟一招迴力飛刀，Mike成個人伏低閃避，飛刀掠過頭頂，斬爆左佢身後嘅路邊石壆。

鐮刀臂繞左一圈，返回到鐮刀怪手中。

隨即隻怪縱身一躍，跳到三樓咁高，揮動兩把鐮刀，由高空斬落嚟。

「砰！」鐮刀狠狠重擊，劈到地面粉碎。

好在Mike閃得快，否則話唔埋已經被斬開左幾碌。





當然，無人會願意一直挨打，只要一有機會，Mike就會反擊。

不過無論佢從邊個角度射出旋風，結果唔係俾隻怪物化解，就係避開。

呢隻嘢好明顯比頭先隻八爪魚怪勁好多。

另一邊廂，喺Mike嘅掩護下，阿榮佢地五個齊心合力，成功將架車推返上平地。

離遠睇見Mike好似陷入苦戰，佢地都好想幫手，但又唔知可以做啲咩。

占士拎支槍出嚟，好似想幫拖，隔籬嘅阿榮就阻止：「無用架，用槍係傷唔到隻怪物。」

之後阿榮大嗌：「Mike，試下用閃電嗰招啦！」

Mike都好想用招閃電攻擊，問題係佢只係學識左一招旋風技。





面對鐮刀怪步步進擊，Mike要不停咁閃避。

避嘅同時仲要留意地面情況，稍有不慎隨時會跌入去啲深坑度。

飛舞嘅鐮刀直面突擊，今次Mike只係避得慢左少少，鋒利嘅鐮刀擦過手臂，𠝹出一條血痕。

處於下風嘅Mike，逼緊自己諗出其他辦法對付隻嘢。