穿越時空，冒充平行世界嘅另一個自己，再去呃佢條女上床: （77）

「我明啦，咁你小心啲。」Judy尊重Mike嘅決定。

喺大隻佬機械人嘅掩護下，阿榮、長腿家姐同其他人騎上機械白馬，分批離開。

臨走前，阿榮拋左一條車匙Mike。

二人對望一眼，然後便分道揚鑣。

大隻佬機械人雖然數目唔少，但加埋卻唔係三個外星人嘅對手。





斧頭怪快速嘅劈擊、巨型蜈蚣嘅尖硬鐵鑽，仲有三角錐體怪反操控嘅能力，一一將班機械兵打到落花流水。

呢個時候，其他人大部分都已跟住Judy嘅大隊離開，不過占士就仍然留喺度。

條友想等Mike俾外星人殺死，再搶走對方肚入面條蟲。

Lulu見情況兇險，行過嚟拉占士走：「走啦，唔好留喺度啦！」

占士拎住裝住秘笈嘅黑盒，堅持未肯走：「等多陣先，睇個勢，班外星人好快會殺死隻Mike。」





就喺呢個時候，嗰隻三角錐體怪飄過嚟，喺平面延伸出兩條插頭，直刺入Lulu同占士嘅頭頂。

一瞬間，二人失去意識，變成左怪物嘅扯線公仔。

Mike見到Lulu同占士行過嚟：「你兩個想點呀？呢個時候仲嚟揾我麻煩？快啲走啦！」

Lulu同占士雙眼反白，喺三角錐怪嘅控制下，佢地擘大口，向住Mike射出衝擊波。

Mike估唔到有呢招，一時避唔切，手腳都被衝擊波劃過。





雖然中得唔應，但左手手臂同右腳小腿，分別都有成忽肉無左。

佢不支倒地，坐落地下，㩒住兩個傷口。

嗰三個被佢救左嗰女仔，原來都無跟大隊走，跑埋嚟關心Mike嘅傷勢。

「你地仲留喺度做咩？」Mike問。

「話曬你都救過我地，我地唔想咁衰揼低你。」MK妹阿蚊答話。

「傻架咩！你地留喺度咪盞佗手掕腳、阻頭阻勢！」子瑜對三個女仔講。

子瑜講出Mike嘅諗法，不過大隊已經走左，就算幾唔願意都好，家下都要湊多三條女。

呢一刻，面對三隻咁勁嘅外星怪物，Mike唔明點解佢地無端端揾上門，只知道以佢咁嘅情況，好難打得贏。





佢召喚出白色太陽槍，將頭先阿榮俾佢嘅車匙連埋支槍，交俾子瑜：「你同佢地三個女仔去攞車，我去引開三隻怪。」

「你一個人去引開佢地？」

「放心啦，死唔去嘅！」Mike指住停喺兩百米外、靠馬路邊嘅私家車，「架車就喺嗰度，快啲去啦！」

喺Mike指示下，子瑜帶住三條女去攞車。

儘管全身傷痕累累，但係Mike感覺到，體內嘅魔蟲不時喺全身遊走，帶俾佢力量。

所有機械兵都消滅曬後，目標只剩一個，速度最快嘅係斧頭怪，以及體型巨大嘅蜈蚣怪，同時喺左右夾擊。

Mike靈機一觸，兩隻手指指向地下，使出爆裂旋風。





借住出招所產生嘅反作用力，佢將個人升到九樓咁高，啱啱過左蜈蚣怪嘅頭頂，成功避開夾擊。