穿越時空，冒充平行世界嘅另一個自己，再去呃佢條女上床: （78）

兩隻怪打唔中Mike，反而變成互相攻擊。

蜈蚣怪個嘴把電鑽對上斧頭怪手上嘅斧頭，激烈碰撞，擦出耀目嘅火花。

等到Mike落返地，三角錐體怪控制住Lulu同占士，展開攻擊。

隻怪漂浮喺半空，咩都唔洗做，只需要喺伸兩條線同插頭出嚟，操控地下嗰兩個人。

除左放出衝擊波，隻怪仲可以控制Lulu同占士做任何動作，包括使出幪面超人嘅「拉打Kick」。





Lulu同占士向上高高跳起，單腳飛踢。

Mike重新將拳頭鋼鐵化，隨即雙手一齊出拳，接佢地呢招。

對方兩個都係人類肉身，但呢腳嘅威力卻非同小可。

堅硬鐵拳被踢到再一次粉碎，Mike差啲企唔穩向後仆。

就喺啱啱占士跳起嗰陣，裝住秘笈嘅黑盒從佢手上跌落地下。





Mike眼尾睄到個黑盒，就喺占士嘅腳邊。

佢唔理咁多，衝埋去搶個盒，結果無發現行動迅速嘅斧頭怪，又再殺埋身。

執起黑盒嗰下，尖利嘅斧頭兜頭劈緊埋嚟。

千鈞一髮間，子瑜用白色太陽槍瞄準，射出火焰子彈，彈開嗰把就劈到落Mike頭頂嘅斧頭。

「上車啦！」子瑜探身出車窗大嗌。





阿蚊負責揸車，盡量駛近Mike。

Mike揸實個黑盒，用最快嘅速度，往前跑向架車。

車上嘅子瑜一路開槍，幫Mike引開三隻怪。

校服妹Vincy同四眼娘Suki打開車門，合力伸手將Mike拉入車內。

閂門嗰下閂慢左，斧頭怪射出頭頂嘅尖刺，有兩支拮中左Mike嘅籮柚，當堂就屎忽開花。

「大家坐穩啦！」阿蚊有理無理，踩恆油全速前進。

架車賣甩斧頭怪同三角錐怪，得返隻巨型蜈蚣窮追不捨。

隻蜈蚣速度唔算特別快，只係勝在體型夠大，行一步等於人地幾百步。





阿蚊一味只顧加速，橫衝直撞，完全無睇路，一個唔小心架車跌左落個大坑入面。

好在係錯有錯著，隻巨型蜈蚣掂行掂過，無為意到架車跌左落坑。

就係咁，有驚無險，Mike佢地逃過左一劫。