穿越時空，冒充平行世界嘅另一個自己，再去呃佢條女上床: （87）

四人大戰完，Mike攰到一合埋眼就訓著左。

診所呢度暫時都算安全，前後匿左兩日都無遇到外星人。

只不過安全還安全，人點都係要食嘢，無可能一直匿喺度唔出去。

呢度嘅存糧好少，眨下眼就食曬，於是訓醒之後，Mike就同子瑜兩個到附近揾嘢食。

本來嗰三個女仔都想話跟嚟幫手，但考慮到佢地無咩作戰力，驚幫唔到手之餘反而累事，所以Mike就叫三人乖乖地留返喺診所。





臨出門口之前，Mike將魔迪加掛喺門口。

「喂！你做乜擺本大爺喺度？」魔迪加投訴。

「話曬你都係前宇宙之王，我諗啲外星人都會忌你三分，所以咪請你幫手睇下門口。」

「看門口？你當本大爺係咩？」

Mike將魔迪加掛喺門上最當眼嘅位置：「得架啦，我地好快就返，總之你就看實門口啦！」





「頂你！本大爺唔係門口狗，唔係用嚟看門口…」

Mike同子瑜已經走遠，無理魔迪加喺度發忟憎。

過左一陣，真係有兩隻外星人靠近。

一隻生滿毛，成隻長毛怪咁，另一隻就全身呈液體狀。

佢地經過，感應到其他外星人嘅氣息，好奇咁行埋嚟。





「喂！你兩隻茄哩啡快啲閃開！」

熊啤啤對眼閃爍綠色嘅光，魔迪加散發出可怕嘅殺氣。

兩隻怪即刻驚到走夾唔抖。

「呵呵！嚇一嚇就雞飛狗走，真係無用！」魔迪加感覺到自己嘅能量，開始慢慢復蘇。

另一邊廂，Mike同子瑜行左好一段路，終於先揾到一間雜貨鋪。

鋪頭嘅食物其實都所剩無幾，佢地擸得幾多就得幾多。

「踏…踏…」

突然間，門口傳嚟腳步聲。





轉身一望，眼前出現兩個熟悉嘅人影——占士同Lulu。

「乜兩條友仲未死！」Mike掃視二人一眼，留意到插住喺佢地頭頂嘅插頭。

下一秒，占士同Lulu擘大口，發射衝擊波。

Mike攬住啲嘢食，同子瑜一齊踎低避開。

「砰！」強勁嘅衝擊波，炸到成間雜貨鋪爛左，屋頂都無埋。

Mike撥開壓喺身上嘅雜物，企返身。

佢遞曬手上嘅杯麵同樽裝水俾子瑜，跟住就上前對付占士同Lulu。





「你對狗男女，之前屈我殺人屈得咁過癮，係時候俾啲教訓你地！」

佢伸出手指，射出爆裂旋風，然而喺外星人怪嘅操控下，對方嘅身手變得敏捷，好輕鬆就避開左。

呢個時候，Mike決定用新招：「就俾你地見識下我嘅新武器『蒼靝』。」

青藍色嘅光逐漸匯聚喺Mike手上，形成一把劍嘅形狀。

當藍光褪去，鋒利嘅長劍鋒芒畢露。

劍身由玄鐵鑄成，劍刃透著陰寒嘅光芒，劍柄半彎如月，中心有粒靛色寶石。

Mike參考過漫畫海賊王出現嘅佩刀，多數都係以兩字命名，因此佢為把劍改左「蒼靝」呢個名。

「靝」讀「天」，來自道家嘅文字，全名嚟自本地重型樂隊逆流 嘅作品蒼靝。