穿越時空，冒充平行世界嘅另一個自己，再去呃佢條女上床: （88）

占士同Lulu嘅指甲居然變長，而且變得非常尖利。

佢地露出猙獰嘅面目，上前攻擊Mike。

敵人主動埋身，正合Mike嘅心意。

佢揮動長劍迎擊，隨之，凌厲嘅寒光，猶如流水一般喺空氣中閃動。

幾下斬擊，就劈斷占士同Lulu嘅左手同右腳。





雖然受到重傷，敵人卻無停落嚟，繼續攻擊。

Mike連續揮劍，將對面兩個人斬開一碌碌。

手腳無曬，得返個上半身，占士同Lulu依然都係未收皮，個口仲可以不停射出衝擊波。

半空之中，三角錐怪控制住占士同Lulu，好淡定咁漂浮緊。

擒賊先擒王，真正敵人係隻怪物。





既然如此，就無謂再浪費時間，Mike避開占士同Lulu嘅衝擊波後，向地下發射爆裂旋風，利用反作用力跳上空中。

佢雙手高舉利劍，對準三角錐怪，狠狠咁劈落去。

劍刃劃出一道垂直嘅光芒，三角錐體就此一分為二，成舊嘢切開兩半，墜落地下。

隻怪死左，占士同Lulu都跟住死去。

同年同日死，或者係呢對男女嘅最好結局。





三角錐體怪全身變成碎片，剩返低四個插頭。

上次打低四手怪，子瑜執左個發光扣針，今次四個插頭話唔定都有用，於是佢就將插頭回收。

搞掂左隻怪，二人喺雜亂一片嘅地下執起一個膠袋，放曬啲嘢食落去，準備走人。

殊不知一個不速之客，擋住左去路。

正是斧頭怪剛才俾啲打鬥聲吸引左過嚟。

狹路相逢，唯有對戰。

斧頭怪行動快速，採取先攻。

闊斧橫掃直劈，Mike以蒼寒之劍逐招化解。





「鏘！鏘！鏘！」

兩把利器互相劈斬，化作刀光劍影。

論威力，Mike手中嘅蒼靝始終更勝一籌，一輪強攻猛打之下，斧頭不勝負荷，崩裂左一角。

斧頭怪好唔服氣，低頭想用飛刺攻擊。

屁股被尖刺整傷，依家都仲隱隱左痛，有過呢啲傷，Mike早已料到呢招。

佢豎起手指公，使出秘笈第五式。

天上嘅白雲俾佢嘅手指公吸落嚟，然後由頸到腳包住佢全身，並散發出奪目嘅白光。





斧頭怪唔理咁多，直接就出招。

射出嘅尖刺正中Mike小腿同下腹，同時Mike身上白光消去，被吸落嚟嘅白雲化成防護甲。

嗰七八條尖刺碰上盔甲，就被件甲黏住左。

Mike輕輕一撥，撥走啲尖刺，佢稱呢件甲做「雲泥天衣」。

呢件盔甲賣點唔夠硬，而係夠柔韌，能吸走並卸走敵人嘅攻擊，至於外形就似聖鬥士星矢嘅青銅聖衣。

招式名則係由兩首歌名組合而成，一首係女歌手王嘉儀「雲泥」，另一首都係王嘉儀嘅「天衣」。

「喂！睇住呀！」子瑜大聲提醒Mike。

條友仲欣賞緊自己套甲，敵人已揮動斧頭，飛身劈擊。





大斧頭精準咁劈中Mike嘅膊頭，但咁嘅攻擊不但打唔爛件甲，反被件甲啜住左，掹唔返出嚟。

斧頭怪想縮手已經太遲，Mike輕鬆揮劍橫劈，佢便人頭落地。

解決左兩隻怪，當佢兩個以為可以鬆一口氣，地下突然狂震。

隨即，一把巨鑽從地底穿透而出，直接撞落Mike個身度。

雖則巨鑽打唔穿套盔甲，但強大嘅撞擊力，將Mike擊上半空再跌落地。

之前見過嘅三個外星人輪流出現，打完一隻又一隻，今次就輪到蜈蚣怪。