「呢啲係我同魔迪加嘅私人恩怨,我再俾十秒你地,唔關事嘅人快啲走開!」鐵馬騮警告。

「呢下幫你唔落,我地唔想被牽連。」Mike放摩迪加落地下。

「喂咪走住!我頭先偷聽到你地話想穿越時空,跟住離開呢度,而本大爺有辦法!」

魔迪加突然話自己有穿越時空嘅能力:「只要你幫我對付隻嘢,咁我就幫你地穿越時空!」

「下?你真係有辦法?」子瑜問。





「係囉,你咪吹水喎!」Mike半信半疑。

「得啦!總之搞掂隻嘢,本大爺就幫你地穿越!」魔迪加講到似層層。

「九…八…七…」

同一時候,鐵馬騮舉起大炮,等緊一倒數完就攻擊。

「唔係喎,我印象中,本圖鑒似乎無講你有穿越能力,唔通係我記錯?不過呢啲都唔係重點,重點我地依家係Alien Buster嚟架嘛,責任就係對付外星人,無論點都唔能夠做逃兵!」美國鷹插一把嘴。





「六…五…四…」進入最後倒數,鐵馬騮就嚟要射出高溫烈焰炮。

「信我!本大爺無呃你地架!」魔迪加好肯定咁講。

「不如就信佢一次?」子瑜同Mike講。

「隻嘢唔知邊句邊句假喎。」Mike有啲猶豫。

「博一鋪啦,可能條友講真呢。」





喺子瑜說服下,Mike決定幫摩迪加,對付眼前嘅仇家:「好啦!就幫你條友一次!」

「咁本大爺都聲明一下,我並唔係畏戰,呢啲咁嘅貨色簡直就唔入流,只不過依家我未完全甦醒…」

「得啦得啦,總之你唔好反口就係啦!」Mike將摩迪加交到子瑜手上,上前迎戰。

「哦?你個地球人居然想做架兩?」鐵馬騮有啲意外。

「其實我都唔係話想幫佢…」

「廢話少講!邊個擋我報仇,邊個就要死!」鐵馬騮一口氣射出高溫火焰炮。

Mike一邊閃避,一邊豎起手指公,將天上嘅雲吸到自己身上。

呢個時候,正值傍晚時分,夕陽將天空染成橙黃色。





雲彩包圍喺Mike身上,化成盔甲保護衣。

鐵馬騮加強攻擊,左手發炮,右手射出電磁波。

喺雲泥天衣保護下,佢召出長劍,近距離斬擊。

無論係烈焰炮定還是電磁波,都只係傷到件甲嘅皮毛。

連斬幾下,鋒利嘅劍刃喺敵人鋼鐵嘅身體上,劃出深深嘅疤痕。

「估唔到你個人類都有返咁上下,睇嚟我都要認真啲先得。」鐵馬騮退後幾步,忽然雙手大力拍打心口。

幾秒之後,隻嘢全身冒煙,散發一陣陣超高熱力。





Mike同佢距離十米,都感受到嗰啲熱力湧過嚟。

其他人則越退越後,唔敢靠近。

「砰!」

鐵馬騮射出烈焰炮,今次唔單止速度快左,威力都提升左好幾倍。

Mike閃慢左一步,炮火擦過手臂,件甲居然燒融左一忽。

鐵馬騮繼續進攻,一隻手不斷射出烈焰炮,另一隻手發出電磁波。

烈焰炮速度快,電磁波覆蓋範圍廣,雙管齊下令到Mike,只能疲於奔命咁躲避。

「麥克折射線!」Mike埋唔身攻擊,只能用遠攻。





射出嘅火焰彈雖然全部命中,但造成嘅傷害比起敵人射出火焰,威力相差太遠。

最可怕係,敵人身上散發出嘅熱力,仲不停提升,連隨攻擊力都一直上升緊。