穿越時空，冒充平行世界嘅另一個自己，再去呃佢條女上床: （101）

大錘獸睄一睄個十幾米深嘅大坑，揾唔到要揾嘅嘢。

然後佢跳過個坑，向住Mike同美國鷹攻擊。

Mike跨步踏前，以招擋招，用劈殺阻擋敵人嘅大錘撞擊。

「鏘！」

把劍居然被個錘打到斷左一角，Mike更連退左幾步。





旁邊嘅美國鷹立即幫拖，呢刻喺手頭上控制住四隻外星人，除左原本嘅長毛怪同液體怪，呢幾日佢仲收服左斧頭怪同四手怪。

喺美國鷹嘅指令下，四隻外星怪物同時對住大錘獸出招。

可惜，都未嚟得切出手，大錘獸一個錘就將佢地一次過打爆。

「白色太陽槍！」Mike召喚多支槍，射出密集嘅火焰子彈。

「砰！砰！砰！」美國鷹就發射烈焰炮。





面對炮轟，大錘獸左閃右避，避得開子彈卻避唔開大炮。

「Boom！」高溫嘅烈焰炮打中佢心口，燶左一大撻。

「有啲本事喎，雖然好痛，但係要咁先好玩架嘛。」

大錘獸就拍拍心口啲煙灰，跟住快速揮動大錘，對兩個Mike猛烈進攻。

頭先嗰啲只係熱身，依家敵人先使出真本事。





又重又巨型嘅錘，喺對方手上揮灑自如，而且仲可攻可擋。

大錘喺Mike同美國鷹面前快速舞動，佢地一邊退後一邊側身閃避。

就算打唔中二人都好，個錘hi到邊，都已經令泊喺街邊嘅車，或者路邊嘅石壆變爛。

「唔係呀嘛，咁快無其他招數啦？」大錘怪流露出一絲失望。

Mike收起槍同劍，使出爆裂劈友拳，正面同大錘對撼。

頭先個錘係咁意一嘢打穿地面，可想而知，攻擊力係幾咁可怕。

結果，堅硬無比嘅鐵拳，係敵不過暴力嘅大錘。

成個鐵拳裂開，Mike更不支倒地，個人飛左去五六米咁遠。





美國鷹立即跑去睇下同伴嘅情況：「Bro，are you alright？」

Mike個拳頭又腫又瘀，假如唔係有鋼鐵保護住，佢成隻手應該報銷左。

「你有話清楚曬啲外星人嘅特性，咁呢隻嘢有咩弱點？」喺美國鷹嘅攙扶下，Mike慢慢起返身。

「無…凡係A級嘅怪物，都係無弱點。」美國鷹回答話。

「咁點算？我地兩個加埋都唔係佢對手…」

「喂！你地傾咁耐傾完未？仲有無其他招數？有就快啲用啦！」大錘怪步步緊逼，個樣有啲唔耐煩。

「頂...咁無辦法啦，硬碰硬都要博一鋪。」Mike重新執起長劍。





美國鷹身上無任何護具，所以Mike就負責掩護，等另一個自己可以開炮攻擊。

Mike用崩左一角嘅長劍同對方嘅大錘過招。

「鏘！鏘！鏘！」蒼靝受唔住連番重擊，眨下眼就斷到得返半截。

大錘怪一路同Mike對攻，一路仲可以避開美國鷹嘅炮火。

「唔怕話俾你地知，本大爺對咁多個對手入面，淨係輸過俾帝洛斯，本來以為可以同你地玩耐啲，點知都係咁不堪一擊！」大錘怪一個轉身，錘頭重重擊中Mike嘅背脊。

背面半件甲裂開左，Mike再一次倒地。