穿越時空，冒充平行世界嘅另一個自己，再去呃佢條女上床: （102）

「真係無意思，仲無其他招數呀，無嘅話咁我就要送你歸西架啦！」大錘怪行到Mike面前，打一個喊露，感到無聊。

可以出嘅招數都已經出曬，Mike已經無計可施。

「砰！」

美國鷹射出烈焰彈，想解救同伴，可惜大錘獸好輕易就用個錘，化解左啲火球。

「喂，你仲有無其他新招，無嘅話下個都輪到你啦！」大錘怪同美國鷹講。





「Fuck off！」美國鷹瘋狂射出烈焰彈。

多啲嚟密啲手，大錘怪揮動個錘，將對方火球一一化解且擋下。

形勢非常不利，但Mike唔想就咁認輸。

佢諗緊辦法點樣反殺，同時認真觀察敵人。

大錘怪雖然肌肉爆棚，但身上卻有好多傷口。





其中傷得最深嘅位置就係左邊膝頭哥，有一條好深嘅疤痕。

呢個傷口或者就係呢隻嘢嘅弱點？！

唔知得唔得，但都要試一次。

Mike揸住斷左半截嘅劍，對準敵人膝頭哥嗰個深深嘅疤痕，狠狠咁隊入去。

大錘怪掛住擋走埋身炮擊，完全忽略左Mike嘅突擊。





把劍嗰半截利刃，徹徹底底咁插左入去。

「Ahhh！！！」

舊患被擊中，大錘怪掩住膝頭大嗌：「可惡！你地地球人竟然咁卑鄙！」

呢下突擊奏效，Mike順勢擊出爆裂劈友拳，痛打落水狗：「呢啲唔係叫卑鄙，係叫『食腦』，不過我諗你啲外星人聽唔明架啦！」

美國鷹亦趁機跑埋嚟，近距離連環射出烈焰彈。

「Ahhhhhh！！！」

大錘怪憤怒咆哮，而且好似癲左咁揮動手上嘅大錘仔。

形勢逆轉，敵人廢左一隻膝頭哥，行動變得緩慢。





「咚隆！」「砰！」「噼啪！」

大錘怪打極都打唔中二人，就打爛地面以及附近嘅建築，包括Mike等人住嘅嗰間羽毛球館。

「頭先唔係好得戚嘅咩？以為我地好蝦，呢啲就係你輕敵嘅代價！」Mike彎腰避開錘仔，跟手一個左勾拳，將大錘怪打落去後面十幾米嘅大坑度。

個窿咁深，廢左一隻腳嘅大錘怪，無論點跳都跳唔返上嚟。

美國鷹要做嘅就就係對住個坑，瘋狂炮擊。

大錘怪肉隨砧板上，難以抵抗，只有仍人魚肉。

連番炮擊下，怪物被射死肉醬，死剩返嗰一個大錘仔。





個坑咁深，想執武器都好難去執。

經過一輪大戰後，張醫生就為Mike同美國鷹檢查傷勢。

美國鷹無穿無爛，至於Mike除左拳頭腫左之外，都無乜受傷。

佢地住左幾日嘅室內羽毛球場，已經被打到爛曬，無辦法再住落去。

因此佢地又要另覓地方落腳。

就喺準備出發嘅時候，本來以為無大礙嘅Mike突然感到氣促，掩住心口跪落地下。

佢條氣chok住chok住，感覺好辛苦。

呢種接近抖唔到氣嘅感覺，更勾起左佢從前嘅回憶...