張醫生叫Mike坐低,然後用掛喺頸上嘅聽診器,檢查Mike嘅呼吸。

「你試下大啖吸氣,跟住慢慢、慢慢咁吐啲氣出嚟。」

Mike照住張醫生嘅做法,大啖吸氣慢慢呼氣。

「點呀?有無好啲?」

「好似好返少少…」





Mike漸漸調整返正常嘅呼吸,之後問醫生:「點解…點解我會咁嘅?」

「我嘅判斷係,頻繁嘅高強度同劇烈嘅戰鬥,對你嘅身體造成好大負擔,你嘅肺部超出負荷,所以會出現間歇氣促,或者呼吸困難嘅情況」

解釋完,張醫生反問Mike:「你個肺以前係咪出過事?」

「係,中學嗰陣我得過肺病,當時醫生同我講,我嘅肺部功能會永久削弱。」Mike一邊講,一邊諗返起昔日嗰個病對佢嘅打擊。

如果唔係個病令到佢個肺有事,如果佢仲可以繼續游水,咁自己人生一定會變得好唔同。





「咦喂!乜你都得過肺病?Oh my God!我都係喎!」美國鷹表示自己都有相同經歷。

「唔怕老實同大家講,我以前讀high school嗰陣,游水游到破曬學校記錄,一心以為畢業之後入選拔隊,然後再參加奧運,點不知一個唔好彩,居然中左肺炎,不單止訓左半個月醫院,好返之後醫生仲同我講,我唔可以再進行高強度嘅比賽。」

「下…乜你…你中學都游水…而且又係因為病左而無得繼續游落去?」Mike感到非常驚訝。

「係呀!退出校隊、唔可以再參加比賽之後,我成個人變得so fucking depressed,日日匿埋屋企唔見人,學又唔返,連打機都提唔起興趣,就好似個廢人一樣。」美國鷹講起自己頹廢嘅經歷。

「跟…跟住呢?」Mike問。





「我記得自己頹廢左成年,無論邊個開解我、鼓勵我,但我都聽唔入耳,直至到有一日,我對塊鏡,見到自己人唔似人,鬼唔似鬼,突然間我叮一聲醒左,我唔見到自己再咁樣落去,後尾就開始慢慢振作返。」

「其實我都係。」張醫生都表示有同樣經歷。

「我同你地一樣,都係因為個肺有事無得再比賽,當時我仲包拗頸死都要繼續游,結果搞到自己爭啲浸死,後來我諗通左,接受左殘酷嘅事實,我係無得再比賽,以後都無得參加奧運架啦,咁咪試下做其他嘢囉。」

「咁點解會去左做醫生?」美國鷹問。

「我初衷係想透過醫療研究,去揾出方法解決嗰啲後遺症,我唔希望再有人好似我咁,因為一場病而令夢想破碎,嗰陣為左考入醫科,我的起心肝讀書,放假仲返part time儲錢去補習。」

「乜你有得補習...係因為去做兼職儲錢,而唔係老豆老母出錢?」Mike一直都誤解左另一個自己。

「嗯,我老豆老母一啲都唔顧家,淨係識過大海。」張醫生嘅父母聽落同MIke嘅有幾分相似。

「至於我呢,就想揾返啲同游水相關嘅職業,覺得水上用品設計都係一個出路,所以就去讀design,畢業之後去埋Speedo做嘢。」美國鷹講出自己做設計嘅原因。