「阿榮?」四個Mike異口同聲。

「點解…又多左三個Mike嘅?」阿榮行入間房。

「Wow,你就係呢個時空嘅阿榮?」美國鷹、張醫生同阿鬼認真細看阿榮。

Mike就同對方解釋:「佢地幾個同我一樣,都係唔小心喺另外嘅平行時空,穿越左嚟呢度。」

「哦~原來係咁,我差啲以為自己眼花。」





跟住,Mike就之前冒充另一個Mike嘅事,同阿榮講:「對唔住,之前我唔應該呃你地,假冒呢個時空嘅Mike,不過嗰個Mike真係唔係俾我殺,佢係…」

「得架啦,我信你,我知你唔係壞人。」阿榮搭住Mike膊頭,表示相信對方。

美國鷹摸一摸阿榮嘅手瓜:「阿榮你有無游開水架?啲肌肉咁硬嘅?」

「無喎,無游開水,不過我知自己應該游水游得幾快。」

阿榮笑一笑答完,跟住就問大家:「係啦,既然唔同時空有唔同嘅Mike,咁就代表都有唔同嘅我,不如你地講下,你地識嘅阿榮又係點架?係咪都係你地嘅好朋友?」





「Of course!friend到個個禮拜都會見嗰隻!」美國鷹搶答。

「你唔單止friend咁簡單啦,直頭做埋襟兄弟。」Mike開美國鷹玩笑。

「哈哈,衰嘢唔好講啦。」

張醫生同埋阿鬼都分享佢地同阿榮嘅事,就係得Mike靜左,講完一句嘢無再出聲。

喺幾個Mike之中,或者就係得佢同自己時空嘅阿榮斷絕左來往。





原因係,阿榮嘅成功令佢感覺自己更失敗,佢唔識得點面對對方,因此索性就疏遠不見。

依家回頭諗返,自己為左啲咁嘅原因而無左個朋友,好似真係有啲憨居。

話分兩頭,難得喺大本營有公共浴室,另一邊廂嘅子瑜沖左涼,成個人清爽曬。

返房後,佢攤喺帆布床上,㩒下嗰部Mike比佢「保管」嘅iPod Classic。

iPod嘅外形同佢嘅時光機好相似,佢心諗呢部係時光機就好啦。

過左一陣,同房嘅三個女仔陸續沖完涼返嚟。

阿蚊見到子瑜揸住部機,八卦咁問:「嗯?乜原來你都有一部iPod?我見Mike都好似有一部,同你呢部個款差唔多。」

「呢部就係Mike嗰一部。」





「佢送左俾你?」阿蚊追問。

「開頭佢話唔想用,跟住話送俾我,咁我唔太好意思收,所以就話暫時幫佢保管住先。」子瑜答。

「咦喂~睇嚟你地關係唔簡單喎。」Vincy一邊毛巾抹頭,一邊對子瑜講。

「係儸,無啦啦送部機俾你,Mike肯定對你有啲嘢。」阿蚊附和。

「下…唔會掛…」

「你諗下喎,佢iPod入面有啲咩?」阿蚊行嚟問子瑜。

「咪有歌囉。」子瑜諗左一秒回答。





「啱左一半,真正答案係,iPod入面全部都係Mike鐘意聽嘅歌。一個男人將自己鐘意嘢分享俾你,咁佢仲唔係鐘意你!」阿蚊講到似層層咁。

「我地咁多個人,但佢淨係送俾你,咁都已經好明顯架啦。」Vincy接力分析。

「唔係呀嘛…Mike鐘意我?」子瑜有啲難以置信。

「我曾經睇過一套戲,有句對白講過,從一個人聽嘅playlist,你可以間接了解嗰個人,」Suki提議,「不如你試下聽曬裡面所有歌,或者會聽得出Mike嘅心思。」

「話唔定係憑歌寄意,間接同你表白都未定。」Vincy再補多句。

俾三個女仔咁樣講一個講,子瑜忽然有啲心郁郁,開始喺度諗:唔通Mike真係鐘意自己?

佢隨手將耳筒塞入耳仔,開著部機,細聽裡面嘅音樂。

一㩒出嚟,咁啱播緊嘅歌就係叫「羅曼蒂克」。





「你坐在我身旁 令我滿心飄盪 我就不妨直講
我已經不再是當初的文藝腔
我已經不再是每天都覺沮喪
我只想摸你乳房…」

假如一個人聽嘅歌,能夠反映到佢嘅為人,咁Mike睇嚟真係一個鹹濕佬。

子瑜並無除低耳機,繼續聽埋落去。

成晚落嚟,佢將iPod入面咁多首歌,完完整整咁聽左一次,聽到部機剩返百分之五嘅電。

喺一路聽嘅同時,佢嘅腦袋反覆喺度諗:Mike真係鐘意我?