諗左成晚都無答案,不如直接問對方好過。

第二日朝早,子瑜拎住部iPod,過去隔籬房揾Mike。

佢以為呢啲嘢好易問出口,點知見到Mike之後,句嘢明明都嚟到口唇邊,但就偏偏講極都講唔出口。

Mike見子瑜入到嚟,又唔出聲,就問:「你有事揾我?」

「Er…er…其他人呢…出左去?」 子瑜見到間房得Mike一個,求其揾啲嘢講下。





「嗯,係呀。」

「佢地去左邊?」

「呢層我都唔係好清楚。」

Mike答完呢句,子瑜又靜左唔出聲,仲諗緊點開口。

「乜你好熱咩?塊面紅曬,額頭出曬汗嘅?」Mike問。





子瑜抹一抹額頭嘅汗,都係決定直入正題:「係啦…我其實想問…你點解會…送部機俾我…你係咪...um...um...」

問到一半,都係問唔到落去。

要直接問人係咪鐘意自己,其實真係有啲難以啟齒,

「搞咩呀你,今日講嘢口窒窒咁嘅?」

Mike行近過去,望一望子瑜,再睇一睇對方手上嘅iPod:「嘩,琴日部機明明仲有三分二嘅電,你咁快聽到就嚟無電咁滯?」





「啊係呀係呀,我入嚟咪就係想問你借叉電器。」子瑜再次叉開話題。

「我無帶叉電器喎…一係我出招幫你叉電。」

Mike叫子瑜拎起部機,隨即佢使出閃電招式,將威力減至原本百分之一,射去iPod底嘅叉電口。

一秒後,部機又有返滿格電。

「搞掂!100%,滿曬電。」

「多...多謝…」子瑜收返埋部iPod。

「仲有無其他嘢?無嘅話,咁一齊落去食早餐啦。」

「Er…我其實係想問…」





「叩叩—」

一陣敲門聲呢個時候打斷子瑜嘅說話。

Judy行入嚟問:「Mike,我可唔可以單獨同你講兩句?」

佢換走護甲同頭盔,著上格仔連身裙,有一份鄰家女孩嘅感覺

子瑜暫時退場,房入面得返Mike同Judy。

Judy閂埋道門,然後拎張相出嚟,遞俾Mike。

「呢張相係我同佢七年前,參加機械人大賽影嘅合照,亦係我同佢唯一一張影過嘅相。」





Judy口中嘅佢,正是屬於呢個時空嘅Mike。

Mike望一望張相,俾對方繼續講。

「比賽有一個環節係要參加者分隊合作,嗰陣我入左佢嗰隊。當其時嘅我只係個初哥,好多嘢都唔識,成日set錯嘢,不過佢唔單止幫我補救,仲好有耐心咁教返我。」

Mike靜靜咁聆聽Judy同另一個自己嘅故事。

「雖然只係相處左短短幾日,但我就鐘意左佢,比賽完結嗰日,我有諗過同佢表白,可惜最後都提唔起勇氣,唔敢講出口,只有將對佢嘅愛意收埋喺心底。」

「咁你之後都無揾過佢?」

「有,我地間唔中都會用email聯絡,不過我始終都無同佢講我鐘意佢。外星人入侵之後,我地就徹底斷開左聯絡,我仲以為我同佢呢世都唔會再見,直至嗰日見到你。」

Judy望Mike一眼,接落去繼續講:「嗰日我帶走其他人之後,其實有即刻返轉頭揾你,點知你已經無左人影,但係又估唔到,琴日居然又俾我撞返你,我仲心諗大家原來咁有緣…點知…」





Judy一時哽咽,講唔落去。

Mike感受到對方嘅傷感,比起Lulu,Judy應該係真心鐘意呢個時空嘅Mike。

可惜嘅係,到最後佢都無將自己嘅心意,表達俾對方聽。

老土都係咁講,有時有啲嘢唔講出口,咁隨時有可能以後都無機會再講。

氣氛有啲沉重,Mike想講啲嘢緩和一下:「你依家講左出嚟,我諗佢在天之靈會知道你嘅心...」

說話講到一半,Judy就攬過嚟,伏喺佢嘅心口,低聲啜泣。

Mike感覺到對方傷心同遺憾嘅眼淚。





喊左好一陣,Judy收起淚水,突然錫左Mike一啖。

Mike呆左一呆:「我知你傷心,但我唔係…」

Judy嘴對嘴再錫左Mike一啖,雙手攬得再實啲。

佢好清楚眼前嘅Mike,並唔係佢所喜歡嘅嗰個Mike,只係呢刻嘅佢想尋求一些慰藉。