「你肚入面係咪有條蟲?」嗰個男人一嚟就問Mike。

佢上身著住西裝,下身著住沙灘褲,個頭戴住一頂漁夫帽,成身嘅配搭有啲騎呢。

「係,你點知架?」Mike問。

「嗰條蟲係我以前喺地球養嘅寵物,佢個名叫做小洛洛,我感應到佢喺你身體入面。」

「條蟲係你嘅?咁你係咩人?」





「唔好意思,唔記得左自我介紹,」個男人笑一笑,「我叫帝洛斯,我嚟自地球以外嘅星體。」

「咩話!你係帝洛斯?」美國鷹感到十分震驚。

「本來我就唔係咁嘅樣,只係為左入鄉隨俗,所以先假扮成你地地球人咁款。」

「你係帝洛斯?嗰啲矮仔外星人係從你身上分裂出嚟,之前係你揾佢地嚟跟住我?」Mike問。

帝洛斯點點頭:「無錯,因為我覺得好神奇,明明小洛洛只係一隻普通嘅魔蟲,點解喺你個肚入面會發揮出魔力?」





「你揾人跟蹤我,又揾蜈蚣怪嗰啲嚟攻擊我,就係想試探我入面條蟲嘅魔力?」

「全中!不如你話俾我聽,你地地球人係點樣發掘到,我隻小洛洛潛在嘅魔力?」帝洛斯問。

「我都唔知,同埋請你唔好轉彎抹角,你揾我係有咩目的?」Mike問帝洛斯。

「唉,留喺地球真係好鬼悶,我想小洛洛返嚟陪我。」

「悶你咪走,離開地…」





美國鷹拉一拉Mike嘅衫角,細細聲提醒:「唔好激嬲佢,我地惹唔起。」

「走?咁又唔得,我仲未揾到我隻角,未走得住。」帝洛斯頭頂突出一隻斷左嘅角。

「無記錯嘅話,喺嗰本圖鑒入面,帝洛斯有兩個形態,當佢有返隻角嗰陣,咁就會變成最強形態。」美國鷹引述佢嗰本圖鑒嘅資料。

「咦?你都知得幾清楚喎。大約六千五百年前,我俾我老豆流放左嚟地球,為求生存,我以一己之力,逐一殺死曬當時嘅恐龍,過程中唔小心整斷左隻角,依家我想嚟揾返。」

大家靜左唔敢出聲,聽帝洛斯繼續講:「唔怕話俾大家聽,我唔係我老豆嘅親生仔,嗰條友知道自己戴綠帽,一怒之下就將當時大約五歲嘅我流放嚟地球,不過好彩我命大死唔去,殺曬全部恐龍之後,我就返去我嘅星球隊冧佢!」

一講到親手殺死老豆,帝洛斯個樣就變得極度猙獰。

「當時喺地球,小洛洛陪伴過我一段時間,如果唔係嗰陣唔小心走散左,咁我應該會帶埋佢走。」

帝洛斯對Mike講:「家陣我想佢返嚟我身邊,你可唔可以俾返我?」





Mike吞一啖口水,感覺到對方唔友善嘅氣息:「我…我唔知點嘔返條蟲出嚟…」

「咁呀?」帝洛斯諗左半秒,「咁不如我挖開你個肚,攞佢出嚟!」

個「嚟」都未講完,帝洛斯就閃現喺Mike面前。

對方嘅殺氣幾乎令佢心臟停止。

「我俾多次機會你,一係你自己嘔佢出嚟,一係我就自己郁手。」帝洛斯搭喺Mike膊頭上嘅手開始變形。

「你咁即係強人所…」

帝洛斯一手叉住Mike條頸,然後好似火箭咁,急速升上半空。





「諗諗下,我決定直接撻死你,撻穿你個肚,等我嘅小洛洛,同你啲心肝脾腎一齊流曬出嚟,咁樣我就唔洗整污糟雙手。」

「放...放開我...」Mike俾對方叉住條頸,幾乎抖唔到氣。

眨眼之間,佢地兩個穿過雲層,嚟到三萬呎高空。

MIke嘗試掙扎,但半點力氣都用唔到。

「同呢個世界講再見啦,地球人!」帝洛斯好隨意咁擊出一拳,打中Mike塊面。

Mike即時失去意識,成個人好似炮彈咁,急墜落地下。

隨即帝洛斯用睇唔見嘅速度,一齊飛返落去。

只係用左三秒,佢從三萬呎高空落返地下。





當佢以為Mike已經變成肉醬,殊不知出現一個不速之客,喺Mike跌落地之前救左佢。

「喂!醒下啦!」

成塊面腫左嘅Mike,朦朦朧朧咁睜開雙眼。

佢見到自己無死到,仲俾一個全身黑色,尖嘴尖鼻,好似惡魔一樣嘅怪物救左。

「之前你救過本大爺,本大爺欠你一個人情,依家我還返俾你。」隻怪物放Mike落地下,伸展雙翼。

Mike只係醒左幾秒,又再暈返。

「呵,魔迪加,乜你醒啦?」帝洛斯笑一笑。





「係呀,訓左成千年,本大爺終於都醒啦!」