穿越時空，冒充平行世界嘅另一個自己，再去呃佢條女上床: （115）

「轟隆！」

天空行雷閃電，烏雲密佈。

「喂，帝洛斯，係咪你帶本大爺嚟地球？」

「係呀，係我特登帶好似你呢啲手下敗將，嚟地球幫我揾返隻角。」

「『手下敗將』真係好哽耳，本大爺決定要將呢四個字，完完整整咁送俾你。」





魔迪加輕輕拍一拍對翼，就捲起一陣狂風，同時間，嗰對綠色嘅眼正透著攝人嘅光芒。

「哈哈！你輸過一次唔夠，仲想輸第二次？」帝洛斯發出輕蔑嘅笑聲。

「你錯啦，本大爺只會輸一次，唔會輸第二次。」

「轟隆！！！」

一道閃電劃破暗沉嘅天空，響起巨大嘅雷聲。





「哈哈！既然你咁想死左次，咁我唯有成全你啦！哈哈哈！」帝洛斯一邊大笑，一邊現出佢嘅真正形態。

狂風開始呼呼吹，雷鳴響聲不斷。

帝洛斯真身係一隻人形獨角獸，野獸一樣嘅瞳孔，嘴巴有兩隻尖利嘅獠牙。

佢身上有一件發出銀光嘅盔甲，心口中間有粒菱形嘅藍色燈，背面條尾好似長鞭咁fing下fing下。

「件甲咁樣衰嘅，真係同你襯到絕。」一股暗黑之氣漸漸包圍住魔迪加全身。





「咁耐無見，你把口都仲係咁黑人憎！」帝洛斯同樣釋放出強烈嘅邪氣。

雙方都未開戰，喺佢地身上發出嘅兩股氣，就已經喺度互相角力。

呢兩股氣極之強大，周圍其他人幾乎要窒息咁滯。

魔迪加吹一下口哨，一把黑色長刀從天而降。

呢把係佢嘅武器，幽魔之刃。

帝洛斯條尾飛脫上天，然後幻化成兩把尖利嘅劍，落到自己手中。呢兩把叫邪合劍。

「喂，本大爺就勸你地快啲匿埋，陣間唔知會發生啲咩事架。」魔迪加提醒其他人。

美國鷹同阿鬼夾手夾腳抬起昏迷嘅Mike，連同其他好奇旁觀嘅人，匿返入去避難營，並將大門緊緊閉上。





喺附近以及方圓內幾十公里嘅外星人，感覺到呢兩股震懾嘅氣息，驚到統統都揾地方匿埋。

「魔迪加，大大話話你訓左千年，洗唔洗我俾啲時間你熱下身先？」

帝洛斯身上所散發出嘅銀色氣團，感覺比魔迪加嘅暗黑之氣更加陰森。

「唔洗啦，熱身得嚟都已經打敗左你！」

個「你」字一講完，魔迪加就用肉眼睇唔見嘅速度，向住對手揮刀直衝。

帝洛斯反應極快，使出雙劍主動迎擊。