飛過維多利亞港,佢將敵人引到嚟香港島嘅,嗰一座高插入雲嘅建築。

呢座好似城堡一樣嘅建築,共有一百層,係呢個時空嘅政府,為左紀念工業改革成功,而建成嘅觀光塔。

帝洛斯入侵香港之後,就用左呢棟嘢作為據點。

佢地兩個降落喺觀光塔最頂嘅停機坪。

「飛咁耐,回完氣未呀?」





「我特登揀左呢度做你嘅葬身之地。」帝洛斯回答魔迪加。

「哈!呢度風涼水冷,的確係個好地方,不過唔會係本大爺嘅葬身之地,亦都唔係你帝洛斯嘅,因為你將會死無葬身之地!」

兩隻外星人殊死大戰,你出一拳,我出一腳,你出衝擊波,我就噴射烈焰。

本來寬闊平坦嘅停機坪,眨下眼變成滿目瘡痍嘅爛地。

一輪又一輪嘅交手,雙方已經遍體鱗傷,筋疲力盡。





只不過卻無一個肯認輸,誓要決戰到最後一刻為止。

帝洛斯出波射中魔迪加嘅膊頭,魔迪加嘅火焰則燒傷對方嘅心口,二人互有攻擊,再次打成均勢。

「喂!唔掂就唔好死頂,乖乖地俾本大爺了結你嘅生命!」魔迪加掩住膊頭嘅傷口話。

「了結我?係我了結你先啱!」帝洛斯全身嘅盔甲都爛曬,身體滿佈傷口。

然而佢地兩個都知道自己頂唔到好耐,因此必須要速戰速決。





「Ahhhh!!!」魔迪加對天咆哮,呢個時候佢決定使出最後一招。

佢嗰對綠眼發出強光,雙手中不停積聚綠色火焰,全身發放緊前所未有嘅殺氣,

至於帝洛斯雙手放於胸前,心口嗰盞藍色嘅燈即將要,釋放出身體內全部能量,以此完成終極一擊。

佢地兩個戰到最後都仍然留有一手。

「帝洛斯!我要攞你命!」魔迪加用埋最後嘅力量,將積聚嘅所有魔怒火焰全部轟出去。

「去死啦魔迪加!」帝洛斯亦傾盡所有,喺心口發射出威力無比嘅終極衝擊波。

「咚窿!」

綠色烈焰對上藍色衝擊波,兩招必殺技對決所產生嘅威力,不但令整棟觀光塔搖晃,更令維港翻起巨浪,地動山搖。





就連喺對面海避難營嘅咁多個人,都感受到嗰股威力。

「我先係宇宙最強!」魔迪加嘅火焰稍微占上風,似乎真係有機會贏到。

只不過就喺呢個時候,喺佢背後卻出現左三隻矮仔外星人。

呢啲外星人全部都係從帝洛斯身上分裂出嚟。

當魔迪加感覺到背後有人之時,三個矮仔外星人就出招,射出激光偷襲。

「帝洛斯,你好卑鄙!」魔迪加死撐死頂,唔俾自己冧低。

「對唔住,我唔知咩叫『卑鄙』,我淨係知『勝者為王』!」帝洛斯露出兇狠嘅眼神。





三隻矮仔外星人搞唔掂,之後再嚟多幾隻,一齊向住魔迪加嘅背脊射出激光。

魔迪加單腳跪低,仍然唔係認輸,直到嗰啲矮仔外星人,四面八方圍住佢嚟攻,佢就再都頂唔住。

帝洛斯嘅絕命光波戰勝左佢魔怒火焰,徹底被對方致命一擊打中。

經過強大嘅衝擊波洗禮,魔迪加不支倒地,奄奄一息。

帝洛斯行過去對手面前,展示出勝利者嘅姿態:「點呀手下敗將,再輸多次係咩感覺?」

魔迪加體無完膚,已經講唔到嘢,只能有用痛恨嘅眼神睥住對方。

「其實,我本來喺你沉睡狀態就可解決你,不過後尾我聽人講,只要挖左你對眼出嚟,咁就可以得到你嘅『魔怒火焰』,所以我先留住你條命,再打敗你一次,就挖你對眼出嚟!」

講完,帝洛斯一腳踩住魔迪加條頸,彎低腰,活生生咁用手挖對方兩隻眼珠出嚟。





「啊!啊…」魔迪加好痛苦咁嗌出嚟,但聲音卻已非常微弱。

帝洛斯攞自己對眼出嚟,然後換上魔迪加嗰對綠色嘅眼睛。

「好啦,不如就等你試下,俾自己火焰燒死嘅滋味!」

帝洛斯發射出魔怒火焰,燒到魔迪加成身著火,跟住從一百層嘅塔頂,一腳踢對方落去。

「攞左魔迪加對眼,只要再揾埋我隻角,咁我就正式變成最強形態,從此以後都唔會有人打得敗我!哈哈哈哈!」帝洛斯對天大笑。

開心大笑一輪後,停機坪上空出現左啲嘢,吸引左佢嘅注意。

嗰度有個位好似裂開左,發出好耀眼嘅光芒。