「砰!砰!砰!」

阿鬼射出烈焰彈,攻擊Mike同美國鷹。

Mike召喚出太陽槍,交俾美國鷹當作武器。

阿鬼係佢地嘅同伴,二人唔想傷到對方,所以一直都只係閃避而無還手。

烈焰彈接連發射,路面同翻側嘅車輛都被炸到爛曬。





以免受傷,子瑜同張醫生佢地已經匿得好遠,但阿鬼照樣用炮火攻擊佢地。

眼見一粒烈焰彈向住子瑜射埋去,Mike用最快嘅速度飛奔過去,使出劍雪漩渦,將嗰粒射到埋身嘅烈焰彈冰封,為子瑜擋下呢一招。

然而危機並未解除,阿鬼快速移動,想近距離向Mike開火。

「Mike!試下用冰雪,冷凍阿鬼腳下嗰兩個轆!」美國鷹諗到辦法,限制阿鬼嘅活動能力。

Mike叫子瑜再匿遠一啲,並且引走阿鬼,跟手揮劍捲起冰風暴。





不過,阿鬼腳下兩個轆移動得飛快,完美閃避Mike嘅攻擊。

一波未平一波未起,機械怪人噴出三個泡泡,今次佢將張醫生三個機械人老婆融合,變成一隻三頭六臂嘅機械人。

喺遊戲入面,機械怪人並唔算非常犀利,但嚟到現實,實力升左接近一個grade。

最大原因係,喺現實中,所有嘢都可以俾佢隨意融合,反觀喺遊戲入面,就得啲隨機嘅道具。

本來一隻阿鬼已經搞唔掂,家下仲多左一隻,Mike同美國鷹頭都痕埋。





「再咁落去都唔係辦法,不如集中攻擊Robotman。」美國鷹同Mike講。

「阿鬼佢地阻頭阻勢,想埋身都埋唔到,而且就算埋到身,一進入佢嘅三米範圍之內,又會即刻時間靜止,好難搞喎。」

「有破解方法,不過我需要你掩護我。」

美國鷹記得阿榮以前同佢打機嗰陣,最鐘意用呢個機械怪人嘅角色,對方最鐘意就屈嗰招時間靜止嘅能力。

俾人屈機屈得多,後尾經過多次嘅對戰,佢發現呢個能力有一個漏洞。

只要好好利用,咁就可以輕易接近敵人

「爆裂旋風!」Mike出招對付兩隻融合怪,幫美國鷹開路。





美國鷹手執住太陽槍,衝上前瞄準機械怪人開槍。

火焰子彈直射過去,同預期一樣,一進入三米以內範圍,粒子彈就好似定格左咁,郁都唔郁。

「2秒。」美國鷹趴喺地下,舉起支槍,心入面暗自讀秒。

時間靜止狀態維持2秒後,咁就會將攻擊反彈,而喺子彈反彈嘅一瞬間,時間靜止狀態就會同時解除。

係機會!踏正兩秒,伏喺地下嘅美國鷹掹雞,連開幾槍。

回彈嘅子彈射佢唔中,相反佢射出子彈就全部命中。

機械怪人自身防護力唔高,幾粒子彈射穿佢個身,當堂成個炸開:「Boom!」

阿鬼同埋三個融為一體嘅機械人,終於恢復返自己嘅意識。





「咦喂,點解我隻手會變成咁嘅?」阿鬼見自己隻手變成兩碌炮,嚇左一跳。

「你同支烈焰炮同埋個車轆融合左,仲俾隻外星人控制住,係咁攻擊我地。」Mike解釋話。

「融合左?唔係呀嘛,兩隻手變成咁,咁我以後點撥頭髮呀?」阿鬼啲頭髮越撥越亂。

而張醫生接受唔到,三個機械人老婆變成咁嘅樣,成個人灰左,都唔知仲帶唔帶佢地去自己嘅時空好。

機械怪人變成碎片,剩低兩件裝備,分別一條天線同埋一支泡泡槍。

美國鷹將佢地據為己有,成為自己嘅新武器。

阻頭阻勢嘅外星人已被消滅,只要再行多半程路,咁佢地就可以過到對面海。





殊不知,佢地一直向前行,行極都行唔到去盡頭。

條橋幾長都好,無理由行左成粒鐘都未到。

Mike同子瑜一齊揸住地圖,上面標示條大橋只係兩公里,以正常步速,係無可能咁耐都未行到。

「奇怪,點解咁耐都未行到嘅?」子瑜對腳行到開始酸。

「係囉,無理由仲未到架。」Mike話。

美國鷹停低腳步,諗左幾秒:「我地可能進入左,外星人嘅異度空間。」