※ ※ ※



「我要殺死帝洛斯!我要幫阿榮報仇!」

沮喪左成晚,美國鷹叫自己振作,兼且發誓要為好朋友報仇。

無論帝洛斯喺邊個時空,就算去到天腳底,佢都要摷對方出嚟報仇。





至於Mike同子瑜,一覺訓醒後就決定起行,前去香港島。

只有穿過觀光塔上嗰一道時空裂縫,佢地先有機會離開呢個時空。

張醫生同阿鬼當然都一齊同行。

張醫生更帶埋嗰三個,同佢老婆生得好似樣嘅機械人上路。

佢話要帶佢地返自己嘅時空,然後取代屋企嗰三個真老婆。





睇嚟佢真係好討厭自己三個老婆。

喺呢個時空嘅香港,無海底隧道,只得一條跨海大橋,要過海就必須經過嗰一條橋。

Judy其實都有試過去港島,但條橋上有外星人攔路,令佢無法向前進。

「呢個係地圖,呢部係機械鴿,佢有錄音同自動飛行功能,如果你地過左橋,麻煩通知我地一聲,我地都諗住過去睇一睇對面海,仲有無生還嘅人。」

Judy將地圖同隻機械鴿交俾Mike同子瑜。





道別過後,Mike佢地根據Judy嘅指引,嚟到過海大橋。

橋上受到破壞,路面基本上爛曬,大部分嘅車輛都係翻側。

嚟到橋嘅中間,真係出現兩隻外星人攔路。

一隻係體型細細粒,外形普普通通嘅機械人,另一隻外形就比較奇異,芭比公仔咁樣嘅人頭,身體係大貨車,雙腳就係燈柱。

「Robotman,機械怪人,B+ level。」

「另一隻呢?」Mike問美國鷹。

「另一隻唔係外星人,只係機械怪人所控制嘅融合體。」

「咩係融合體?」





「機械怪人有將唔同物件融合成一體嘅能力,融合成功後,佢仲可以控制嗰樣嘢。」美國鷹回答。

「假如B+級嘅話,應該都唔會太難對付,起碼無帝洛斯咁勁。」

Mike召喚防護甲同長劍:「等我嚟對付隻機械怪人,美國鷹、阿鬼,你地就去對付嗰隻騎呢融合怪!」

說話一講完,佢地都未出手,對面隻融合怪就率先攻擊。

隻嘢用自己貨車嘅身體,衝過嚟飛身撞擊,美國鷹同阿鬼上前合力阻擋並還擊。

而Mike就直接衝向機械怪人度,揮劍劈斬。

敵人見到佢衝埋嚟,卻無任何動靜。





仲有幾步之遙,Mike眼見就嚟殺到埋去,突然間,佢全身唔郁得。

唔單止把口講唔到嘢,連眼都眨唔到。

下一秒,機械怪人釋出一道無形嘅力量,將Mike成個人彈走到幾米之外遠。

「哎呀!」見到Mike仆親,子瑜感到心痛,想埋嚟扶起對方。

不過Mike就怕子瑜危險,叫對方繼續同張醫生佢地企埋一邊,唔好埋嚟。

相比起機械怪人,嗰隻融合怪就好廢,阿鬼同美國鷹輕鬆對付,一齊出招將隻嘢打落海。

跟住佢兩個埋去扶起Mike。

「只要機械怪人頭上面嗰條天線一著燈,咁喺佢三米以內,任何人、任何物件都會完全靜止郁唔郁。」美國鷹同Mike解釋。





「既然埋唔到身,咁就試下第二招啦!」Mike揮動蒼寒之劍,捲起冰雪風暴。

呢招係佢嘅「劍雪漩渦」。

令人意想不到嘅係,當啲冰雪一接近敵人,就徹底靜止不動,之後機械怪人更將成招攻擊完整奉還。

極寒暴風迎面吹返轉頭,Mike佢地匿喺路上一架翻側嘅車後面。

阿鬼慢左一步,一隻腳被冰封。

機械怪人卻無乘勝追擊,只係噴出三個泡泡。

其中一粒泡泡,朝住阿鬼方向快速飄去。





「阿鬼小心!」美國鷹大嗌,卻無留意到,自己手上碌烈焰炮都俾泡泡掂到。

本來好似網球咁大嘅泡泡,一掂到阿鬼同烈焰炮,就即刻變到好大,足夠包住成個人同成支炮。

兩個泡泡飄上半空,再同第三個包住車轆嘅泡泡,融合成一個更大嘅泡泡。

「Pop!」

下個瞬間,嗰個大泡泡一下爆開。

阿鬼、烈焰炮同私家車嘅車轆,融合成一個新形態。

阿鬼雙手化成烈焰炮,兩隻腳掌就變成車轆,而且佢已經失去自主意識,完全受到機械怪人控制。