空間殺手收皮後,整個異度空間隨即被破解。

個天即時光猛返曬,條橋亦都無再搖盪。

只不過,路面卻一分為二,裂開一條大裂痕。

原因就係,Mike頭先嗰招必殺技威力太強,連條橋都破壞埋。

「條橋可能隨時會冧,大家要行快兩步。」美國鷹加快腳步,帶頭向前行。





Mike行左兩步,突然休克暈低。

「Mike!Mike!」子瑜嚇一跳,叫極對方都無反應。

張醫生第一時間檢查Mike嘅心跳同脈搏。

「點呀,Mike佢無嘢呀嘛?」子瑜好緊張。

「佢身體好虛弱,可能係頭先嘅戰鬥應消耗太大,令佢暫時陷入休克狀態。」





「咁佢幾時醒呀?」子瑜追問。

「睇怕一時三刻都無咁快醒。」

「Shit!條橋真係冧緊!快啲跑呀!」美國鷹大嗌。

呢刻一,條橋就好似冧積木咁逐漸崩塌,再唔走佢地就要跌落海。

子瑜同張醫生合力扶起昏迷嘅Mike,跟住阿鬼接力將佢抱起。





佢地幾個有咁快就跑咁快,避開路面嘅窿窿嚹嚹,趕喺條橋徹底倒塌前,衝過去對面海。

今次真係「走得快好世界」,最後有驚無險,佢地都順利過到橋。

見到成條橋斷開左,佢地知道無回頭路可走,不過佢地亦從來無諗過要返轉頭。

環顧四周,眼前港島嘅景象比九龍更加破敗。

地下被掘開一個個坑洞,呢啲都不在話下,周圍嘅建築物基本上都係殘破不堪。

眾人照住地圖指示,朝觀光塔嘅方向邁進。

「點解Mike仲未醒嘅?」子瑜擔心緊Mike嘅情況。





「我啱先幫佢check多次心跳,情況都算穩定,唔洗太擔心。」張醫生話。

之後佢地行行下,一陣風沙撲面吹嚟。

附近嘅環境黃沙滾滾,令人有啲睇唔清前路。

跟住一啲非常刺耳,猶如刮墻一樣嘅聲音傳嚟。

一個人形怪物企喺路中心彈緊小提琴。

隻嘢個樣成隻牛咁,體型亦相當強壯,身上有類似穿山甲一樣嘅鱗片。

佢一路亂咁拉個小提琴,條尾就一路喺度發,揚起啲風沙。

「Oh no…又一隻A級怪物。」行最前嘅美國鷹停低腳步,其他人都唔敢行前。





外星人彈完之後,對住四周圍大聲呼嗌:「帝洛斯BB,你快啲出嚟啦!我已經揾到你隻斷角啦!」

仔細一睇,嗰隻外星人用嚟拉琴並唔係琴弓,而係一隻尖長嘅斷角。

「呢隻外星人又咩料呀?」孭住Mike嘅阿鬼問美國鷹。

「佢嘅名叫Lettino力天奴,依家佢手上揸住嘅,應該就係帝洛斯一直要揾嘅斷角。」

「咁即係帝洛斯都喺呢附近?」阿鬼左右張望。

「帝洛斯咁緊張隻角,如果喺附近嘅話,佢一定會即刻出現,不過依家咁睇,佢應該仲喺另一個時空。」美國鷹推測。

「帝洛斯BB你去左邊呀?我彈左咁多首歌嚟表達愛意,你竟然都係唔理我?」力天奴喺度發牢騷。





「我地唔可以俾帝洛斯駁返隻角,假如俾佢變成終極狀態,咁就絕對無可能再對付到佢,所以我地趁依家就要喺力天奴手上,搶返嗰隻斷角。」美國鷹細細聲對大家講。

「Mike暈左仲未醒,得我同你有作戰能力,加埋都未必對付到隻A級怪物喎。」阿鬼就話。

「係囉,不如都係兜路走啦,等Mike醒左再算。」子瑜都覺得唔應該冒險。

「機會難得,點都要試下。」硬碰硬唔得嘅話,美國鷹就想諗個方法,呃隻角返嚟。