穿越時空，冒充平行世界嘅另一個自己，再去呃佢條女上床: （135）

「我唔理你係邊個，總之嗰隻角係屬於我嘅帝洛斯BB，快啲還返過嚟！」

力天奴完全唔俾面，想從帝尼爾手上搶返走嗰隻斷角。

「有本事咪過嚟攞。」被帝尼爾附身嘅Mike頭髮豎曬起嚟，手上嘅斷角釋出一股令人不寒而慄嘅邪氣。

美國鷹、子瑜佢地忌憚三分，不禁退後幾步，唔敢靠得太近。

「帝洛斯BB話過，佢最憎就係佢個死人老豆，而今日就等我代佢嚟徹底收拾你！」





力天奴雙手執住尖利嘅長矛，乘著飛舞嘅黃沙，衝去攻擊帝尼爾。

佢嘅速度好快，一下子就嚟到對方面前，兩支長矛隨勢突刺。

不過帝尼爾就好似識迷蹤步一樣，一瞬間橫移避開，兼且將斷角當武器，出招反擊。

速度上，佢比起力天奴更加快，每揮動一下斷角，都會發放出銀白色嘅邪氣。

「鏘！！！」





斷角粉碎兩支長矛，隨即帝尼爾垂直跳高，飛膝重擊力天奴嘅下巴。

力天奴成個人向後飛起，隨即帝尼爾閃現喺佢身後，用斷角銳利嘅尖端，狠狠刺插對方嘅背脊。

「Ahhh！！！」

力天奴雙膝跪地，背脊嘅傷口流出橙色嘅血液。

「話時話，你同個仆街仔好熟架？」帝尼爾抹走沾染喺角上嘅橙血。





「關你咩事！」力天奴忍痛起返身，並且操控風沙，捲起狂烈嘅沙塵暴同龍捲風。

美國鷹等人受唔住吹襲，被逼再退後，匿去馬路邊嘅草叢。

至於帝尼爾附身嘅Mike不動神色，完全無懼沙塵龍捲風。

點不知，突然之間，有五六道藍色激光射向帝尼爾。

從帝洛斯身上分裂嘅矮仔外星人，喺呢個時候出現。

佢地話曬都屬於帝洛斯嘅一部分，所以一感應到仇人嘅氣息，即刻自動聚集並圍起攻擊。

帝尼爾立於黃沙風暴之下，隻身一個面對密集嘅激光，以及力天奴嘅反撲。

「Mike！！！」





子瑜見到Mike嘅肉身有危險，好想出去拉走對方，無奈風沙實在太大，連半步都無法踏出。

帝尼爾神態依然淡定，下一秒，手上嘅斷角猶如小李飛刀飛出。

先插爆力天奴一邊膊頭，再巡迴環繞一周，輪流隊爆嗰啲漂浮上空嘅矮仔外星人。

過程快速利落，最後斷角返回到手中。