「話時話,個仆街仔唔好憎我架咩,點解仲未出…」

說話講到一半,帝尼爾忽然流鼻血。

佢用手抹走啲血,不禁歎息:「唉,人類嘅肉體始終都係太脆弱,無法抵禦到邪氣。」

斷角嘅邪氣正侵害緊Mike嘅肉身。

力天奴用風沙療愈身上嘅傷痕,至於啲矮仔外星人就越嚟越多,數量接近超過三十隻,全部都係被帝尼爾嘅氣息吸引而嚟。





帝尼爾知道Mike嘅肉身頂唔好耐,決定速戰速決。

佢加倍釋放出斷角嘅邪氣,然後以氣馭角,突擊力天奴。

力天奴閃身躲避,但都被斷角擊中手臂。

同時間,重重包圍嘅矮仔外星人,漂浮於上空,一齊射出激光。

藍色嘅激光鋪天蓋地,由上而下向住帝尼爾撲去。





帝尼爾立即控制斷角,圍住自己旋轉,所釋出嘅邪氣圍成一道屏障,抵擋猛烈嘅炮轟。

雖然化解左攻擊,但Mike嘅身體真係無辦法再承受得住。

帝尼爾單膝跪地,啲鼻血越流越多。

班矮仔外星人同埋力天奴,梗係「趁你病攞你命」,接住發射出新一輪嘅激光雨,以及長矛攻擊。

帝尼爾感覺到Mike嘅心跳變慢,手腳已經發唔到力。





子瑜不忍Mike嘅身體被摧殘,一手奪去美國鷹條天線,用最快嘅速度衝埋去Mike嘅身邊。

無論係長矛還是激光,一進入佢地嘅三米之內,便瞬間靜止。

隨後全部攻擊更原封不動,統統反彈俾敵人。

帝尼爾無法再支撐落去,選擇還返個身體俾Mike。

「子…子瑜?」

Mike恢復返自我意識,可惜只得一秒,就再次昏迷,倒臥於子瑜懷中。

美國鷹、阿鬼無法繼續旁觀,欲要全身而退,只能主動出擊。

張醫生同佢融合一體嘅三個老婆,都按捺不住,衝埋出去幫手。





混戰期間,突然有一大班外星人出現。

當中有之前見過嘅斧頭怪、四手怪,仲有其他嘅外星怪物。

佢地加入戰團,攻擊嗰啲矮仔外星人。

呢班外星人被帝洛斯帶嚟地球,被人勞役左咁耐,揾隻斷左嘅角,佢地條氣唔順,決定群起反抗。

其實之前喺黃埔船塢,Mike同子瑜都遇過啲外星人集體反抗。

比起嗰一次,今次嘅規模更大,反抗嘅外星人更多。

情況變得極度混亂,亦都係渾水摸魚逃跑嘅最佳時機。





阿鬼孭住Mike同美國鷹,喺槍林彈雨嘅混戰下帶頭突破重圍。

子瑜同張醫生佢地則緊隨於其後。

力天奴想追上去搶返隻角,但場面實在太混亂,眨下眼就揾唔返佢地去左邊個方向。

結果歷盡驚險,美國鷹等人卒之成功逃脫。