「哈哈哈哈哈!」

佢發出邪惡嘅笑聲:「係啦,就係呢種感覺啦!哈哈哈哈!」

「有乜咁好笑?」趁敵人喺度大笑,另一個帝洛斯以破軍之勢擊出十字劈殺。

一瞬之間,帝洛斯胸前嘅裝甲上出現一個十字劍痕。

「噼啪!」





下一秒,佢身上成副裝甲裂成碎片。

另一個帝洛斯乘勝追擊,以肉眼睇唔見嘅速度劈斬,手上嘅雙劍只見光不見影。

帝洛斯想用六芒星結陣限制另一個自己嘅行動,問題係,對方對自己非常了解,早就洞察呢一招,好輕鬆便避開左。

「十字殺!」另一個帝洛斯轉身劈斬,喺敵人背脊留下深長嘅疤痕。

隨即再發射出衝擊波,將對手從半空中打落地底。





帝洛斯成個人直墮落地,陷入幾米深嘅地底。

佢手中嘅劍已經斷裂,全身有唔少傷痕。

「哈哈…好犀利…終極形態嘅我真係好犀利…」

佢抬頭仰望另一個自己,一方面敬畏嗰種強得可怕嘅力量,一方面充滿渴求,心入面比頭先更加渴望得到嗰隻角。

另一個帝洛斯梗係唔俾敵人有任何反擊機會,立即使出其中一招絕技:「魂裂斬!」





雙劍劃出兩道形如彎月嘅劍氣,直逼喺腳下如螞蟻般細小嘅帝洛斯。

呢一招以及頭先嘅十字殺,都係只有係終極形態,先使得出嘅招數。

「魔怒火焰!」帝洛斯不甘示弱,雙眼發出綠光,使出魔迪加嘅絕招。

熾熱嘅惡魔之火湧動,硬撼勢如破竹嘅劍氣。

佢之前打敗魔迪加,挖左對方雙眼,獲得左惡魔嘅火焰。

無料到,惡魔嘅火焰竟不抵劍氣,帝洛斯被迫用埋自己嘅絕命衝擊波,靠住雙重攻擊先化解得到劍氣。

「點解你…你會有惡魔嘅火焰?」另一個帝洛斯感到一絲驚訝。

帝洛斯企返起身,從地底跳返上地面:「哈!你打得敗我,咁我咪話你聽囉!」





「好!就等我收拾你!」另一個帝洛斯從高空極速衝落嚟,準備以雙劍飛斬。

至於帝洛斯卻無任何迴避嘅動作,而係打開雙手,向住身邊嘅大草原放火。

「熊!」

綠色嘅烈焰一下子燃燒整片大草原。

本來匿埋左嘅恐龍全部遭殃,困喺熊熊大火之中。

嗰啲恐龍全部係另一個帝洛斯最好嘅朋友。

眼見朋友有事,梗係唔可以袖手旁觀。





佢暫停攻擊,逐一抱走受困嘅恐龍。

帝洛斯狡猾一笑,對於佢嚟講,呢個正是反攻嘅好時機。

佢手揸斷劍,以最快嘅速度飛上半空,雙手從後捅穿對方背脊。

另一個帝洛斯其實感應到敵人偷襲,但係佢手抱住兩隻恐龍BB,唔忍心鬆開手,故此令佢無法抵擋。

「Ahhh!」另一個帝洛斯選擇承受痛苦,都唔願放開兩隻恐龍還擊,「你…你好卑鄙!」

「我真係無講錯!你太過婦人之仁啦!根本唔配擁有一隻完整嘅角!」

帝洛斯將兩把斷劍隊到最盡,然後用六芒星陣禁錮對手。

為左唔俾兩隻恐龍受傷,另一個帝洛斯及時捲曲身體,保護住佢地。





帝洛斯得勢不饒人,瘋狂噴射出魔怒火焰攻擊另一個自己。

「你真係影衰曬『帝洛斯』呢個名,明明有一隻完整嘅角,你居然無好好利用,而係匿埋喺地球同班恐龍玩煮飯仔?!」

帝洛斯瞳孔閃耀陰森嘅綠光:「你對你真係好失望!留你喺世上只係丟左我架!」

佢憤怒爆氣,左手湧出綠色之火,右手噴射衝擊波,雙管齊下猛烈咁攻擊另一個自己。

「Ahhh!!!」

另一個帝洛斯發出痛苦嘅哀嚎,全身重傷,軟弱無力咁墜落地下。

帝洛斯將另一個自己踩於腳下,伸手用力從頭上掹走嘅隻完整嘅惡邪之角。





呢一刻,另一個帝洛斯已喪失還擊之力,連叫出嚟嘅力氣都無。

帝洛斯扯走自己隻角,跟手慢慢換上佢夢寐以求,一隻完整無缺嘅角。

隻角完美咁接合,隨即帝洛斯身上發出,前所未有咁強烈嘅邪氣。

銀白色嘅氣息包圍佢全身,本來破裂左嘅盔甲重新修復,條尾亦都生返出嚟。

「哈哈哈!哈哈哈哈哈哈!我終於!我終於都變成最強狀態啦!哈哈哈哈哈哈!」