逃出風沙覆蓋之地,穿幾條橫街,眾人嚟到一個露天市集。

眼見外星人無再追嚟,佢地先至鬆一口氣。

當抬高頭,大家就會見到直立高聳嘅觀光塔。

嗰道閃爍嘅時空裂縫就喺塔頂之上。

啱啱經歷完一場搏鬥,佢地需要停一停抖一抖,加上Mike仲昏迷緊,情況未明,因此暫時最好都係揾個地方休息下。





在此之前,佢地需要揾啲糧食充飢。

眼前嘅露天市集攤檔,雖然一片髒亂,但佢地都嘗試搵下有無食物同食水。

結果只係搵到一啲過期罐頭同幾罐咖啡。

不過有點都好過無,隨後眾人重新出發,去搵地方落腳。

成個港島受破壞嘅程度遠勝於九龍,基本上到處都係廢墟。





無論係大型工廠,抑或樓宇住宅,都變得蓉蓉爛爛。

一係就全座倒塌,一係就冧剩一半,露出嘅鋼筋同水泥。

佢地兜嚟兜去,都未揾到合適嘅地方。

至於昏迷中嘅Mike伏喺阿鬼背脊,額頭冒汗,臉色十分蒼白。

子瑜見唔對路,摸一摸Mike嘅額頭:「弊啦,Mike個頭好㷫,好似發緊高燒!」





其他人停低腳步,張醫生叫佢融成一體嘅三個老婆,即刻幫一幫Mike探熱。

佢三個機械人老婆都內置左啲醫療工具,除左有探熱針之外,仲有藥箱、急救箱,個背脊仲可以隨時趟張臨時病床出嚟。

「39.5度,Mike的確係發緊高燒。」張醫生話。

「咁…咁點算好?Mike佢會唔會有事架?」子瑜追問。

「睇嚟我地盡快揾個安全嘅地方,俾MIke休…」

「Boom!!!」

外星人間嘅混戰未止,傳嚟嘅慘烈打鬥聲,打斷左張醫生嘅說話、。

同一時候,天色亦都開始變暗。





為保安全,佢地唔適宜再講咁多,寧願加快腳步,爭取入黑前搵到棲身之處。

然而呢個時空嘅香港島,一樣都係四面環海,只要行出少少就會見到個海。

好好彩,沿住海邊一直行,俾佢地發現幾架遊艇停泊喺岸邊。

喺咁嘅環境下,住喺船入面或者已經係最好嘅選擇。

登上遊艇後,張醫生第一時間再幫Mike探熱,以及檢查心跳。

Mike嘅燒已經去到42度,塊面紅曬,額頭熱到就嚟出煙。

「冰!揾下有無冰!」張醫生催促。





美國鷹第一時間衝去雪櫃,無奈雪櫃卻空空如也,乜嘢都無。

子瑜同阿鬼都即刻幫手,摷勻成架遊艇,想揾啲凍嘅出嚟幫Mike降溫。

呢個時候,張醫生嗰三個老婆一齊開口話:「俾杯水我,我急凍裝置。」

「好,等等!」子瑜衝入廚房,倒左杯水出嚟。

融合成三頭六臂嘅機械人,將杯水倒喺一隻手嘅手心,一秒之間,液體變成冰冷嘅固體。

張醫生用毛巾包住啲冰,鋪喺Mike額頭上。

然之後,三個老婆攞出內置嘅藥箱,張醫生喺箱入面揾到啲退燒藥,按份量喂左Mike食幾粒。

喺有限嘅醫療資源下,佢可以做嘅就只有咁多。





遊艇上面一層係甲板,下面一層就有間房。

佢地幾個夾手夾腳,將Mike抬去間房裡休息。

子瑜決定一個人留喺房內,陪喺Mike嘅身邊。

雖然佢好擔心,但同時亦都相信對方一定會無事醒返。

一定會。


※ ※ ※







風聲蕭蕭,草原之上,蒼穹之下,劍光凌亂密集閃動。

「劍流閃!」

半空之中,兩個帝洛斯各自拎住兩把劍,埋身互斬互劈。

論實力,擁有完整惡邪之角嘅一方,其實係更勝一籌。

帝洛斯唯一嘅優勢,大概就只有實戰經驗。

「停手!我唔想同你打!」

「你話停就停?我都話左,我要硬你嗰隻角!」帝洛斯眼神充滿殺氣,總之唔隊冧另一個自己,佢就唔會罷手。

「既然係咁,咁就唔好怪我唔留手!」另一個帝洛斯頭上嘅角,釋放出極強烈光芒,同時間全身邪氣爆棚。

帝洛斯目睹對方咁強大嘅氣勢,不但無半點畏懼,反而感到無比興奮。