穿越時空，冒充平行世界嘅另一個自己，再去呃佢條女上床: （146）

「Rauugghhh—」

兇悍嘅咆哮聲響徹耳邊。

Mike等人已經預料到前面一定係危險重重，隨時會出現可怕嘅敵人。

不過就算幾驚都好，佢地唔會退縮。

嚟到一座座煙囪豎立嘅鑄鐵廠區，果然，攔路出現一隻三頭魔龍。





隻嘢接近有哥斯拉咁大隻，心口上面一個頭，左右手又各有一個頭，加埋一共有三個龍頭。

「Rauugghhh！！！」

三頭魔龍咆哮如雷，刮起一陣強風，震懾眾人。

「遊戲入面，呢一隻係隱藏怪物，好少機會出現，估唔到我地咁都遇得到。」美國鷹由頭到腳，仔細咁觀察隻三頭魔龍。

形態上，隻外星人可以話同遊戲之中嘅幾乎一樣。





「呢隻嘢嘅實力係A級？」Mike問。

「A+，絕對係個好犀利嘅敵人。」美國鷹答。

「我、你、阿鬼再加埋魔迪加，我地四個合力應該打得過？」

「唔好意思，本大爺要留力，所以喺帝洛斯出現之前，本大爺都唔會出手。」

魔迪加fing一fing條尾，翹埋雙手飛上半空，置身於事外。





「喂！你有無搞錯呀，話曬大家家陣坐埋同一條船，你居然唔幫下手，仲做free rider！」

Mike鬧魔迪加，但對方都係充耳不聞。

喺呢個時候，三頭魔龍向住佢地出招攻擊。

佢左手嘅龍頭噴射出，能溶解一切堅硬之物嘅腐蝕炮彈。

「Watch out！」美國鷹第一時間啟動時間靜止天線，阻擋撲面而嚟嘅攻擊。

子瑜、張醫生同佢三個老婆退避三舍。

下一秒，美國鷹將腐蝕炮彈反彈，而敵人另一隻手個頭，發射出散彈激光炮。

因為時間靜止嘅能力有緩衝時間，美國鷹無法再用返同一招，佢地幾個就只能四散躲避。





閃避嘅同時，Mike召喚長劍同防護甲，阿鬼則利用自己瞬間轉移嘅能力，閃現喺三頭魔龍嘅背後，開炮攻擊。

烈焰彈準確命中，只係效果就麻麻，並無造成太大傷害。

魔龍嘅三個頭，分別能夠使出唔同嘅攻擊，左手出腐蝕炮彈，右手射散彈激光炮。

至於真正嗰一個頭，會噴出破壞力極強嘅超級死光炮。

深紅色嘅破壞死光呢刻橫掃八方，周邊嘅工廠統統夷為平地。

Mike佢地被逼越退越後，要好似走難咁走，就連魔迪加都爭啲被射中。

「喂搞咩呀？拿拿聲搞掂隻嘢佢啦！」





「收皮啦你！得個睇字又唔嚟幫手！」Mike反駁魔迪加。

三頭魔龍主要用遠攻，令到對手好難埋佢身。

眼見如此，Mike決定召喚出神獸。

秘笈嘅第九招就係召喚獸。

Mike集中精神，將左手放喺心口，然後吹左三下口哨。

隨即風起雲湧，平地一聲雷，響遍四周。

一隻巨大神獸騰雲駕霧，慢慢從天而降。