「好啦,我諗你大致都明架啦,咁我地每人就先抽四張咭。」

按Card gamer指示,張醫生喺咭牌堆中,抽出四張咭。

一直以嚟,張醫生都無參與戰鬥,忽然間無啦啦親身上場,令佢感覺有啲無所適從。

呢個時候,擂台上亮起白光燈,座位側邊顯示一排紅色格仔。

張醫生望一望手上四張咭,佢抽到阿鬼、爆裂旋風、四手怪同埋一把巨大斧頭。





當中兩張係角色咭,上面都有能力值顯示。

咭上面嘅阿鬼並唔係機械人,而係最初鬼魂形態嘅阿鬼,能力值只有50點,另一張四手怪則有500。

「你係新手,咁我就讓你先出牌。」Card gamer選擇後攻,「係啦,有樣嘢要提醒下你,如果你想你嘅同伴恢復原狀,咁就得一個方法,就係要打敗我!」

對於呢啲咭牌遊戲,張醫生除左細個睇過《遊戲王》之外,都無乜點接觸。

不過家陣無辦法,Mike佢地咁多個人條命,就掌握喺佢手上,無論點佢都要放手一試。





考慮左片刻,佢決定先使用能力值較高嘅四手怪。

只要將咭牌放喺面前嘅虛擬panel,咁就可以喺場上召喚怪物。

跟住佢再出效果咭,為四手怪裝備巨大斧頭。

呢把斧頭係斧頭怪嘅武器,攻擊力達1000點,裝備之後四手怪嘅能力值,達到1500點。

「接下嚟我要向你直接攻擊。」張醫生下達攻擊指令。





「哈!唔好意思,我頭先唔記得左講。第一回合先攻嘅一方,係唔可以攻擊住,」Card gamer笑住講,「你仲有無牌要出,無嘅話就輪到我啦喎。」

「可惡…」張醫生心諗條友擺明有心陰佢。

「好,咁輪到我嘅回合啦。」Card gamer先召喚蜈蚣怪上場。

雖然蜈蚣怪無左把巨鑽,但能力值都有800點。

「然之後,我要召喚你個friend美國鷹。」

美國鷹嘅能力值只有150,暫時對面兩隻怪物都未構成到威脅。

只但係,Card gamer嘅回合仲未完,佢喺蜈蚣怪身上使用效果咭「修羅之怒衝」。

怪物自身嘅能力值再加上效果咭加持,點數一下子提升到2200點,足夠打敗張醫生場上1500點嘅四手怪。





蜈蚣怪散發惡神修羅之氣,以極快嘅速度橫衝直撞,一嘢撞爆四手怪。

由於「修羅之怒衝」嘅效果只維持一個回合,所以攻擊完左,蜈蚣怪嘅能力值變返800點。

「係咪輪到返我?」

「未!」Card gamer指令美國鷹直接攻擊張醫生。

美國鷹不由自控,揮拳亂打,儘管係虛擬對戰,但張醫生都會有啲不適嘅感覺,尤其對方仲係自己嘅同伴。

「每個回合每隻怪物只能攻擊一次,當另一方場上無任何怪物,咁就可以直接攻擊。」Card gamer解釋,「每一次直接攻擊,就會扣玩家一格生命值。」

「一格生命值?」





「無錯,你可以睇睇你右手邊。」

每個玩家座位側邊,都顯示住一排紅色格仔,代表住玩家嘅生命值。

張醫生受到直接攻擊,減左一格血,依家得返六格。