穿越時空，冒充平行世界嘅另一個自己，再去呃佢條女上床: （150）

Card gamer嘅回合完結，輪到張醫生抽牌。

當新回合開始，每個玩家可以抽兩張牌。

張醫生運氣都唔錯，抽到能力值達1200嘅B+級怪物鐵馬騮，仲有蜈蚣怪嘅巨型鐵鑽。

呢兩張咭一齊使用，數值高達2300點，而且呢張效果咭嘅效力，能夠維持到三個回合。

無左烈焰炮，鐵馬騮就用巨型鐵鑽，以其人之道還其人之身，隊爆左蜈蚣怪。





Card gamer呢刻場上只有美國鷹一個。

張醫生乘勝追擊，召喚能力值得50嘅阿鬼，結合上回合用剩嘅爆裂旋風，消滅埋美國鷹。

如此一嚟，Card gamer場上全部角色咭被消滅。

遺憾嘅係，今個回合張醫生未能直接攻擊，因此扣唔到對方啲血。

「哈，你都有返幾道散手。」Card gamer抽兩張咭，「咦，我運氣都唔差喎，我要發動效果咭『操控插頭』。」





呢張咭嘅能力嚟自三角錐體怪。

Card gamer利用此卡，將對方嘅鐵馬騮歸為已有，然後再操控怪物消滅阿鬼。

一瞬間，張醫生面前空空如也，無曬啲怪物。

Card gamer繼而喺手上再召喚出魔迪加。

失去雙眼同魔怒之火嘅魔迪加，實力上都有A級，能力值高達2000。





「我要使用效果咭『蒼靝』，裝備左呢張咭之後，魔迪加嘅數值足足有3300，我要用佢直接攻擊你！」

「咦咦咦？點解本大爺嘅身體，唔受自己嘅控制嘅喂？」魔迪加手執Mike嘅長劍，向住張醫生猛烈劈斬。

張醫生嚇到舉起雙手擋隔，假如係喺現實中左呢招，佢條命一定就凍過水。

而喺呢個遊戲入面中招，佢就要扣多一格生命值，得返五格血。

佢抹一抹額頭上嘅冷汗，跟手抽兩張咭。

一張係佢其中一個機械人老婆Yoyo，另一張係功能牌。

「我要發動功能牌，可以再多抽兩張咭。」

結果抽到另一個老婆欣欣，仲有效果咭白色太陽槍。





呢幾張咭無論點樣出，都無法打敗對手嗰兩隻怪物。

不過為左避免被直接攻擊，佢點都要搵佢老婆出嚟擋一擋。

一如所料，魔迪加同鐵馬騮輪流攻擊，將Yoyo、欣欣輕鬆消滅。

Card gamer亦召喚出第三隻怪物旋轉陀螺，直接攻擊對手。

只係經過幾個回合，張醫生就得返四格血，相反，對方一滴血都無扣過之餘，仲有三隻怪物在場。

目前形勢對張醫生嚟講，可以話相當不利。