距離觀光塔越嚟越近,子瑜行行下,聞到一啲香味:「大家聞唔聞到?好似有陣香味飄過嚟。」

除左阿鬼同張醫生三個老婆之外,其他人都聞一陣香噴噴嘅氣味。

「點解我聞極都聞唔到嘅?」阿鬼猛咁索鼻,但咩味都聞唔到。

「梗係聞唔到啦,你機械人嚟架嘛!」美國鷹大大啖索一下,「陣味有啲似Cologne,真係幾好聞。」

阿鬼表示:「頂,我都想聞下!」





「但係無啦啦出現咁嘅香味,會唔會有啲奇怪?」Mike尋思。

「都係喎,方圓二十里唔係死屍就係爛磚爛地,點會出現香味?」美國鷹都有呢個疑問。

「算啦,唔好考究呢啲住啦,我諗我地應該就嚟到觀光塔架啦。」子瑜帶頭加快腳步。

「喺前面轉個彎,再行前多三百米就到啦。」Mike望住手上地圖。

「咔啦!」半路,阿鬼踩到地下一隻斷開嘅機械人手臂,發出一下響聲。





喺觀光塔附近一帶都係主要生產自動化機械人嘅工廠,例如有家居打掃機械人、起樓建築嘅機械人,甚至乎軍事用嘅機械人都有。

可惜如今遭受破壞,啲工廠夷為平地。廢墟之中,得返啲機械人殘骸,只有好少數機械人仲保存到完整。

然而,當眾人越接近觀光塔,嗰一股好似古龍水嘅香味就越濃烈。

「咚!」

張醫生突然頭昏眼花,一時企唔穩跪左落地。





佢三個老婆立即將佢扶起。

其他人亦都突然之間腳步浮浮,個頭暈得一陣又一陣。

「點解咁嘅…個頭好暈…」

子瑜按住額頭,感覺天旋地轉,轉下轉下就不支倒地。

「小心…」Mike想伸手接住對方,但係佢自己暈到企唔穩。

「搞咩呀?你地無嘢呀嘛?」反觀阿鬼咩事都無,仲行得企得,非常清醒。

Mike、子瑜、張醫生同埋美國鷹陸陸續續慣低,與此同時,轉角位之處,出現一個藤蔓纏身嘅外星人。

佢就係帝洛斯嘅第三個手下,毒藤蔓獸。





「係毒!嗰啲香味有毒!」美國鷹視線朦朧,但都認得出眼前呢隻外星人。

「你…話…我地…中左毒…」Mike神志不清,差唔多連一句完整嘅說話都講唔到。

至於子瑜已經頂唔順,成個人暈低左,倒臥喺Mike嘅懷裡。

「子瑜…醒…醒…」隨之Mike都雙眼一黑,徹底失去知覺。

連隨張醫生同美國鷹都中毒昏迷。

佢地全部人都四肢發黑,呼吸變得非常微弱。

喺此時此刻,就得阿鬼同張醫生老婆,仲可以保持清醒。





因為佢地係機械人,所以唔會受到毒氣嘅影響。

「係咪你喺度放毒?」阿鬼大聲指問毒藤蔓獸。

對方點點頭:「佢地中左我嘅藤蔓毒氣,再過多三十分鐘,佢地就會一命嗚呼,不過奇怪嘅係,點解你兩個又會無事嘅?」

「廢話少講!快啲交啲解藥出嚟!」

毒藤蔓獸指住心口:「解藥就係入面,有本事就挖開我個身攞出嚟。」

阿鬼招牌式撥一撥自己嘅頭髮:「阿嫂s,呢隻嘢交俾我對付!你行埋一邊,幫我好好睇住其他人!」

三個老婆用佢地嘅三頭六臂,將Mike等人抬去安全嘅位置。

「乜嚟真架?咁你就要記住喎,你只有三十分鐘,」毒藤蔓獸摸摸下巴,「三十分鐘內你殺唔死我,咁死嘅就係你嘅朋友。」





「哼!三十分鐘足夠有突!」

阿鬼摩拳擦掌,表情chok到恆。

之前嘅戰鬥一直都被Mike同美國鷹搶曬風頭,佢早就等左呢個solo嘅機會好耐。