無左隻王牌,喺張醫生場上就得返機械怪人同長毛怪,兩個數值都唔過2000,要打低鐮刀怪,除非有啲好犀利嘅牌出現。

當佢伸手想去抽牌時,Card gamer就話:「等等,我都未出完牌!呢個回合我最後要出多一張,停止對手抽一回合嘅功能牌。」

張醫生抽唔到牌,手上又無曬牌,變相咩都做唔到就要結束回合。

「哈!又抽到靚牌!」

Card gamer抽到「羽毛麟刺」,呢張牌嘅效果係可以同時攻擊一隻或以上嘅怪物。





收到指令,騎住獅子麒麟鳳嘅鐮刀怪,一口氣消滅曬張醫生場上所有怪。

「哈!家陣每人得返兩張牌,睇你都無曬符啦掛!」Card gamer當正自己贏硬。

張醫生心入面都打定輸數,要喺咁嘅形勢下反敗為勝,幾乎無可能。

佢抽埋剩低嘅兩張咭,一張係佢第三個老婆瑤瑤,另一張係融合泡泡槍。

三個老婆三個都喺佢手牌裡面,唔知咁樣算唔算代表左佢地之間嘅緣份?





算啦,依家唔係講呢啲嘅時候,望一望張牌,瑤瑤嘅數值只有100。

至於張融合咭嘅效果,係將三個或以上嘅角色牌融合,問題係佢手上得一張角色牌,根本就派唔上用場。

「唉…」佢無計可施,嘆一口氣,心裡充滿無奈:

老婆、Mike、美國鷹、子瑜,我對唔住你地,我實在無辦法打敗對手…

就喺佢接近放棄嘅一刻,望住張融合咭,忽然間靈機一觸。





好似…好似有辦法反敗為勝…

「我召喚鐮刀怪。」佢先擺張角色咭上擂台,然後再用融合咭。

「哈哈!你場上得一隻怪物,點樣融合呀?」Card gamer輕蔑一笑。

張醫生托一托眼鏡:「規則上,所有效果咭都可以應用於任何嘅角色牌,你頭先將『控制插頭』用喺我隻怪物身上,所以我估計效果咭嘅效力,應該係不限於場上任何一方嘅角色牌。」

講完,張醫生便傳達命令。

場上嘅瑤瑤揸住泡泡槍,噴出兩個泡泡。

一個噴落自己度,另外一個噴去對面場上。

所得出嚟效果,完全應驗張醫生嘅講法,效果咭係能夠應用喺敵我雙方嘅怪物。





經過融合,瑤瑤、鐮刀怪、獅子麒麟鳳、烈焰炮,合體變成一隻奇形怪狀嘅騎呢獸。

「好嘢!咁都俾你諗到!」Card gamer面前無遮無掩,無曬怪物。

張醫生深呼吸一口氣,下令融合獸直接攻擊:「融合獸!直接攻擊!」

融合獸飛身一躍,使出終結一擊。

Card gamer微微一笑,表示輸得心服口服。

扣埋最後一格生命值,遊戲正式結束,Card gamer連同整個虛擬擂台隨之而消失。

全部咭牌恢復返原來嘅面貌,唔單止Mike佢地,連啲外星人都變返做原貌。





由牌變返做自己,大家都有一種重獲新生嘅感覺,連外星人都以佢地各自嘅方式,多謝張醫生解救。

目前,帝洛斯三個手下已經有兩個被打敗,剩低最後一個就守喺觀光塔之下。