穿越時空，冒充平行世界嘅另一個自己，再去呃佢條女上床: （159）

※ ※ ※



得到全角嘅帝洛斯，正身處喺另一個時空，殲滅緊另一個自己。

為左成為最強且唯一嘅存在，佢穿越左去唔同嘅時空，殺死各個時空嘅自己。

去過咁多個時空，除左第一個時空嘅自己係保存到全角之外，其他時空嘅都係斷角狀態。





因此，處於最強形態嘅帝洛斯，可以話「遇神殺神，遇佛殺佛」，將其他帝洛斯殺個措手不及。

只要再解決埋呢個LL-36時空嘅帝洛斯，咁佢就可以達成最後願望。

至於呢個LL-36時空嘅帝洛斯嚟到地球，本來已經搵返隻斷角，但就喺想駁返隻角嗰陣，殺氣騰騰嘅帝洛斯突然出現，而且一嚟就窮追猛打。

「只要隊冧埋你，咁我就唔單止係全宇宙最強，仲要係喺任何一個時空，我都係最強嗰一個！哈哈哈！」帝洛斯揸住雙劍，瘋狂出招。

面對比自己強大一倍嘅敵人，另一個帝洛斯難以招架。佢手執住斷角，一路躲避攻擊，一路想搵機會接合返隻角。





只有達致最強形態，佢先有能力還擊。

只不過，敵人趕盡殺絕，唔俾佢任何還手嘅機會。

「魂裂斬！」 帝洛斯雙刀並齊，揮斬出凌厲嘅劍氣，劈斷對方揸住斷角嗰一隻手。

另一個帝洛斯被逼到絕路，再唔反抗就只有死路一條。

佢谷盡全力，射出絕命衝擊波，殊不知對手用返同樣嘅招式化解。





帝洛斯發出嘅衝擊波，威力更大範圍更廣，就好似大魚食細魚咁，吞噬對方嘅衝擊波之餘，再直接正面攻擊。

「Ahhh！！！」

受到強大衝擊波嘅洗禮，另一個帝洛斯受到重創，奄奄一息咁倒臥喺地下。

「人生最大嘅敵人就係自己，呢句說話真係無講錯，」帝洛斯踩住對手個頭，擺出勝利者嘅姿態，「你依家輸俾‘自己’，我諗你應該都輸得心服口服啦！哈哈哈哈！」

帝洛斯笑聲不止，佢一邊大笑，一邊舉起雙刀，準備出招處決另一個自己。

「就用呢招送你歸西！劍流閃！」

帝洛斯都未斬落去，眼前忽然一閃。

下一秒，當佢回過神，發現對手身上嘅傷好返曬，企返起身不得止，手上仲揸住隻斷角。





頭先佢明明斬左嗰隻手落嚟，點解突然間對方會駁返隻手，連傷口都一下子痊愈？

至於另一個帝洛斯都覺得奇怪，但佢無理咁多，趁呢個機會逃走，兼想駁返隻角。

帝洛斯梗係唔俾對手任何機會，用最快嘅速度突擊，點知眼前又閃過一下亮光。

兩個帝洛斯嘅距離又變得遠左，連隨剛才因戰鬥而受到破壞嘅環境，都無故恢復返原貌。

帝洛斯感到不可思議：發生左咩事？點解時間好似倒流返轉頭咁？

事實的確如此，時間的確喺度倒流緊。

因魔迪加同帝洛斯嘅大戰，令到本來唔應該出現嘅時空裂縫出現左，繼而促使帝洛斯穿梭喺唔同時空搞破壞，造成人命傷亡以及時空混亂。





為左挽救呢個殘局，子瑜嘅上司戴司令親自出馬。

佢嚟到呢個時空，動用能夠扭轉時間嘅法寶，希望依靠時光倒流嘅力量，修補過去發生左嘅悲劇。

件法寶叫做「時間倒流儀」，外形係一個要上鏈嘅舊式鬧鐘，唔同嘅係，個鐘無任何數字表示，只有一支紅色指針。

只要扭動個鐘背面嘅鏈匙，咁支紅針就會轉一圈，隨之時間就會倒流十五分鐘。

而要扭動嗰條鏈匙，係需要消耗好大嘅體力同精神力。

因為要時間逆轉，就要好強嘅能量，並唔係隨隨便便就可以扭得郁。

戴司令獨自漂浮喺高空，望住腳底下嘅兩個帝洛斯，聚精會神，運用全身之力，包括丹田之氣，扭動手上嘅時間倒流儀。

每扭動一下，時間就會倒流十五分鐘。





見住自己手上由有刀變無刀，步伐又不斷倒退，觸覺敏銳嘅帝洛斯已經察覺出有唔妥。

佢知道有人偷偷地喺度玩「回帶」。