穿越時空，冒充平行世界嘅另一個自己，再去呃佢條女上床: （161）

啱啱帝洛斯顧住對付戴司令，忽略左另一個自己，結果俾對方有機可乘，成功接合邪角。

所以呢一刻，另一個帝洛斯就同佢一樣，都已經達致最強嘅狀態。

頭先俾人㩒住砌，另一個帝洛斯條氣好唔順，家陣有機會當然要嚟個大反擊。

「等你收拾你條仆街！」

佢身上散發出嘅邪氣同帝洛斯不相伯仲，一嚟就先使出頭先對方用過嘅招數：「魂裂斬！」





呢下係只有最強狀態先用到嘅招數。

帝洛斯不得不轉移目標，對付另一個自己。

兩個最強狀態嘅外星人展開大戰，戴司令都算係勉強執返條命。

只不過佢雖然大難不死，但就受到重傷，雙手傷到郁唔到，無辦法繼續扭動時間倒流儀。

「砰！Boom！轟！」





兩個帝洛斯勢均力敵，激烈嘅打鬥製造出轟動嘅聲音。

理論上，兩個帝洛斯嘅實力的確好接近，擁有魔怒火焰嘅帝洛斯比對手多出一招，理應稍稍技高一籌，但係捆起上嚟，卻係落於下風。

另一個帝洛斯啱先被人恰到上心口，屈埋好大嘅怨氣，一有機會俾佢反擊，就將啲怨氣一次過發洩曬出嚟。

就係因為呢個原因，令到佢攻擊力有加乘，一開波就jer住對手嚟打：「你唔好得戚架咩！頭先啲氣勢去曬邊呀？」

帝洛斯徹底被壓制，佢估唔到另一個自己攻勢咁凌厲。





相比起佢喺第一個時空遇到嘅自己，眼前呢一個LL-36嘅帝洛斯明顯犀利好多。

前者喺地球一路好和平咁生活，缺乏作戰歷練，而後者就同佢一樣身經百戰，實力絕對毋庸置疑。

「喂！你望邊邊呀？我喺呢度呀！」

另一個帝洛斯以迅雷般嘅速度，繞過帝洛斯背後，然後雙刀狠劈。

帝洛斯一時分心而閃避唔切，成招食到應，幾乎頂唔住訓低咁滯。

另一個帝洛斯得勢不饒人，接住射出衝擊波：「絕命光波！」

帝洛斯慌忙閃避，與此同時，佢眼尾瞄到戴司令手中嘅時間倒流儀，個腦諗到靈光一閃。

下一個瞬間，佢飛出手中兩把刀，先轉移對手嘅視線，隨即佢衝過去喺戴司令手上，搶走嗰一個時間倒流儀。





另一個帝洛斯回過神，就望見對方手執住一個上鏈嘅舊式鬧鐘。

帝洛斯摸住嗰條鏈匙，順時針扭一下。

一開始佢係細細力咁扭，發覺扭唔郁，先再施加更多嘅力。

要逆轉時間，的確係需要能量。

另一個帝洛斯洞察到敵人想出茅招，已經用最快嘅速度衝過去阻止。

可惜都係遲左一步。

眼前閃過一道光，下一秒時間就倒流返去十五分鐘。





帝洛斯再扭多一下鏈匙，另一個帝洛斯瞬間就變返做斷角狀態。

至於時間倒流儀嘅使用者係唔會受到影響，因此帝洛斯依然企喺原地。

相反，另一個帝洛斯就被打回原狀。