穿越時空，冒充平行世界嘅另一個自己，再去呃佢條女上床: （162）

「無論喺邊一個宇宙、邊一個時空，最強只能有一個，而嗰個就係我！」

帝洛斯奸計得逞，呢一次佢再都唔留任何機會俾對手。

佢先出十字殺斬斷對方雙手，再噴射熾熱嘅魔怒火焰，焚燒對方雙腳，令另一個自己喪失活動能力。

「出埋啲茅招，就算贏你都係勝之不武！」另一個帝洛斯手腳盡斷，全身傷痕累累。

帝洛斯俯視對手，語氣輕蔑：「贏就係贏，話人勝之不武，只不過係失敗者安慰自己嘅說話！」





「有本事你就再倒流一次時間，等我地堂堂正正打一場！」

「呵！」帝洛斯冷笑一聲，「激將法無用架！反正我依家就要堂堂正正，親手送你落地獄！」

散發藍光嘅衝擊波逐漸積聚喺手中，最後變到好似沙灘波咁大。

「永別啦！另一個我！」帝洛斯對準另一個自己，近距離放出大招，一擊必殺。

另一個帝洛斯淹沒喺強大衝擊波之中，瞬間消失化成虛無。





最後一個時空嘅自己都死埋，從今以後，帝洛斯就成為獨一無二嘅「帝洛斯」。

無論喺邊個時空邊個宇宙，都無人可以取代佢。

佢就係最強，唯一嘅最強。

而喺另一邊廂，受到剛才時光倒流嘅影響，戴司令原本身上嘅傷不治而愈。

佢家陣匿埋喺隱蔽嘅地方，等待時機搶返帝洛斯手上嘅時間倒流儀。





「哈哈哈哈哈—」

帝洛斯放聲大笑，享受呢種天下歸一嘅快感。

戴司令見帝洛斯掛住喺度笑，以為對方放低左戒心，於是捕捉機會衝出去，想搶返屬於自己嘅嘢。

殊不知，帝洛斯一下就感應戴司令嘅行動。

都未等對方埋身，佢就發出邪氣，令到戴司令失去平衡向後仆。

「乜你搶走呢個鐘呀？」帝洛斯擰轉身，揸住時間倒流儀。

「俾返我！」戴司令立即起返身。

「對唔住，我係唔會俾返你！依家嘅我已經變成唯一，從此舉世無雙，獨步天下！而呢個已成既定事實，以後都唔會改變，亦無人可以改變！」





講完，帝洛斯「good」一聲吞左個時間倒流儀落肚，跟住又話：「不過！如果你真係好想攞返，即管就過嚟打低我！」

「可...可惡...」雖然好想攞返部機，但實力相距實在太懸殊，因此戴司令唔敢出手。

「唔係呀嘛？你淆底呀？我最睇唔起就係你呢啲咁無膽嘅人！真係好丟架，我諗你唔適宜再留喺呢個世界上！」

帝洛斯唔留活口，飛身一刀攔腰斬殺戴司令。

戴司令都未反應得切，就斷氣身亡。

跟住帝洛斯開返著部時光機，立體投射畫面已經無其他時空嘅「帝洛斯」顯示，只得返佢個人一個界面。

「咁快就玩完，真係無癮！」





佢按下環形鍵盤內嘅圓形掣，返去原本屬於佢嘅時空，


※ ※ ※



「呼—呼—」風沙滾滾。

力天奴為左奪回帝洛斯隻斷角，以一己之力，對付Mike、美國鷹仲有阿鬼三人。

佢地第一次碰頭嗰陣，力天奴一個對三個都佔有上風，但今次再碰頭，就完全唔夠打。

因為Mike、美國鷹同阿鬼都變強左。





Mike學曬秘笈十二招，美國鷹就有齊三頭魔龍嗰三支炮，阿鬼變成效能更高嘅軍事機械人。

佢地三個聯手，足夠應付力天奴有餘。

「劍雪漩渦！」Mike揮劍捲動漫天冰雪，吹走飄蕩嘅風沙，將力天奴雙腿冰封。

隨之，阿鬼埋身鉗制住力天奴，最後美國鷹嘅三叉炮對準目標，射出三種唔同嘅炮彈攻擊。

「Boom！」力天奴中到應一應，成個人飛到十幾米咁遠。

佢全身受到重創，而就喺呢個時候，喺佢眼前，出現左佢嘅夢中情人。

「帝洛斯BB？」

無錯，帝洛斯以一個最強嘅形態，從另一個時空轉移返到嚟呢度。





「帝洛斯BB，佢地幾個人蝦我！你一定要同我…」

「收聲！」帝洛斯隨手一刀斬爆力天奴個頭，「講左幾多次，叫左你唔好嗌我BB，真係好撚難頂！」

力天奴個頭碌喺地下，佢用埋最後一口氣，笑住咁講：「能夠死喺帝洛斯bb手上…我…我好開心…」