穿越時空，冒充平行世界嘅另一個自己，再去呃佢條女上床: （164）

最強狀態果然非浪得虛名，帝洛斯雖以一敵四，但卻佔盡上風。

「Mike、美國鷹，我嚟做掩護，你地後上攻擊！」阿鬼手腳分離，圍住帝洛斯嚟攻。

帝洛斯見招拆招，單手輕鬆捉住阿鬼帶刀刃嘅手，跟住毫不留情一下捏碎：「係玩雜耍就去馬戲團啦！」

阿鬼重新組合返自己嘅身體，並瞬間轉移，用最快速度從後襲擊。

點知對手嘅速度更快，佢都未出手，帝洛斯轉身一刀將佢攔腰斬開兩截。





「砰！」喺呢個時候，美國鷹舉槍發炮，幫阿鬼解圍。

腐蝕炮彈、散彈激光，仲有破壞死光，化成三條唔同顏色嘅拋物線直逼帝洛斯。

「哼！雕蟲小技！」帝洛斯以靈活嘅身法，避開曬全部攻擊，更出言挑釁，「咁嘅三腳貓功夫就想同你朋友報仇？發夢啦！」。

「You shut up！」美國鷹瘋狂開炮，密集嘅激光同炮彈，好似落雨咁猛轟帝洛斯。

但帝洛斯居然用阿鬼作護盾，將所有炮彈、激光一一擋下，然後雙刀合十，飛身突擊。





佢嘅速度快到根本肉眼都睇唔到，好在美國鷹身上有能令時間靜止嘅天線。

敵人一進入三米範圍內，就立即定格郁唔到。

無論帝洛斯幾犀利都好，一樣係無法突破三米領域，兼且仲要成個人被反彈走。

「Mike！係機會啦！」美國鷹大嗌。

趁住帝洛斯露出破綻，一路等候時機嘅Mike撲出嚟出絕招。





「天誅！破夜斬！」佢手上嘅長劍，閃耀住刺眼嘅白色光芒，由上而下奮力一劈。

「鏘！！！」

帝洛斯雙刀交叉喺頭頂隔擋：「呢招有啲料到喎。」

Mike咬實牙關，傾盡全力斬落去，刀身發出越嚟越耀眼嘅光芒。

呢一招嘅威力的確好厲害，帝洛斯成個人向下沉，雙腳壓穿左地板。

「魔迪加，輪到你出招啦！」Mike示意。

「好快！再等多陣！」喺三個Mike對付帝洛斯嘅時候，魔迪加並非袖手旁觀，而係喺度儲氣。

佢將全身嘅惡魔之氣結聚喺幽魔之刃上，準備擊殺出全力一擊。





「頂！」帝洛斯估唔到自己竟然會落於下風。

佢受限於Mike嘅攻擊，家陣難以隨意郁動。

與此同時，魔迪加已經儲夠氣。

佢以最強嘅力量，加上最快嘅速度，由側面將尖利嘅劍刃捅過去：「你受死啦！」

帝洛斯釋放出源源不絕嘅邪氣，令身體嘅機能提升到100%。

魔迪加用盡所有力氣，卻無法刺破敵人嘅身體。

美國鷹同埋得返半個身嘅阿鬼，都一齊上前圍剿帝洛斯。





美國鷹仲攞埋嗰隻原本屬於帝洛斯嘅斷角出嚟，衝埋去隊佢。

「你班垃圾以為咁就可以打低我！太天真啦！」帝洛斯頭頂上嗰隻完整嘅邪角，釋出狂暴嘅氣息。

呢一刻嘅佢已經突破極限，力量超越100%。

喺佢手上嘅兩把邪合劍瞬間由守轉攻，猛烈揮斬，劃出一個死亡交叉。

「噼啦」一聲，劈斷左Mike手上嘅長劍。

隨即佢接連使出各種劍招，包括「劍流閃」同「十字殺」等等，以快、狠、准嘅攻擊，打到Mike佢地落花流水，一仆一碌。

阿鬼嘅機械身體，得返頭同左手仲郁到，其他部分唔係失靈就係破損。

美國鷹傷得唔算重，係嗰碌三叉炮，同埋嗰條令時間靜止嘅天線，統統被劈到粉碎。





而魔迪加嘅身上就刻住一撻撻疤痕，呢啲都係被帝洛斯斬傷嘅痕跡。

至於Mike就傷得比較重，佢左腳被斬傷，傷口大量出血，另外，右手幾隻手指都斷左，痛到不得之了。