穿越時空，冒充平行世界嘅另一個自己，再去呃佢條女上床: （163）

見到帝洛斯出現喺眼前，眾人嚇左一跳。

「帝洛斯！乜你終於肯蒲頭啦咩！你殺死左阿榮，我要同佢報仇！」美國鷹雙眼充滿怒火。

「阿榮？邊q個阿榮？」帝洛斯表示零印象。

「你穿越時空，喺一個遊戲嘉年華入面大開殺戒，我個朋友阿榮就係俾你殺死！」

「哦～你係講緊呢單嘢，咁睇嚟嗰個一路打機，把口一路講唔停嘅木嘴，就係你個朋友。」





帝洛斯諗返起：「嗰條友話佢個朋友搞佢老婆，莫非佢講嘅就係你？」

「收聲！呢啲唔關你事！」

「呵！不如俾我送你一程，等你落去同你朋友賠罪啦！」帝洛斯面目猙獰，萌生殺意。

同時間，一班矮仔外星人感應到帝洛斯嘅氣息，不約而同咁飄埋嚟，並包圍住四方八面。

之前有班外星人想搞對抗，但已經俾班矮仔外星人收拾左。





其中一個矮仔外星人行到帝洛斯面前，斟左兩句。

帝洛斯聽完，大吃一驚，視線轉移即刻到Mike身上：「咩話！！！我個賤人老豆仲未死！點解會咁架！」

帝洛斯嘅眼神變得極度可怕，嗰種咄咄逼人嘅殺氣，令到Mike以及佢身邊嘅人心臟幾乎停止。

「真係估唔到，個賤人居然將元神轉移到條蟲嗰度！既然係咁，咁我就要劏開你個肚，攞條蟲出嚟！然後徹底消滅我個賤人老豆帝尼爾！」

帝洛斯嘅怒氣一發不可收拾，又將全部矮仔外星人吸收返到自己嘅身體。





之前喺其他時空嘅戰鬥中，佢所受嘅一啲傷，全部一次過好返曬。

呢一刻帝洛斯狀態正佳，佢揮動雙刀，以電光火石般嘅速度，向住Mike衝埋去。

一路靜候時機嘅魔迪加，喺呢個時候殺出嚟，半途攔截：「帝洛斯！你嘅對手係本大爺我呀！」

「乜你條爛坦都仲未死！」

「喺打敗你成為宇宙第一之前，本大爺點會咁容易死！」魔迪加手執利劍幽魔之刃，同對手對劈。

「哈！你見唔見到我頭上隻角！我依家係最強狀態，而你只係無左對眼嘅喪家之犬，你唔係以為可以打得敗我下話？」

「就算本大爺無左對眼，都一樣打得低你！」

「即管睇下點！」





之前仲係斷角嘅帝洛斯，喺速度上同魔迪加不分上下。

只不過今時唔同往日，依家嘅佢係最強狀態，速度完全喺對手之上。

佢嗰兩把刀快到睇唔到，令人眼花繚亂，可以話徹底壓制對方。

「鏘！」幾下攻擊，雙刀就狠狠劈斷魔刃。

下一秒，帝洛斯使出魂裂斬，將魔迪加打落地下一個大坑嘅最深處：「真係不堪一擊！」

「咪咁得戚！仲有我地呀！」美國鷹向住帝洛斯，射出三頭魔龍嘅三叉炮。

腐蝕炮彈、散彈激光炮、破壞死光炮，三砲齊發，帝洛斯則以招駁招，用佢嘅衝擊波對撼。





至於Mike已經召喚出獅子麒麟鳳，加入戰團。

佢知道帝洛斯將自己視為目標，因此唔可以坐以待斃，選擇主動出擊。

而阿鬼當然都幫拖，出招一齊對付Boss。

「哈！你地以為人多就可以蝦人少？我帝洛斯未驚過！最好就叫埋我個仆街老豆出嚟，等我一次過收拾你地全部人！」

儘管被三人圍攻，但帝洛斯卻神態淡定，對自己充滿自信。

Mike騎住獅子麒麟鳳，使出修羅怒衝，點知帝洛斯輕鬆避開之餘，更將全身邪氣聚集喺刀鋒上，然後直刺落神獸身上。

呢一招帝洛斯之前從來無用過，叫做「邪刀殺」。

獅子麒麟鳳全身即時四分五裂，從五六米嘅半空中急墜落地下。





騎喺上面嘅Mike連隨失控墜埋落地，好在高度唔係好高，咁樣跌落嚟死唔去。

「冥殺斬！」另一邊廂，魔迪加從深坑中一躍飛上天。

佢手上嘅魔刃閃出暗黑光芒，只要仲剩一啖氣佢都會繼續戰鬥。

Mike起返身之後，繼續同美國鷹、阿鬼，連同魔迪加奮力對抗帝洛斯。

子瑜同張醫生佢地幫唔咩手，只有企埋一邊旁觀。

佢地睇得非常肉緊，子瑜更默默喺心入面祈禱，希望Mike一定要打贏強敵。

然而突然之間，觀光塔頂出現左一啲嘢，吸引左子瑜嘅目光。





塔頂之上，有一架懸浮嘅軍艦穿過時空裂縫，喺軍艦上面係一班時空使者。

佢地帶住最強武器嚟到呢度，決心要消滅帝洛斯。