子瑜抹走眼淚,睄一眼陳總司令手上嗰個古舊嘅鬧鐘。

帝洛斯口中嘅時間倒流鐘,應該就係對方手上嘅舊式鬧鐘。

如果時間真係能夠倒流,咁Mike佢地就可以復活...

呢個時候,子瑜心中萌生一個念頭。佢要搶走嗰個時間倒流嘅鐘,不過唔可以暴露出意圖。

於是只係匆匆望左一眼,佢就好快轉移視線。





單憑佢一己之力,係無辦法正面從對方手上搶走個鐘,只能夠揾機會突襲。

陳總司令連同班時空使者,仔細檢查過後,證實帝洛斯已經死左。

即係話,呢個邪惡嘅外星人,以後都無得再去其他時空搗亂,一切總算回復返平靜。

「終於都搞掂呢個爛攤子!」陳總司令放下心頭大石,隨即下令啟程返去總部。

一眾時空使者收到指示,登上軍艦,準備出發回程。





「33568,你仲唔行?」陳總司令催促子瑜上船。

「弊!你地帝洛斯仲未死!我見到佢啲手手腳腳仲郁緊!」子瑜講大話。

「無可能!我地檢查得好清楚,帝洛斯絕對係已經死左!」陳總司令回應。

「佢個人死左,但手手腳腳仲郁緊架!話唔定佢有再生能力!」

聽完子瑜咁講,陳總司令感覺唔放心,因此再帶班時空使者落返船,然後將帝洛斯被炸到散開嘅手手腳腳集合一齊,再重新檢查一次。





一班時空使者行喺前面,陳總司令就殿後。

佢地一落船,子瑜就趁機會掹槍,偷襲陳總司令。

「你地唔好埋嚟!一埋嚟我就開槍!」

「33568,你咁係咩意思?」陳總司令嘅太陽穴被子瑜嘅槍指住。

「司令,只要你將嗰個時間倒流鐘交俾我,咁我就保證唔傷害你!」子瑜提出要求。

「你要個鐘想做咩呀?」

「我只係想Mike復活。」

「唔得!咁難得先打敗帝洛斯,點可以因為你嘅私人感情而逆轉時間!總之個時間倒流儀,係一定唔會交俾你!」陳總司令嚴厲拒絕,並且作出反抗。





佢一個轉身,批踭攻擊子瑜。

「砰!」

結果支槍走火,射中陳總司令嘅小腹。

子瑜雖然係無心開槍,但既然對方都冧低左,佢就趁機會擸走嗰部時間倒流儀。

「司令對唔住!Mike係我好重要嘅人,我唔可以俾佢就咁離開呢個世界!」

子瑜擸實個鐘,轉身逃跑。

陳總司令掩住傷口,命令所有時空使者追捕子瑜:「追!同我搶返個鐘返嚟!」





子瑜亡命逃跑,同時間扭動倒流儀背面嘅鏈匙,卻發現扭極都扭唔郁。

要逆轉時空,畢竟係需要強大嘅能量。

假如子瑜無嗰份力量,咁係無辦法令時間倒流。

十幾個時空使者踩住飛翔滑板,一下子就追上嚟。

「33568,你走唔甩架!你唔再唔停低,我就開槍!」其中一個時空使者就嚟追到子瑜。

子瑜唔理咁多,繼續奮力逃跑,而佢出盡力都只係擰到條鏈匙移左少少位。

「砰」一聲,嗰個時空使者真係開槍。

子瑜跑跑下,突然間背脊中左一槍,隨之佢成個人跌低左。





背脊嘅槍傷令佢痛苦萬分,但佢不顧一切,就算跌低左、受左傷,佢都要逆轉時間。

嗰班時空使者隨即洶湧而上,衝去搶返嗰個時間倒流儀。

「唔可以…Mike唔可以就咁死…我一定要救返佢...」子瑜強忍痛楚,用盡全力揸實個鐘,死都唔肯放手。

佢捏住條鏈匙,用力係咁扭,兩隻手指都扭到損曬出血。

嗰十幾個時空使者圍住佢搶嗰部機,佢地唔到子瑜會咁頑強抵抗。

「我同Mike仲有好多說話未講…仲有好多嘢未做…所以佢唔可以就咁離開我!」

「唔可以!!!」





就喺個鐘俾搶走,而就嚟甩手嘅一瞬間,子瑜耗盡所有心力同體力,終於成功將鏈匙擰左一圈。

鐘面上嘅紅色指針快速轉動一個圈,代表時間要倒流返到十五分之前。

儘管只係短短嘅十五分鐘,但已經足夠。

十幾個時空使者好似播片回帶咁逆行倒退。

除左子瑜之外,喺呢個時空嘅所有嘢及所有人,都會倒退返去十五分鐘之前。

亦即係大爆炸發生之前。