穿越時空，冒充平行世界嘅另一個自己，再去呃佢條女上床: （177）

雖然受左重傷、身體又郁唔到，但Mike都好集中注意力去觀察對手，希望揾出破綻。

佢望住帝洛斯小腹轉動嘅指針，靈光一閃，喺腦海之中，出現一啲諗法。

「我仲剩一啲邪氣，陣間一有機會，我就帶魔蟲脫離你身體。」

帝尼爾同Mike講：「魔蟲自身有自爆嘅能力，雖然威力唔大，不過假如加埋我嘅邪氣，或者可以博一博。」

Mike尊重帝尼爾嘅決定，而佢繼續保持專注，一路觀察住帝洛斯。





佢等緊一個機會。

一個可能會逆轉局面嘅機會。

呢一刻，帝洛斯佢地打到七彩。

準確啲講，應該話魔迪加同十幾個外星人，被帝洛斯打到七彩。

帝洛斯自身嘅實力再加倒流時空嘅能力，幾乎可以話將對手玩弄喺股掌之中。





當敵人圍攻自己，帝洛斯就令對手時光倒流，返到去出招前嗰狀態，跟住自己再逐一去擊破。

一輪乒鈴嘭唥嘅激戰，結果十幾個外星人加埋魔迪加，都不及一個帝洛斯，統統都被打低。

然而對戰過程中，帝洛斯背脊同手臂受左啲傷，不過就無乜大礙。

此刻嘅Mike高度集中，就等待緊嗰一個逆轉嘅機會。

「你呢隻死烏蠅，今次我要徹底收你皮！」





帝洛斯使出「魂裂斬」，將死纏爛打嘅魔迪加打落地底嘅深坑，

Mike注視嘅眼神俾對方發現，帝洛斯出言挑釁：「係咁望住我做咩？係唔係好忿氣！係嘅話過嚟打我呀？哈哈哈！」

MIke身體郁唔到，亦都無出聲，只係靜候緊機會。

帝洛斯慢慢向住MIke行過去，準備了結埋Mike同佢老豆，同時間又留意到自己身上有傷。

於是佢喺自己身上再次使用時間倒流，將受傷嘅身體變返做無傷無痛嘅狀態。

「帝洛斯！本大爺仲未死呀！」

跌落深坑嘅魔迪加含住一口氣，縱身跳返上嚟地面。

佢一隻手、一隻腳，兩隻翼都斷曬，儘管如此都仲唔肯認輸。





學佢話齋，只要仲有一啖氣，都唔會就此罷休。

帝洛斯嘅注意力又轉移到魔迪加身上，至於小腹上嘅指針就嚟轉到一個圈。

呢刻機會嚟啦！

Mike深呼吸一啖氣，舉起流血受傷嘅手臂，伸出兩隻手指。

用埋全身最後嘅力氣，佢向住帝洛斯嘅小腹上嘅指針，發射出「爆裂旋風」。

旋轉嘅暴風準確無誤命中指針，立即擾亂左指針嘅轉動。

本來帝洛斯只係想支針轉一個圈，結果家下一瞬間轉多左成幾十個圈。





第一下身上嘅傷好返，但之後佢嘅身體出現劇烈變化，一路係咁「回帶」，倒退返去之前嘅狀態。

帝洛斯驚恐不安，第一時間捉住頭頂嘅惡邪之角，殊不知下一個瞬間，完整嘅角變返做一隻斷角。

皆因時間喺佢身上不斷倒退，一直倒退返去更早之前。

「可惡！！！」帝洛斯咆哮大叫，出手強行制止令指針停落嚟。

就喺呢個時候，帝尼爾所附身嘅魔蟲睇啱機會，從Mike口中飛出嚟，跟住直接飛去帝洛斯口入面：「仆街仔！我嚟同你死過！」

一滑入喉嚨，帝尼爾就啟動魔蟲嘅自爆能力，「Boom」一聲，立即炸爆左帝洛斯條氣管。

帝洛斯極之痛苦咁掩住喉嚨，想嗌但出唔到半點聲。

「魔迪加！出招啦！」Mike高呼大嗌。





「帝洛斯，你嘅死期到啦！」

魔迪加單手舉刀，將全身所有嘅魔氣，包括自己最後嘅力量，集合喺刀鋒之上。

「本大爺先係宇宙最強！！！」

高聲一呼之後，魔迪加對住帝洛斯嘅頭奮力一劈。

帝洛斯雙手掩住喉嚨，無法出手還擊，亦都嚟唔切再將時間回流，就咁眼白白望住幽魔之刃兜頭劈落嚟。

「冥！殺！斬！」

帝洛斯成個頭爆開，連隨身體全部四分五裂。





結束啦，最強敵人帝洛斯終於被打敗！