[微血腥] 覺能之戰 (逢二、四、六更新): 覺力賽篇第十三章: 慘敗 (一)

終於來到覺力賽的第五天，開始下一場比賽前，梓旻一眾人又約在O隊辦公室作最後討論。除了梓旻，其他四人早已到辨公室，詡拍拍腰背說道：「嘩，連打兩日都幾辛苦，有啲腰酸背痛。」

楓舉起雙手，展露她那有點肌肉的手臂：「我咩事都冇。」

詡又再恥笑道：「係個腦有事嗻你！不過不嬲都short short 地。」

「詡！」樺有點責備意味的望向詡，接著看到正進入辦公室的梓旻，揮手大叫：「梓旻嚟喇！」

「Hi！」梓旻也揮手回應





「Hi！今日好似幾精神喎！」詡搭著梓旻的肩膊道

「咁咪好囉！今日仲要打第二場！」美慧拿著水杯從會議室方向走來

「今日你屋企人嚟唔嚟？」楓突然問，似乎她仍然對梓旻的家人相當好奇

「唔嚟喇。要返工。」梓旻的答案讓楓有點失望，梓旻問：「今日我地第幾節？」

「第三，你唔會想知自己對邊個。」美慧搖搖水杯說





「但我有需要知。」梓旻有點煩躁

「係盲妹一隊。」美慧說了號他不認識的人物

「盲妹？」梓旻及詡一同問

「你冇聽過？呀！唔記得你地隊係與世隔絕。」美慧的話有點激怒了梓旻及詡，她洋洋得意的笑話：「佢嘅大名連我地研究組都有聽過，T隊成員，最出名係雖然盲，但佢嘅念力感應比冇盲嘅人出色。佢可以感應約莫半公里內移動嘅生物，缺點係只可以念力移動一米內嘅小型物件，但佢以神準嘅射擊克服咗自己嘅缺點。」

美慧拿出手機，上到了內聯網找出盲妹的相片，盲妹的皮膚很白，圓圓的臉上有少許雀班，雙眼緊閉著，鼻少許高，還有少少的嘴巴，不論身高的話，她應該算是嬌小可愛型。





「我唔明點解佢唔叫醫療隊醫返佢對眼，咁佢就可能可以更進步啦？」楓無知的問一個大家都知道答案的問題

當樺準備回應楓的問題時，一把頗洪厚的中年男人聲從高級隊長室傳出來：「你呢條問題真係蠢⋯」

眾人立即往高級隊長室看，亞塵剛完了與浩政的會議走出來：「AP醫療嘅力量係唔係神藥，唔係萬能。有啲嘢永久受損，就永遠都唔可能好返。所以你要清楚了解明白到，有啲嘢係返唔到轉頭，冇咗就係冇咗，唔會有奇蹟。你應該要係你仲有得揀嘅時候諗清楚！」

亞塵大概又再打算叫梓旻轉到後援的位置，詡立即反抗：「我諗佢已經諗得好清楚！」

亞塵冷笑一下，道：「由一個成日偷懶、自大又叛逆嘅死𡃁仔講出口真係特別有說服力，我諗就算你媽唔講，你爸都提醒過你好多次唔好加入啦！你加入都只係因為太悶搵嘢玩，睇唔出你有諗得清楚。」

然後，亞塵轉向梓旻說：「梓旻，你癡埋佢度冇好處。」

這時美慧突然雙臂交叉，站在亞塵面前說：「我覺得佢地知道自己應該點做，唔使聽你講。」

「哈哈哈，又多一個黑人憎嘅小朋友！撇除你把口，佢地可以學到你咁聽亞爸勸唔入先峰就好。」亞塵大笑道：「唔同你幾個小朋友癲。梓旻，諗清楚條路應該點揀！」





亞塵離開後，梓旻疑惑的看著美慧，問：「你亞爸又咩人，點解佢識曬你地啲亞爸亞媽嘅？(望向楓及樺) 佢仲識邊個亞爸亞媽？」

「冇，唔識。」楓及樺邊搖頭邊回答

「唔知佢，我爸媽就同佢識咗好耐。」詡不知從何拿了一包芝士薯圈

「關你咩事，傾返比賽啦！今次盲妹同你地隊阮超同麗瑤一隊，你地今次知唔知啲佢地嘅嘢吖？」美慧立即轉話題