連環輪回不幸事件: 第五章：真相 (3)

「check到未？」TB問。
「等等……234X。」Bosco回應。
我哋四組都決定搭巴士唔搭地鐵，原因我諗唔使多講。
「雖然有咗目標有咗方向，但具體其實應該點做？」SK喺等車嘅期間終於展開對話。
「捉個利迷打獲佢，叫佢講曬佢知嘅野。」我笑道。
「捉咩利迷呀？」TB問。
「俾錶我哋嗰個呀。」我回復。
「吓？即係咩呀？」TB追問。
「利迷即係足球球隊利物浦fans嘅意思。」我唔記得女仔可能唔熟足球。
「我知利迷點解呀，我意思係做乜無啦啦要捉一個利物浦fans。」




「我係指俾錶我哋嗰條友呀！掛住條佛珠喺心口嗰個！」我講完之後發覺佢哋三個都面露疑惑，一再探究之下我哋先發現原來我哋所遇到嘅人不論外觀性格都各有不同。
「球迷，OL，大叔……完全冇共通點。」Bosco道。
「咁唔一定關事嘅，可以係個人喜好架啫。」SK道。
「吓，但我覺得關事喎。」TB道。
「咁我又冇話一定唔關。」SK道。
「但你覺得點解關事呢？」Bosco問。
「唔知呀，我唔知點講，但我覺得真係關事架！」TB一個冇說服力嘅回復。
「咁我哋留意下啦。」Bosco打圓場。
搭車嘅時候，我哋大致討論咗要留意嘅事，調查範圍，目標人物等等。荃灣有兩個負責派陀錶嘅人，TB同SK嗰個係OL裝束，Bosco嗰個係背心短褲人字拖大叔；而其他人都係呢兩個人負責派陀錶。原來荃灣眾人會分兩條路去地鐵站，Bosco、Andy、黑仔、阿寶就係行大叔睇嘅嗰條路，其他人就行OL嗰條。順帶一提，Andy上次搭的士都有特登搭去搵大叔拎錶。
 




「搵人係首要目標，因為直接對話成效最大，得到嘅資料應該最多。」Bosco漸漸成為小組領隊。
「不過要小心唔好驚動其他人，同埋要小心睇下有冇同伴。」TB細心地作出補充。
「仲有唔好太暴力。」我喺冇咩意見嘅情況下都搵啲野講下。
「唔會啦，我斯文人黎。不過佢哋唔知係咪真係幫我哋，可能只係一個實驗。」SK道。
「吓？咁你覺得係咩實驗？」我問。
「唔知呀。不過我哋應該係白老鼠。」
「咁你會唔會忍唔住打佢哋架？」
「唔會啦，我唔會因為咁而嬲，何況打人？」
咁都唔嬲？我唔知佢認真定講笑，定認真地講笑，不過有時覺得佢諗法都幾唔大眾。之後我哋都係閒聊幾句，直到落車，我哋就兵分兩路，我同SK去搵大叔，Bosco同TB就搵OL。當然，我哋已經再次交換電話啦。
「其實你覺得我哋係咪真係會搵到線索，之後返番去正常嘅世界？」我忍唔住問SK。




空氣再度被殺，冇人知道問題嘅答案，唯一可以做嘅就係嘗試......