連環輪回不幸事件: 第六章：調查 (1)

「唔知架，不過有機會成功嘅咪試下去做囉。」SK總係有一種毫無危機感嘅感覺，但又有一種安全感喺佢身上。
「你好似真係一啲都唔擔心唔驚咁。」
「痴線，咁嘅情況點會唔擔心。」
「但完全唔覺得你似喎。」
「吓？咁我應該點呀？」
我都唔知點應佢好，唯有扯開話題，專注講返大叔嘅特徵，傾下搵到佢之後要點做之類。
我哋喺南豐中心附近兜咗兩個圈，莫講話大叔，連攤檔都唔見多個。
「你肯定係呢度？」
「喂，我行咗幾多次呀？會唔會記錯？可能佢走咗啦。」
其實我都知冇可能錯記，不過咩都搵唔到，唔知點好。無助絕望時，就會想製造希望，儘管係幾咁唔合理。




「打比佢哋問下囉。」SK建議。
「都好嘅。」講完之後我就撥咗個輪，希望可以製造希望。
「喂。」一把男聲由電話傳出。
「我係Keith呀。你哋搵唔搵個OL呀，我哋連攤檔都見唔到。」 
「Sorry呀，唔記得打比你哋。我同TB人就搵唔到，不過個攤檔就仲係度，我哋仲搵到啲野，跟住掛住自己研究，唔記得打比你哋。」聽得出Bosco有少少興奮。
「咩黎？」
「總之你哋過黎先啦，我哋喺綠楊新邨L座附近。」
問咗SK，知道佢識行之後，就覆埋最後呢句。
「緊急關頭都賣關子！得啦，過緊黎。」之後我哋就急步咁行過去，去睇下呢個新的希望。
 




「人生短暫，
   一瞬即逝，
   存亡之間，
   只靠陀錶。」
「咩意思呀？」我哋會合咗Bosco佢哋之後，佢哋就將喺攤檔搵到嘅一張紙比我哋睇，紙上就只有呢四句。
「我哋都未知係咩意思呀，但感覺好差，講到好似就死咁。」TB回覆我。
「通知咗其他人未？」SK問道。
「嗯，係group講咗。」Bosco回覆。
我慣性都拎一拎電話出黎，download咗張圖，然後繼續研究。
「表面睇應該係要我哋拎隻錶，唔拎會死，而呢一點都符合我哋所知。」我提出見解。




「同意，不過唔知有冇咩深層意義。」Bosco道。
「不如我哋試下再搵下有冇其他線索？」TB建議。
「都好。」我和議之後大家就再喺附近行咗個圈，亦都有再搜查多次個攤檔，不過冇咩發現，唯一有啲出奇嘅就係原來都有少數人見過個OL，因為比較突出奇異，睇到嘅人都比較深刻。
「我仲以為除咗我哋冇人見到佢哋添，通常呢個靈異故仔都係咁架嘛。」我道。
「咁都好，可能其實我哋身處嘅世界並唔係我哋想像中咁恐怖。」SK道。
唔知係唔係因為「普通人」都睇到OL為我帶來咗一種平常感，或者係習以為常，或者係因為有新線索，又或者全部都係，我得到一種安全感，一份安慰，我開始唔再怕，直覺話我知我哋會冇事，一定冇事。
我哋都唔太諗到呢四句究竟仲有冇其他意思，正當傾緊之後點做之際，熟悉嘅whatsapp鈐聲響起，我哋四人同時拎出手機，一睇，我哋就馬上起行，去返集中地——深水埗m記。