他給了我一份正式合約。

「都等我解釋一下,有幾點你需要知道。

第一係保密條款,即係我頭先講嘅嘢。我地會俾另外一部手機你作為工作用途,所有公事喺嗰度講。即使你要執行任務,你都必須首先返嚟總部,交低私人物品,直至完成任務。

第二係你嘅保障。雖然殺人犯法,但係政府秘密批咗殺人牌俾我地,所以你放心,唔會有法律責任。至於保險方面,萬一你喺任務途中身亡,賠償金額會係一個足夠你屋企人安享餘生嘅數目。

第三係工作細則。有任務嘅日子,你係唔可以請假,除非有好特別嘅原因。無任務嘅日子,你有時需要返嚟訓練,不過時間十分彈性。一個任務唔一定一日完成,而事實上大部份任務都係半夜進行,所以你要有定心理準備。至於詳情,一概交俾負責跟你嘅殺手同你夾。





至於其餘條款無乜特別,我交俾你自己睇。無問題喺呢度簽個名,咁你就正式成為我地既見習殺手。」

我很用心的閱讀整份合約,應該沒有魔鬼細節,便正式簽署了。

「歡迎你加入。而家要幫你安裝追蹤同監察器。」

我給他帶進一間類似手術房的東西,然後他把一個十分微型的機器安裝在我的身體裡。我想不到原來有些這麼先進的科技。

「搞掂,請你聽日十點返嚟,你會正式同你嘅mentor接觸。」





「唔該晒……」

於是我便打算離開公司,不過他又截住我。

「搜身。確保你冇偷偷錄影或者錄音。」

我一邊被他搜身,一邊問:「係呢,之前最終無見成工嗰啲人,你地點樣確保佢地唔會同人講嚟度嘅嘢?」

「每個招聘廣告喺一個人打嚟查詢之後就會刪除。當無真憑實據嘅時候,你講咗都唔會有人信,係咪?」





又真的是無從辯駁……

通過他的搜身後,我踏出了公司。真是想不到,我居然會做了個見習殺手,不知道會是個怎樣的經歷呢?

帶著半點期待和半點擔憂,翌日我帶著個黑眼圈回到公司。剛剛踏入公司門口,便有一個比昨天那個人更健碩的壯漢跟我說:「嚟緊三個月會係我跟你,叫我忠哥。」

「你好忠哥,我係阿明……你點知係我嘅?」

「有做資料搜集咪知囉,第時出任務都係咁,唔係殺錯人就大鑊。」他笑笑說。忠哥給我的感覺好像比昨天那個人沒這麼嚴肅。「細佬,望下嗰塊牌,知唔知佢講乜?」他指著那一塊「未知死,焉知生」的牌匾說。

「我印象中嗰句唔係咁……?」

「未感受過死亡的威脅,點知道生存嘅可貴。」他開始解釋。「我地大部分人每一日都係度虛渡光陰,浪費生命。如果你未搵到你生存係為乜,咁你同一個死人嘅分別,就只係你每日都浪費緊資源。細佬,你不妨問下自己,你每一日係度做緊乜?」

我不懂也不敢回應他,因為我正正就是他口中那些不知道自己生存是為了什麼的廢物。





「我夠膽講,呢度嘅每一個人,比起絕大部分人都更加珍惜生命。希望接下來呢三個月,你會更加體驗到生命嘅意義。好啦,我地正式開始今日嘅行程。」
已有 0 人追稿