是咁的，我做咗份好奇怪嘅intern: 第四章

見習殺手第一天的行程，就是學習最有效的殺人方法。

「殺人唔係折磨人，所以我地要一擊斃命。」忠哥開始介紹，然後遞給了我一把短刀。

「好簡單，對準條頸，一下切落去。唔好有任何猶疑。千祈唔好嘗試拮心臟，因為心臟有肋骨保護住，割頸就得。」

「我想問……係咪通常都淨係用刀？會唔會用飛鏢之類嘅嘢？」

「我地係殺手，唔係忍者。」他無奈地笑一笑，然後繼續說:「不過當然我地都唔係淨係用刀，殺人有好多種方法，另外一種都比較常用嘅係毒殺，不過毒殺無乜特別嘢教，始終都係教你用刀先。」





他抬了一個假人出來，然後示範了一次如何割頸。「嚓」的一聲，一大堆紅色液體從假人裡噴出。

「其實好簡單，只係你有無決心割落去。」

他抬了另外一個假人出來，然後叫我嘗試。「到你。」

我心知肚明面前這個只是假人，因此也沒有多想，便按著忠哥的教導，照辦煮碗割下去。紅色的液體再次流出。

比我想像中逼真。殺人就是這麼的一回事嗎？手起，刀落，完。





「做得幾好，不過你揸刀嘅方法唔係咁啱。」忠哥耐心地糾正我。大概過了一個小時，刀殺訓練正式結束。

「食個飯先，返嚟再繼續。想食咩？」
＊＊＊
我們最終叫了外賣，忠哥說不想我們的談話內容被外人聽到。

「係呢，我想問之前有幾多個實習嚟過？佢地最終有無選擇加入？」趁著這個機會，我想對這份工作了解多點。雖然已經正式入職半天，但感覺還是不太真實。

「我地三年前開始請實習，你係第四個。前面三個有一個最終加入咗我地，有機會介紹你識。女殺手，少之又少。」忠哥說。「你係我帶嘅第二個，好希望你三個月之後真係明白生命嘅意義。」





這裡竟然有女殺手？我有點好奇她會是個怎樣的人。

「點解好似咁耐以嚟都冇乜見過其他人？除咗同我面試嗰位之外，就淨係見過你。」

「出任務大部分時間都唔使留喺公司，無任務嘅日子又可以放假。如果唔係要帶住你，我都係大概一星期先返嚟一兩次。仲有，同你面試嗰位係我地老細，叫基哥。」

「但係真係有咁多人要殺咩？同埋啲人係點樣知道呢度有殺手服務？」

「後者係秘密，就連我都唔太清楚。不過前者，係。」他的眼光變得有點冷峻。

我見他這樣回答，也不好意思糾纏下去，便趕快把剩下的飯菜塞進口中，繼續下午的練習。

「而家要練嘅係藏身。隱藏自己，然後突襲，係我地常用既招數。」

我們轉移到一個較偌大的空間。「藏身嘅地點，不外乎係門口或者轉角位……」





我以為是比較容易的練習，居然練了我一整個下午。

「唔好成日偷望！」忠哥嚴厲的說。「你凸個頭出嚟好明顯！好好運用聽覺，感受目標喺邊。」

好不容易通過忠哥這關，終於完結了今天的訓練。

「咇！」忽然我和忠哥的電話同時響起。我們都收到同一條訊息和一個檔案。

「任務決策人: 忠

任務執行者: 忠、晴、明

任務限期: 十日」





「咁快有任務……OT，研究埋先放工。」忠哥跟我說。

既緊張又期待。到底第一個任務會是怎樣？