是咁的，我做咗份好奇怪嘅intern: 第六章

「要使開目標人物嘅屋企人。」阿晴說，語氣依然冷酷。

「無錯。阿明，今次係第一次任務，等我解釋多少少。我地做殺手，除咗要擊殺目標之外，亦都要盡量唔好影響佢身邊嘅人，所以每一次除咗目標人物資料，我地亦都會提供埋其他相關人士嘅資料，以便作出最合適嘅安排。好似今次咁，林樂婷有創傷後遺，而且根據人格分析，佢係極端內向，所以接觸佢嘅時候要好小心。」

原來有這麼多其他東西做的嗎？

「當然唔係每個資料都用晒。例如佢數學老師Mr Chan出卷淺呢點我就用唔著，因為我唔係呢個風格，但係的而且確會有其他同事由老師入手。」

「大佬鈞。」阿晴淺淺一笑說，語氣還是頗冷淡。





「佢真係每一個任務都好出人意表，但係每一個任務都做得好完美，哈哈！講返正題，今次我想你地做嘅嘢係，同林樂婷打好關係，喺我殺人嘅時候使開佢地兩母女，同埋幫林樂婷做好輔導。大概係咁。」忠哥把他的計劃說了出來。

「你打算幾時落手？」阿晴問。

「你地覺得呢？」忠哥反問。

「林樂婷逢星期一、四遲返，林偉琪星期一放假，所以我覺得星期四最好。」我提出自己的見解。

「點解唔係星期一？」阿晴問，但是她冷酷的語氣不得不使得我覺得她在質疑我。





「黃美寶大部份時間都喺屋企，如果佢老公放假就更加大機會同埋佢一齊。睇返佢以往去打麻雀嘅日子，全部都係星期四，所以我覺得星期四成功率最高。」

「唔錯喎，估唔到你都睇得好詳細，叻仔。係咁一於星期四落手。你地覺得你地要用幾多時間預備？」

「一個星期應該可以。」阿晴頗有信心地答。

「好，今日星期二，九日之後落手。準備工夫就交俾你地，有咩繼續保持聯絡。」

然後忠哥便離開了，剩下我和阿晴。





「點？有咩方法？」阿晴很直接就問。

「星期日嗰隊Scalar有活動，佢可能會去追星。趁嗰個機會識佢。」我也直截了當地說。

「好，不過要肯定佢會去。呢個任務交俾你。」阿晴雙眼終於不再冷酷，不過閃過了一絲狡黠。

「你……有idea？」

「有，嘻嘻。」

「原來你識得笑架？」

「當然。」

看來她是個有趣的人，只是外表冷酷一點。