是咁的，我做咗份好奇怪嘅intern: 第七章

下午三時五十五分，我穿著一身不知名中學的校服，徘徊在MN中學門外。

沒錯，阿晴想到的辦法，就是要我扮一個想溝女的男學生。
＊＊＊
「聽日星期三，林樂婷同李樂珊會一齊放學，可能佢地會傾到追星。」阿晴開始說出她的構想。「所以你一於做個怪叔叔跟蹤佢地。」

「吓？？？」聽過她的想法，我懷疑她有心捉弄我。

「扮中學生昅女，我做唔到，所以係你。」她一本正經地胡說八道。





「但係我係正人君子……」

「咪扮。你由頭先開始就係咁望住我。」

「因為你真係好cool，我唔敢得罪你……」

「咁你做定唔做？」

「做……」





然後她才真真正正露出一個笑容，這刻我可以肯定她是在捉弄我。

「其實你笑咪幾好睇！」

「我笑唔笑唔需要同你交代喎。」她又切換回冰冷摸式，真是個難捉摸的人。
＊＊＊
四時正，MN中學放學了，學生們開始湧出學校。要在茫茫人海中找到那兩個人真是好難，我終於明白為什麼觀察力對這份工作這麼重要。當然，我也不否認這是件優差，人生還是第一次這麼明目張膽看女孩。

就在我沉醉在美色當中，目標人物終於出現。我利用忠哥教的藏身技巧，成功跟蹤她們，扮成巧合搭上同一輛巴士，得到許多有用的資訊。





跟阿晴回報的時候，當然少不免被她恥笑一番。

「大飽眼福完有無收穫？」她第一句就調侃我。

「有呀，原來都幾多靚女，我可唔可以日日都負責用眼神接佢地放學？」我依著她的問題反過來胡謅亂道。

「你等俾人炒。」

「佢地打算朝早十點就去到emax等。」

「個活動三點先開始，我地可能有足夠時間埋佢地身。」

接下來就是討論行動細節。

「我地需要一個身份。」阿晴說。「你覺得用咩身份埋佢地身好？」





「男女朋友囉，一男一女最啱。」我笑說。

「死鹹濕佬，諗都唔好諗！」她狠狠地說，我才意識自己過火了。

「咁你有咩好提議……？」

「莊員，你暗戀過我，不過俾我拒絕咗。」

「死自戀狂！」我不忿地反擊。

「你有冇認真睇資料？林樂婷內向嘅其中一個原因，係唔識好好拒絕人，結果搞到好大件事，開始信唔過身邊嘅人。我打算用呢個人設接近佢，因為咁樣最容易引起佢共鳴。」

「嘩你真係用心良苦嘅啫。」





雖然如此，我還是有點擔心如何打開話匣子，因為內向的人真的不容易跟其他人說話。不過阿晴說她自有辦法，而我要做的事，就是「要她感受到我是一個可靠的人」。

「吓？即係點？」我大惑不解。

「我唔識安慰人，你要慢慢俾佢信任你，善後嘅工作要你負責。」

準備工作大致完成，接下來便是等待星期日的來臨。