那些被錯過的人: 班主任時間
「嘩…大佬，又多幾條新校規，呢個校長搞乜呀？」
「咩話？睇過…不準邊行邊食，眼鏡框闊度不得超過1.5CM…」我同阿希對望咗3秒。
「阿希，你條嘢。。」
「係呀，好粗呀。。」
區內名校，果然名不虛傳，校規佔咗８頁紙，第一日返學，逐個學生輪流讀校規，就算已經中六都要讀，讀足一個上晝，原因就係為咗令你緊記每條校規。喺其他學校看似普通嘅行為，係我哋學校就可能已經觸犯大罪。我舉個例子，我中二嗰陣比人發現係課室飲盒裝綠茶，扣咗一分，之後見訓導主任。你會問，咁訓導主任咪好忙？無錯，犯咗事見訓導，仲要約時間咖。
「阿杰，你係度細細聲講咩呀？」
「冇呀Miss Wong，講緊阿希條野好粗…啊！條眼鏡框犯校規啫。」
「喂！」阿希用力拍咗我膊頭一下。
「你兩個企起身，同我讀第三條校規。」
「係。」「不得在課堂間交談接耳。」
「你兩個中四啦，唔知上堂係唔俾傾計咖咩？」
「知道，Miss Wong。」
「嗯，坐低。」Ｍiss Wong谷一谷嘴。
Ｍiss Wong係上年新嚟嘅老師，黑長直，眼大大戴住一副黑框眼鏡，身高我諗一米六多啲，成個人好文青，秀而不媚。但同佢相處過，你就會發現Miss Wong個人好蠢，成日無意間做啲好可愛嘅動作，佢上年一企係操場，就好似有支Spotlight照住佢咁，好快就成為男學生心中嘅女神。一返到上班房，全班男仔都合十禱告，求你賜Miss Wong俾我哋喇，我諗天父都未試過一日收我哋班咁多禱告，「阿們。」
「讀完校規喇，你哋有冇問題？」成個班房無人出聲。
「冇嘅就...」
「做咩呀Miss Wong？第一年做班主任，唔記得咗之後要做咩呀？」我笑住講。
「林俊杰！」Miss Wong雙手叉腰。
「拎本手冊嚟扣你一分先。」
當然，Miss Wong只係講笑，佢冇扣我分，只係話咗我兩句。但如果佢罰我留堂，我都好樂意。讀完校規就要簽名，即係明白以上校規，一定會遵守之類。之後就到選班會嘅時候，學校有個規定，上年度操行分不足75分，下年就唔可以做班會，不過中四開始就洗牌，由頭過嚟。
「好，我哋先選主席，有冇人提名？」Miss Wong好興奮咁舉起手。
「鄧源希呀。」 我舉起手講。
「喂？你癲咗呀？」阿希又打我膊頭。
「我提名你呀，其他人都唔會投你啦。」班房傳出一陣陣笑聲。
「咁...咁又係。」
「嘻...好喇，林俊杰提名鄧源希，仲有冇其他人？」Miss Wong聽完我句說話之後，笑咗出聲。
「Miss Wong，我想自薦。」係後排傳出一把認真女聲。
「哦～晴蔚，你想做主席呀？好呀好呀。」Miss Wong拍哂手講。
「你睇Miss Wong就成個細路咁，嗰個咩晴蔚，成個師奶咁。」我細細聲喺阿希耳邊講。
「啱呀，俾佢做主席，啲班會活動實悶到喊出嚟。」
「咩料呀？班會活動係康樂搞咖嘛，關主席咩事？」
「咁都要主席批咖。」
「批你條命，我要搞活動佢有得say no咩？瞞住佢搞咪得呀。」
「咁你做康樂囉，咁把炮。」
「收皮。」
就係咁，主席之爭，就落係阿希同晴蔚兩個人身上。咁當然啦，阿希完敗，一票都冇。但係佢就得到Miss Wong嘅摸頭殺安慰，嗰一刻我望住阿希個爽樣，我好想自己係佢，之後簡單介紹吓其他職員。
副主席：阿豪 財政：阿彤 文書：阿淇 美藝：阿明 靈修：阿怡 康樂：我
係呀你冇睇錯，我仲係全票當選添。連Miss Wong都投咗票俾我，仲話靠哂我。康樂係班會當中又真係幾重要嘅，搞活動拉近大家嘅距離。
「仲有件重要事要講。」Miss Wong一臉正經。
「吓？」「咩事？」課室傳出好多句疑問。
「有咗？」我細細聲講。
「唔係有咗呀。。」Ｍiss Wong聽完有啲面紅。
「大家今年好特別，雙班主任！」Miss Wong好興奮咁拍手。
「但係又唔見佢嘅？唔通係新老師？」阿希問。
「你真係無腦咖啵，如果係新老師，今朝開學典禮就介紹咗喇。照咁睇應該係貴人事忙，大人物未上到嚟啫。」
「講得啱，大家另一位班主任就係張Sir，班導師就係Ｍiss Chan。」Ｍiss Wong係黑板寫低。
「張Sir會教大家通識，而Miss Chan就教中文。」
咁就大檸樂，張Sir係我哋嘅訓導主任，我中一第一日返學，就同佢交過手。係學生之間，流傳一個傳說「張Sir的微笑」，從來冇學生見過張Sir笑，只要佢望住你，佢個眼神就會令你有種不寒而慄嘅感覺，全身打冷震，就好似石內卜教授咁。上年有個師兄聲稱見過張Sir笑，係某一日夜晚7點，師兄練完波準備走，經過教員室，見到張Sir拎住個相架，之後一個人係度笑，好似支解狂望住獵物笑一樣，佢驚到衫都唔換就直奔回家。而Miss Chan就係學生輔導組嘅一員，操行分每扣過10分，都要同佢傾計，內容都係嘗試感化你，講下耶穌，而你傾計嘅表現，仲會影響你來年升班定留班。
「咁Miss Wong你教咩呀？」阿彤問。
「我教文學囉，不過你哋級得8個人讀文學，我見到名單個陣都呆咗。」Miss Wong望住我同阿希。
「多多指教喇，Miss Wong！」
續