那些被錯過的人: 三人組
鈴～！鈴～！
「好！大家放Lunch，我哋晏晝繼續，Goodbye Class！」
「Good～bye～and～thank～you～Miss Wong～」
「喂，過去搵阿然食晏喇。」
眨吓眼就12點15分，我同阿希讀4A班，宜家就去搵另一個老死，佢讀4C班。
「阿然！」阿希喺4C班房大嗌。
「頂你。。。」眼前嘅景象，令我反咗眼。
阿然俾三條囡圍住，不斷邀請佢食飯。
阿然喺我哋級公認四大男神之一，成日有囡埋身，你唔好以為名校囡唔主動，其實同其他學校冇乜分別，見到靚仔都係濕哂。阿然183CM，羽毛球校隊，成績中上，白白淨淨，最剎食就係笑容。不過講個祕密你知，雖然咁靚仔又咁多囡埋身，但佢未拍過拖咖。
「行得未呀，男神？」
「我唔同你哋食喇，第一日返學我想同朋友食。」阿然笑住同班囡講。
「哦咁好喇。。」「聽日同我哋食喇！」
「ＯＫ！」阿然再一次露出佢招牌笑容。我估班囡已經暈哂。
「行得！」阿然搭住我同阿希膊頭。離開班房嘅時候，我哋聽到班囡討論緊我。
「喂！阿然隔離嗰個係咪阿杰呀？」
「佢把聲好溫柔咖。。」
「係咩？」
「不過阿然靚仔啲囉！你哋會簡邊個呀？」
「兩個都唔同風格。。」
「咁俾阿杰你喇！阿然我嘅！」
「喂！你同我爭？」
「夠喇，你兩個。。」
「你睇吓你兩個。。幾受歡迎。。」阿希喊住講。
「我邊有佢咁靚仔呀。」我用中指指住阿然。
「哈哈！你用膠袋遮住個頭，剩係靠把聲都掂喇。」阿然捉實我隻中指。
大家可能會覺得我都係四大男神之一，但我唔係。我身高180CM，好多人話我口賤，雖然我唔係好認同，個樣就平平無奇，籃球隊加話劇組，有操開所以身型都算唔錯，成績呢就麻麻哋，中游位置喇。中二個年入咗話劇組做幕後，負責老師Miss Li聽完我把聲之後，就決定將所有VO俾哂我錄。令我出名嘅，應該就係上年聖誕演出，有機會再講。
咦？你問我籃球隊打咩位？後備囉屌。
「嗚嗚，你兩個賤人，溝哂啲囡。。」阿希就慘啲，雖然身高仲高過阿然，但個樣就生得有啲畢加索，仲要攣毛雞，性格就幾風趣，成日引到身邊啲人笑，同我一樣都係話劇組，不過就係幕前，幾好戲咖。跑開越野，體能非常好，我都好希望有女仔睇啱佢呢樣優點喇。
我講緊佢性格呀。
「你唔洗咁擔心喎。」我拍一拍阿希膊頭。
「點解呀。。」
「百貨應百客啫，屎都有人食喇，總有捧場客嘅。。我估。。」我愈講愈細聲。
「去死喇你！」阿希揸實拳頭，作狀要衝埋嚟。
「哈哈！你哋唔好咁啦！唔好玩喇。諗下點落去仲好喇。」阿然捉住阿希隻手。
我哋班房係四樓，放Lunch嘅時候，後樓梯就會出現人流，密密麻麻，就好似行緊年宵，插針都插唔入。
「我哋衝入去咪得囉！」阿希大聲咁講。
「冷靜，呢個時候要智取。」我望住阿希，然後右手運功，輕輕係阿然背脊用力一推，阿然向前仆，嚇親一個咁啱行到我哋面前嘅低Form妹妹！
「你。。。」妹妹停低望住阿然，好怕羞咁耷低頭。
「唔好意思呀，你可唔可以俾我行先呀？」阿然露出招牌笑容。
「可。以呀。。」妹妹完全唔敢望阿然。
「敵將is doctor Lee。」我細細聲同阿希講。
「咁就搞掂個妹妹呀。。」阿希睇到呢幕又想喊。
就係咁，我哋成功插隊，然後就行去平時食Lunch嘅餐廳啦。
續