雞仔聲表姐（全篇完）: 密密傾
收咗工返到屋企，Johnny匿入房攞住部電話蠢蠢欲動…
動嘅係whatsapp Chloe，同佢傾吓計。
而家夜夜哋，會唔會阻佢呢？
試吓囉，橫掂whatsapp之嘛，佢唔方便咪唔覆。
好…
行動！
Johnny計算後，決定whatsapp！
「Chloe，得唔得閒？」
訊息send 出，Johnny望住電話，睇佢幾時開機睇。
等了又等，Chloe仍然斷線…
佢唔睇，即係唔方便喇…
唏…
Johnny嘆氣，放低電話時鈴聲響起，一攞起手發現係Chloe覆機…
佢覆我喇！！
好嘢！！
少少訊息就令Johnny歡喜若狂，一開app睇睇Chloe講咩…
「what`s up？」
what`s up？
點覆呢？
Johnny諗一陣，之後講：「無，睇吓舊電有無問題」
「ok吖」
Ok…
又要點覆？
Johnny再諗，然後打：「妳好似成日都好忙咁」
「一般喇」
Chloe講嘢十足說話終結者，令人駁唔到落去…
佢咁，係咪唔想同我講？
咁…
我要收線？
Johnny正想收線時，Chloe打：「我整緊嘢，轉頭搵你」
敷衍我？
敷衍我，總好過唔出聲然後offline。
「好」Johnny打完未send，Chloe就off咗line…
咁樣同無出聲之後offline無分別。
Johnny又一次受打擊。
擺電話响床頭，俟响度等。
1個鐘…
2個鐘…
3個鐘…
等吓等吓都差唔多深夜1點，Chloe應該瞓咗…
Johnny收拾心情，瞓覺。
第二日起身，Johnny睇睇電話…
咦， Chloe有訊息？
「我做完，有時間」
Chole覆我有時間？
我唔知佢覆我𠻹！！
Johnny再睇睇時間，發覺 1點45分。
唔通我瞓到冧咗？
覆覆先。
Johnny即刻覆返Chloe。
「Sorry，我尋日瞓咗睇唔到妳訊息」
Johnny send完，見而家上晝7點半，Chloe尋晚咁夜應該未起身覆唔到…
更何況平時都唔即刻覆，所以放低電話準備擦牙。
一放低電話就響起。
響起係whatsapp，一睇係Chloe send嚟。
佢哩次咁有效率？
Johnny都好有效率打開
「哦」
吓…
只係一個哦字？
佢嬲咗我？
要解釋返先。
Johnny驚 Chloe嬲佢唔覆，即刻諗點樣解釋返。
諗緊打咩字時，又醒起佢係話題終結者，所以簡單一個哦字未必係嬲。
諗都咁，Johnny決定旁敲側擊。
「妳尋晚咁夜嘅？」
「要趕埋功課，冕咗瞓」
趕功課？
Chloe唔係出咗嚟做嘢咩？
「妳…」
Johnny打咗個妳字，Chloe就offline。猶豫緊打唔打時諗到佢尋晚咁夜瞓，今朝咁早起應該有嘢搞…
而且未必夠精神。
既然係咁唔好煩住佢…
否則惹佢討厭。
Johnny決定停一停，遲啲再搵佢。
佢一身OL，應該返朝9晚5。
預多少少時間，下晝7點先搵佢。
Johnny計劃好，7點whatsapp。
好快到7點，take action！
「Hi，收咗工？」
Johnny send完短訊，雖然次次佢都唔會即覆，不過預期佢哩個時間應該得閒，所以望住電話等覆。
可惜預期有出入，等好耐仍然offline。
到咗大約9點，Johnny收工時 Chloe訊息到。
「剛上完堂」
上完堂？
搞乜？
Johnny唔明，問：「上咩堂呀？」
「Human resource and finance management for insurance」
吓？
咁深奧？
望住一大堆英文，Johnny唔多識…
唔識，唯有避重就輕。
「學咗對妳份工有幫助？」
「都係嘅」
又咁簡單回答…
點可以令佢打多幾隻字呢？
Johnny諗計， Chloe好似知佢諗乜，自動波打字。
「呀head過多一二年退休，攞多啲證書坐佢個位」
Chloe諗住讀書向上爬？
仲以為佢係港女，原來有野心！！
聽到Chloe有大志，Johnny對佢刮明目相看。
「妳咁勁，男朋友咪仲勁？」
Johnny試探佢有無仔，Chloe已讀訊息不過無回應…
狀態顯示仍然在線。
到底佢有無男朋友？
係諗緊點答我？
Johnny期待回覆…
當然更期待佢話無仔。
等待一輪後， Chloe答…
「佢淨係掛住玩，乜都唔做正廢物😡」
男朋友…
Chloe原來有男朋友…
佢咁靚女，有男朋友正常嘅…
唉…
知道Chloe有仔，Johnny有啲灰心。雖然灰心，但係都慣性講笑…
「妳咁正，飛咗件廢物搵過個喇😂」
「梗係喇，最憎啲爛泥😡」
梗係？
佢意思係…
Chloe意思好似已經飛咗件廢物，Johnny感到希望再現！！
不過問清楚先！
「妳…」Johnny打咗一個妳字，Chloe已經打完字再send出。
「你女朋友呢？」
「我無呀」
「哦」
Chloe簡單一個哦字，跟住就offline…
雖然一貫話題終結者，不過今次打多咗字，亦都透露多啲…
至少知道佢飛咗件廢物，應該現時單身…
Johnny覺得希望多咗啲…
因為多咗啲希望，所以Johnny繼續send whatsapp俾Chloe…
佢每次講少少…
積少成多，知道更多。
知道佢做保險，响尖沙咀開工…
知道佢收工就去返學…
最重要係知道佢真係單身，有個男友位空缺…
好嘢！！
Johnny好開心，尤其係開始send whatsapp Chloe都回覆快咗…
大家互相問候關心，好似情侶咁溝通。
今日又whatsapp聯絡。
「今日會落大雨，記得攞遮吖」
「我office擺定把遮，你呢？」
「我都有」
「👍」
Chloe send完公仔，之後話開工遲啲再傾。每日簡單噓寒問暖Johnny好開心，只係Chloe好忙，約佢好多次食飯都話唔得閒，所以有啲失望…
到底有無機會約佢出嚟呢？
Johnny覺得機會唔大，奀仔見Johnny成日對住部電話陰陰嘴笑，就問：「溝成點呀？」
「咩溝成點呀？」
「扮乜吖，成日send訊息傻笑，盲嘅都知你send俾佢喇。」
奀仔篤爆，Johnny都認咗。
「約佢出嚟喇。」
「佢好忙，約咗好多次都唔得。」Johnny扁扁嘴。
「時間就好似乳溝，擠出嚟點都會有啲嘅。」奀仔講：「佢鍾意咩活動呀？」
「鍾意咩活動…」 Johnny翻查WhatsApp對話內容，睇吓佢有咩鍾意搞，奀仔都伸埋個頭一齊睇。
掃呀掃，不停掃內容就睇到其中一項。
「佢話鍾意哩樣，就試吓約佢喇。」
「哩樣？」Johnny諗一諗，就決定聽奀仔去做。
另一邊啱啱同Johnny send完whatsapp，Chloe放低電話攞起杯水…
處身地方係佢公司office。
飲緊水時，一個短頭髮、外表精靈活潑嘅靚女行埋佢身邊。
「妳最近密密篤電話，睇嚟有啲嘢喎。」
「有咩吖，同表弟傾閒偈之嘛。」
「上次整電話果個？」
Chloe點頭示意，短髮靚女講：「妳哋搭上咗？」
「妳都傻嘅，表弟嚟嫁，搭咩上呀。」
「妳近排發哂姣咁，仲以為搵到條仔𠻹。」
「我搵咩仔吖，有Sandy仔就夠喇！」Chloe攬住靚女---Sandy仔講笑，Sandy笑笑講：「算妳乖喇。」
「哈哈。」
兩個嬉笑一輪，Chloe電話響起，係Johnny send whatsapp。
「今個星期六妳咪話唔駛返工上堂嘅，唱k吖」
見到Johnny約唱k，Chloe有啲突然…
因為之前Johnny約親都係食飯，改為約唱k感到意外。
「兩個人唱k？」
「我叫幾個男，妳又叫幾個女吖」
幾個男、幾個女？
哩種party都好耐無搞喎…
唱k我鍾意…
去唔去好呢？
Chloe有啲唔知點，就同佢好姊妹問問。
「Johnny約我唱k，佢話大家叫幾個男女。」Chloe講：「妳去唔去呀？」
「妳表弟？靚唔靚仔嫁？」
「普通男仔囉。」
「咁佢啲friend呢？」
「未見過，唔知呀。」
「咁無乜selling point喎！」Sandy不感興趣，Chloe講：「唱k啫，又唔係揾男友。」
「妳咁講即係想去喇？」
Chloe點點頭：「返工返學都悶哂，想去唱歌放鬆吓。」
「咁Chloe天生歌后，係啱唱歌嘅。」Sandy攞佢雞仔聲玩，Chloe笑笑打佢。
「好喇，姊妹一場實撐妳。」Sandy講：「我叫埋同team Ivy、Sofia去好唔好？」
「妳問吓佢哋去唔去，之後我再覆。」
「Ok。」
Sandy問咗Ivy、Sofia之後兩個都去，Chloe覆返Johnny：「計埋我有4個女仔，你約返至少4個喇。」
Johnny收到Chloe訊息，知道佢肯去就勁開心！！
「好嘢，佢話去喇！！」Johnny歡呼大笑！
「都話約唱k掂喇，到時我去你出錢嫁。」奀仔乘機屈Johnny，Johnny一口答應。
「Ok，我搵男仔，book好房然後再通知妳😁」
「Ok」
Chloe send完就offline，同sandy講：「佢book房。」
「妳表弟好嗆住喎，日日whatsapp不停約，妳肯就即刻book房。」
「係咩。」Chloe平淡回應。
「佢似對妳有意思喎。」
「Maybe喇。」
「咁妳呢？」
「我？」 Chloe答：「我無去諗好定唔好。」
「咁高境界？」
Sandy話自己高境界，Chloe拉住Sandy：「去開工喇，唔玩喇。」
「係嘅！」
兩個靚女唔再講，全程投入工作中。
（4）密密傾---完