一宿無話,好快到星期六夜晚,佢哋約定卡拉ok之夜。
 
Johnny好緊張,未夠鐘就叫定男班到場準備…
 
擺好所需物品,包括咪、咕𠱸、毛巾、紙巾、零食、生果、啤酒汽水、冰筒、嘔吐袋…
 
甚至圓氣球、長條氣球都有…
 
擺放到美侖美奐,成個生日party咁。
 


以上工程大部份係Johnny,少部份係奀仔,另外兩個外援無搞過,因為Johnny信佢哋唔過,外援到場前已經放好。
 
「搞掂!」Johnny搞咗兩粒鐘,由清潔、擺放噴香水都悉心裝設,對於豪裝感到滿意。
 
有份搞嘅奀仔,對Johnny講:「呀John哥,你會唔會太誇張呢?」
 
「唏,溝女係要心思喇。」Johnny講:「唔用心點得靚女心!」
 
「靚女心定靚女身先?」奀仔奸笑輕力批琤,Johnny仍在滿足笑。
 


笑時外援到,一入嚟就叫:「嘩!搞乜呀?」
 
睇到眼都大,好奇搞啲波波。一搞嚇到Johnny制止:「兩位大哥,眼看手勿動!」
 
將外援隔外,引領埋位坐。奀仔講:「Johnny全副心機整嫁,食唔食到女睇哩劑呀!」
 
「Oh,唔怪得喇。」外援講:「ok,唔搞唔掂。」坐定定手放膝頭。
 
外援坐定,Johnny同外援講:「今日雖然係我溝女,不過開心去玩得喇…」
 


奀仔插口:「最緊要認清Johnny目標,Sam哥、Tony哥,唔好搞到呀嫂。」
 
「得喇,雞仔靚女吖嘛,知喇知喇。」Sam、Tony齊聲講。
 
Johnny見外援係隔離電腦鋪兩個港青,唔係x硬無親戚果條賤精都放心啲。
 
一陣之後,Chloe WhatsApp Johnny。
 
「我哋到咗,幾號房呀?」
 
「520」
 
「👌」
 
主角就到,Johnny緊張到手心出汗。


 
望實道門,門緩緩打開…
 
當門打開,見到嘅係Johnny夢寐以求嘅女人,Chloe!
 
Chloe著住白色露肩中袖衫,下身淺色短褲、平底鞋,成個look好清爽,同上次性感OL唔同。
 
行唔同風格,同樣都係好靚。
 
靚女Chloe,令Johnny着迷!
 
靚…
 
Chloe真係好靚…
 


Johnny睇到定格,Chloe首先打招呼:「Hi。」
 
「Hi,入嚟吖。」Johnny招呼Chloe入嚟,Chloe見到間房擺設好驚奇!
 
「咦,間房咁嘅?」
 
「係呀,我整嫁,靚唔靚?」
 
「呀…」Chloe唔鍾意咁花巧,不過禮貌上笑笑話靚。
 
Johnny以為食good,就好開心。
 
其他男性見到Chloe,都好熱刺同佢打招呼:「呀嫂!」
 
「咩呀嫂呀。」Chloe笑笑否認,獨特雞仔聲出現,加上佢唔認係呀嫂令外援揚起打佢主意心態。


 
當想打Chloe主意時,另一個靚女入場。
 
「嘩,間房咁正嘅?!」Sandy見到間房擺設,極感興趣四圍望。
 
佢望間房,其他男士望佢…
 
因為Sandy背心短裙加黑絲,成身戰鬥格咁襯埋靚樣,無辦法唔吸引男人目光。
 
「Hello。」男士同Sandy打招呼,Sandy都回應。
 
打完招呼後其他女都入嚟,Ivy同Sofia青春少艾,靚女程度就同Chloe、Sandy爭幾條街。
 
人齊哂,介紹哂後開始玩。
 


「嚟,飲杯先。」Tony斟酒,撩班女玩。
 
「好。」Sandy清咗杯酒,Tony見佢咁飲得就同佢講:「識唔識猜枚?」
 
「哩啲嘢小學就識喇!」Sandy講:「大圍吖。」
 
「唔喇,我想唱歌先。」Chloe拒絕,Johnny即刻講:「妳想唱咩歌,我幫妳點。」
 
「我想唱傾城。」
 
「好,交俾我。」Johnny即刻揾歌,其他人開始飲酒猜枚。Sandy最吸睛,自然班友向佢埋手。
 
雖然被攻,不過Sandy玩慣,對佢無難度。
 
「揾到喇。」Johnny點咗歌,交枝咪俾Chloe,佢甜笑回應:「唔該。」
 
雞仔聲加迷人笑容,令Johnny都以笑回應。
 
音樂響起,Chloe專心電視。
 
「熱情就算熄滅了…」幼嫩雞仔聲唱慘情歌,一開聲就將在場男性對Sandy注意力轉移去Chloe度…
 
嘩!!
 
極品嚟喎!!
 
成班想笑,Johnny發覺到就啤住佢哋,班仔唯有忍住。
 
Chloe仍專心唱歌,無理會到佢哋。
 
一路唱,班仔就大大聲猜枚分散注意力。
 
只可惜…
 
「紅眼睛幽幽的…」唱到傾城verse時好似未成長嘅雞仔聲反差更大,Sam聽到濁親反肚咁。Johnny見到佢咁明踩Chloe即刻攞起枝咪同Chloe一齊唱。
 
Chloe發覺Johnny都唱,就望住佢合唱。
 
Chloe望住,Johnny自然都望住…
 
第一首歌就由佢哋合唱開始。
 
傾城唱完,全場掌聲雷動…
 
「好嘢!」
 
「正呀!」
 
「多謝!」個個讚好,Chloe都迷人微笑…
 
當然佢哋好嘅原因,係唔駛再聽雞仔歌。
 
「我要唱where did you go!」Chloe好開心,即刻點唱。Johnny當然做嘢,其他人聽到Chloe要再唱,想插歌時俾Johnny反插…
 
左插右插,最後係Chloe繼續唱。
 
Johnny係咁幫佢,响Chloe心中加分。
 
「曾看着同星空…」
 
雞仔聲又再起,班仔又响度忍笑。Johnny想伴唱時Sandy攞起咪唱。
 
今次Sandy伴唱,Chloe好開心拖住佢唱。
 
Sandy把聲唔錯,夾埋Chloe把聲就順耳好多,一啲都唔兀突。
 
好快就唱完,當Chloe想再點時Sandy講:「唔好掛住唱,猜枚先喇。」
 
「好吖,妳同我part吖。」
 
「男同女part喇。」奀仔講:「Johnny,你同Chloe、我同Sandy。」
 
「好!」聽到奀仔咁幫手,Johnny自然即時話好。Johnny、Chloe排排坐,去同奀仔Sandy猜枚。
 
Chloe明顯對猜枚唔擅長,拳腳兵器都係咁輸。Johnny係咁頂酒,頂多幾次後Chloe講:「唔好成日都要你飲,今次輪到我。」
 
「無所謂喇,我飲到,妳猜我飲。」
 
「唔可以次次都你飲。」Chloe攞起酒杯,然後成杯飲哂。
 
「我都飲到嫁。」Chloe展示杯酒飲哂,笑笑咁講。
 
「呀嫂好嘢!」旁邊Sam大聲讚好,Chloe講:「都話唔係咯。」
 
「成杯飲哂都話唔係好嘢?」Sam講:「我同妳猜!」跟住攞個骰盅俾Chloe,Chloe諗一諗之後攞住去搖。
 
「3個6。」Chloe講。
 
「4個1齋。」Sam咁嗌輸咗飲double,佢想做Chloe?
 
Johnny見到,睇睇Chloe揸咩骰。睇到係1、2、6、6、6,就同Chloe咬耳仔:「嗌5個1。」
 
「5個1?」
 
「係。」Johnny講:「信我。」
 
「好。」Chloe講:「5個1。」
 
「加1。」Sam話加1,Chloe聽到就即時開,Sam有3個1,佢輸。
 
「贏咗呀!!」Chloe好開心,係咁拍Johnny大脾…
 
首次身體接觸,雖然Johnny着長褲,但係都覺得好興奮!
 
Chloe好buy我…
 
正呀!
 
佢哋開心,Sam就偷雞不成。
 
「再嚟!」飲完就要覆啅,Chloe講:「好喔,嚟吖。」
 
今次Chloe玩,佢嗌得好快,Johnny睇唔到佢啲骰教唔到路,輸咗。
 
「哎呀,輸㖭。」Chloe攞起杯酒,Johnny想幫佢飲時俾佢阻止,結果Chloe飲哂。
 
「再嚟!」今次到Chloe覆啅,哩次Sam輸。
 
「哈哈,我又贏喇!」Chloe大笑。
 
「呀嫂咁勁?到我玩!」Tony接力,Chloe講:「唔怕死就嚟!」
 
又係輸一次贏一次,Chloe飲幾杯後塊面紅哂。外援輸哂Chloe同奀仔講:「點呀,你班frd輸哂喎。」
 
「咁我同妳猜囉。」奀仔講:「就算妳係呀嫂我都唔讓妳嫁。」
 
「駛乜你讓呀!」Chloe企起身彎腰搖骰,佢醉醉哋企唔穩,一手搭住Johnny膊頭一手同奀仔玩。
 
Chloe飲醉咗…
 
唔好俾佢飲喇。
 
Johnny見Chloe飲醉,想幫佢頂但Chloe唔肯。
 
「我…飲到。」Chloe講:「駛乜你幫。」
 
Chloe貓咗,Johnny幫唔到飲,Sandy見到咁就出手。
 
「姊妹,妳玩咗咁耐到我打庄。」Sandy扶Chloe坐低,對Johnny講:「交俾你睇住佢。」
 
「好,知道。」Johnny點頭回應,Sandy拍拍佢膊頭,然後對班仔大戰。
 
Chloe一坐低就合埋眼彎低身捽額頭,Johnny講:「係咪好辛苦呀?」
 
「我…無事…」Chloe一隻手捽頭,另一隻手甩手表示無嘢。
 
「我攞杯熱茶妳飲吖。」
 
Chloe聽到,點點頭示意。
 
Chloe要熱茶,Johnny即刻跑去攞。當攞到後返入房,遞俾Chloe:「熱茶到,小心熱。」
 
Chloe微微開眼,見到熱茶講:「唔該。」呷一少啖之後講:「我想去廁所…」
 
「我陪妳吖。」
 
Chloe企起身無表示,Johnny搭住佢膊頭扶住去廁所。
 
Chloe着嘅係露肩衫,Johnny搭住佢膊頭接觸到肌膚…
 
好滑…
 
好嫩…
 
雖然只係搭住無去摸,但係Johnny都有此評價。
 
搭住Chloe膊頭,搖搖跌跌下去到女廁門口:「我唔入去,响度等妳喇。」
 
Chloe無回答就入咗去。
 
佢係咪入去湯?
 
會唔會暈咗嫁?
 
Johnny好擔心,每次一有人開門出嚟佢都裝入去…
 
啲女見佢裝,以為佢係咸濕佬啤住佢。
 
又一次打開門,Johnny裝入去時見到Chloe行出嚟…
 
佢行出嚟…
 
無事喇!!
 
Johnny好開心,Chloe見佢望入女廁就講:「你望咩呀?」
 
「睇吓妳有無事吖嘛。」
 
「洗洗面,無嘢喇。」Chloe笑笑:「我哋行喇。」
 
「好,好。」
 
Chloe比起頭先係無咁醉,不過都係斜斜哋。但係又唔夠膽扶佢,Johnny睇住行到房,無落手籍口。
 
當入到房,成班玩到好high,個個好親密咁黐住玩。
 
「行開一陣就咁激?」Johnny睇到眼都大。
 
「係喎。」Chloe見到啲咪擺哂响枱,講:「無人唱k,我哋唱。」
 
「好,想唱咩歌。」
 
「你揀喇。」
 
「知道。」
 
Chloe叫Johnny揀歌,Johnny就去做嘢。
 
揀啲合唱歌…
 
大路嘅歌…
 
有意思嘅歌…
 
Johnny揀到歌喇…
 
畫面出現…
 
我的回憶不是我的。
 
「傷心的總會任性…」雞仔聲一出,成班友喚醒哂。
 
「佢返嚟喇!」
 
「好驚呀!!」
 
「哈哈,好驚咩?」Chloe對Sandy講,Sandy掩住耳仔扮嘢。
 
「衰人!」Chloe笑笑拍打Sandy,Sandy攞杯酒俾佢:「飲返杯,唔好嬲。」
 
「哼!」Chloe飲完酒,首歌播咗一半。
 
「駛唔駛repeat?」
 
「唔駛,繼續喇。」Chloe唱:「回憶不再受制於我,我承認…」
 
到合唱部份,Johnny都即刻唱:「回憶也許你的…」
 
Johnny一唱,Chloe好開心望住笑笑…
 
迷人瞇成一線笑。
 
咁吸引笑容,Johnny都當然笑…
 
兩個笑住唱完哩首歌。
 
哩首歌之後,到好心好報。
 
「舊歌之夜?」Chloe問。
 
「唔鍾意?」Johnny聽到Chloe咁講,驚佢唔鍾意所以好緊張。
 
「唔係。」
 
音樂又響起,兩個再合唱。
 
「落力為妳好,得不到分數…」Johnny望住Chloe唱,當唱到:「他不懂愛惜妳,我樂意操勞…」果時好用力唱,Chloe好似get到佢意思,笑住唱:「我決意愛他,祝我愉快吧…」
 
Chloe講過前度係廢物、好憎佢,而家唱我決意愛他擺明係講笑,所以佢扮哂嬲咁繼續唱。

歌詞幾貼切,兩個一路唱一路笑…
 
「他從來都比你差,仍然死心愛他,垂頭再度聽他欺詐而明知你愛我,我竟扮未知道…」Chloe一唱到哩句,Johnny即講:「原來妳扮嘅!」
 
「哈哈,你理得我喔!」Chloe笑住輕打Johnny塊面,Johnny乘機捉住佢隻手,望住佢笑住唱:「妳當我是知己,我看得到,我當妳是一生前途。」
 
Chloe都同樣望住佢笑住唱:「彼此也是沉迷麻盲目控制不到…」
 
「怎麼好,都等不到!」大家大聲唱完哩句,笑到唱唔到落去。
 
「你呀,亂咁唱。」Chloe笑駡Johnny,Johnny講:「妳咪一樣。」
 
講完大家對望,微笑對望…
 
拖住手對望。
 
Chloe…
 
妳俾我拖住…
 
係咪會接受我?
 
Johnny心大心細時,Chloe攞起remote點歌。
 
佢點嘅係…
 
滾。
 
吓?
 
佢點首滾,係咩意思?
 
因為Chloe點哩首歌,令Johnny有啲驚…
 
當音樂響起,楊千嬅唱先。Chloe瞪大雙眼,整個嬲樣開始唱:「你控訴我…」
 
Chloe咁嘅反應,Johnny知道佢係講笑,所以都配合佢扮哂嬲跟住唱。
 
已經唔係唱歌,而係嗌歌情形下Chloe體力消耗哂,酒精佔據返佢個腦,坐返落梳化。
 
因為佢仍然拖住Johnny,所以連帶拉抵佢坐低。Johnny俟上梳化,旁邊有個圓型氣球,佢就問:「今晚布置得唔得?」
 
「低能。」
 
「低能?我用好多心機喎?」Johnny指住Ivy、Sandy佢哋攞住長條氣球同班仔嬉戲:「佢哋好鍾意喎?」
 
「白痴。」Chloe笑笑講。
 
「吓?女仔唔係鍾意哩啲咩?」
 
Chloe望住Johnny,然後攞起枝咪唱:「別忘掉我早過了好騙的作夢年紀。」
 
「咁樣?」Johnny講:「妳覺得我呃妳咩?」
 
「唔知呢?」Chloe伏落Johnny胸口,講:「你啲嘢𡃁妹鍾意囉…」
 
Chloe波波壓落Johnny,令佢心跳加速…
 
掂到…
 
掂到Chloe…
 
只係胸口掂到,都令Johnny勁緊張…
 
當緊張時,Chloe講:「你…有無睇中邊個?」
 
「我睇中邊個?」Johnny唔明點解Chloe咁問。
 
「係呀…我會幫你喎…」
 
頭先歌聲表達愛意,而家咁問?

Johnny唔知點答,所以反問:「妳又睇中邊個?」
 
「我問緊你呀?」Chloe抬起頭對住佢講:「Ivy?」
 
「唔係。」
 
「Sofia?」Chloe迫近啲,個鼻都同Johnny掂掂吓…
 
兩個近距離相近,Johnny閒到Chloe香氣…
 
閒到熱氣。
 
「我睇中嘅,同妳一樣咁靚女。」
 
「同我一樣?」Chloe再貼近啲,個鼻直頭同Johnny個鼻貼住,當講嘢時雙方嘴唇微微接觸…
 
微微接吻…
 
錫到…
 
終於錫到Chloe…
 
就算只係輕輕接觸,都算係kiss…
 
Johnny好開心…
 
亦都講多啲嘢。
 
「係呀。」Johnny錫到Chloe嘴唇:「都係好靚女。」
 
「你想講Sandy?」Chloe都錫Johnny嘴唇。
 
「唔係。」Johnny講:「妳無理由唔知喎。」講多啲,錫多啲。
 
「唔會係Sofia啩?」
 
「妳靚過佢好多…」Johnny嘟長個嘴去錫Chloe,Chloe响佢口中講:「你根本唔想講…只係乘機錫我…」
 
「好似係妳擒住我錫喎…」

「係你錫我,唔講…」

「我答咗喇…」Johnny講:「我錫果個,就係睇中果個…」

Johnny講完,Chloe即刻攬住佢kiss…
 
Chloe主動,Johnny都攬住佢kiss…
 
兩個响度打茄輪。
 
啜啜啜…
 
錫到Chole嘴唇,嚐到佢柔軟甜美嘴唇,Johnny忍唔住係咁啜…
 
想將Chloe嘴唇甜味全部啜走。
 
Chloe同Johnny打茄輪,旁邊Sandy見到都講:「真係撻着咗?」
 
Chloe同Johnny聽唔到,仍然沉醉响kiss中。
 
當kiss一輪,Johnny伸手想摸Chloe隻腳時跣一跣,成個瞓响梳化上。原本Chloe係俟住佢,因為佢瞓底咗所以俟唔到。Chloe跨出右腳正面夾住Johnny,雙方下體貼住,Chloe就捉住佢個頭kiss…
 
成個姿勢就好似女上男下,觀音坐蓮咁搞嘢。兩個kiss變為搞嘢,全場所有人歡呼大叫。
 
「嘩,兩個扑嘢呀!!」
 
「勁呀!」
 
「砌大力啲呀!!」
 
成班叫到好大聲,驚醒咗Chloe。佢起返身想反駁時啖酒湧起,掩住個口想嘔。
Johnny見佢咁,就講:「我送妳返去先喇。」
 
Chloe點點頭,Johnny就拖住佢走。
 
「Chloe,我聽日幫妳call sick? 」Sandy講。
 
「好。」Chloe答。
 
「奀仔,我俾住$2000你,你出住先我俾返你。」Johnny都同奀仔交帶。
 
「我出住先喇。」
 
「係囉,你留返啲錢爆房喇。」
 
「哈哈哈!」
 
見Chloe、Johnny兩個走,成班又起哄。叫多幾叫,Chloe擰轉頭講:「我哋係去爆房…」
 
錫咗Johnny面珠一啖,再同衆人笑笑,然後同Johnny走…
 
 
 


                                                                                                              (5) 吻下來 豁出去---完