雞仔聲表姐（全篇完）: 畢業後
（16）畢業後
自從Johnny俾Chloe引導讀書，Johnny都不斷進修，讀埋open U。
同Chloe拍咗幾年拖，感情深厚之外都取得大學學位。（註）
今日係Johnny、Chloe大學畢業，兩個戴四方帽响學校影相。
「望住哩度。」攝影師講：「笑。」
「笑喇，畢業都唔笑。」Chloe同Johnny講。
「唔係呀，今日笑得太多，塊面硬哂。」
「咁都得，駛唔駛幫你鬆吓？」
「好吖。」
Chloe正想幫Johnny鬆鬆面部肌肉時，佢爸爸媽媽細佬都嚟咗。
見到佢哋，Chloe好開心揮揮手：「哩度呀！」
「睇到。」Chloe媽媽嚟到，睇睇Chloe：「終於大學畢業，叻女。」
「多謝媽媽。」
「天華都畢業喎。」Chloe媽媽講。
「係呀姑姐。」
「你屋企人呢？」Chloe媽媽問完，Johnny屋企人到咗。
「妳哋咁遲呀？」Chloe媽同 Johnny媽講。
「塞車呀。」Johnny媽對佢個仔講：「估唔到你會大學畢業喎。」
「你睇少我。」Johnny笑笑：「不過全靠Chloe，唔係佢啟發我，我都唔會讀書。」
Johnny同Chloe講：「多謝妳。」
哩個多謝氹到Chloe眼泛淚光，Johnny遞張紙巾俾佢：「唔好喊。」
「Thank you。」Chloe抹抹眼淚，想講啲深情說話時醒起屋企人响度，所以無講。
「好喇，大家埋位影相。」
兩家人並排，Johnny同Chloe企中間。
「似唔似擺酒影相呀？」Johnny响Chloe耳邊講，氹到Chloe瞇成一線眼。
伸手想搣Johnny pat pat，Johnny向背後伸手拖住Chloe。
一拖手，Chloe笑得更甜。
「1、2、3，咤吪。」
一張兩家人大合照影咗，相片睇到Johnny、Chloe笑容，但睇唔到佢哋背後拖手。
Johnny學歷高咗，都搵到份工唔單止人工多啲，亦都有晉升機會，咁開心就要慶祝。
Johnny屋企人過咗澳門over night，間屋無人自然成為慶祝地點。
今晚由Chloe煎牛扒，兩個燭光晚餐。
「Cheers。」兩個攞杯紅酒飲。
Chloe甜笑，燭光下顯得更靚。
望到咁靚嘅女朋友，Johnny都好開心。
「恭祝你搵到份好工。」
「多謝。」
「試吓啲牛扒喔，五成熟ok嘛？」
「妳煎喎，就算1成熟都ok喇。」Johnny切咗一舊俾Chloe。「妳食吖。」
「我叫你食，你又俾我食。」
「咁好嘢梗係俾妳食先喇。」Johnny氹到Chloe，張開口食咗。
「好唔好食喔？」Johnny問。
「好食呀，邊個煎到咁好味嫁？」Chloe講笑。
「好味呢，我最愛嘅女朋友煎嫁。」
Johnny又氹Chloe，冧到佢瞇成一線眼，然後切俾 Johnny：「賣口乖，好食嘅同我全部食哂佢。」
「一人一塊喇。」Johnny講完， Chloe講：「你鍾意食，我俾哂你食，我食配菜ok喇。」
今次到Chloe氹Johnny，令到佢好開心。
兩個恩愛咁食完牛扒，之後坐梳化飲紅酒睇電影「我的五步男朋友」。
一部嗺淚電影，睇到Chloe眼濕濕。
「嗚…嗚…」Chloe睇到喊， Johnny攬住佢抹眼淚：「唔好喊。」
「嗚…嗚…」Chloe講：「好慘吖嘛…」
「傻豬。」Johnny錫咗Chloe塊面一啖：「成個細路女咁，以後當妳係個女咁湊。」
「當我係妳個女？」 Chloe笑住望佢：「爸爸。」
「乖女。」 Johnny錫Chloe額頭，錫完後伏响Johnny胸口。
溫馨一陣，Johnny講：「真係無諗過有哩一日。」
「哦？」Chloe對佢說話好奇：「即係點？」
「妳咁靚女，又係我表姐。」
「咁你當初又夠膽追我？」
「試吓囉，妳都話試咗唔得唔會怪我…」 Johnny未講完，Chloe就笑笑打佢心口：「果句說話係叫你上進呀！」
「係咩，是但喇。」
「咁到底你點解鍾意我？」 Chloe再望住 Johnny。
Johnny講：「係妳嚟整電話果時，俾妳笑容同雞仔聲吸引。」
「咁以前你都聽過我把聲喇。」Chloe講：「你係咪細細個已經暗戀我，到大個先敢追我？」
「唔會喇，細個果時覺得好白痴…」Johnny一講，Chloe就打佢：「蝦！」
「細個唔識貨，大個就知好嘢。」Johnny再錫Chloe，之後問：「咁妳呢？」
「我？」
「係呀，同表弟拍拖唔mind？」
「係喎，咁你係咪因為我係表姐，溝到我好威呀？」
「好威…」Johnny講：「係溝到靚女有滿足感。」
「真係？」
「講堅嫁，咁妳呢？」
「我呀，初頭無諗過同你一齊嫁。」Chloe講：「同你溝通多咗，覺得你唔係咁差，都ok…」
「然後俾我唱歌打動？」Johnny講完，Chloe厲住佢，錫佢一啖。
「好彩我唱歌叻，如果唔係妳身邊咁多靚仔，我都同唔到妳一齊。」
「唓，我都唔係外貌協會嘅。」
「吓？咩意思先？」 Johnny扮哂嬲，Chloe笑住講：「唔知呢？」
「喂！喂！」Johnny吱Chloe，Chloe係咁縮，兩個扭埋一舊嬉戲。
嬉戲一輪後，Johnny講：「I love you。」
「I love you too。」
示愛後打茄輪。
啜啜啜。
攬住Chloe錫多幾錫，Johnny又唔規矩。佢除咗Chloe條褲，而家佢淨係得件背心、under…
條褲被除，Chloe講：「你想要？」
「係呀。」
「但係我想一齊睇戲。」Chloe講：「我哋第一次飲紅酒睇戲…」
「攬住我睇吖。」Chloe含情默默咁講，Johnny都聽佢話…
錫一啖之後攬住睇戲…
一路飲紅酒，一路睇戲。
睇睇吓大家都瞓着咗。
到天光，Johnny、Chloe仍然响個廳攬住瞓時大門開咗，有人入嚟。
「吓？」
入嚟嘅係Johnny爸爸，佢見到Johnny攬住Chloe瞓咗响度嚇咗一跳！
聽到佢大叫，Johnny媽媽講：「咩事呀？」
「Oh！！」
佢見到都嚇一嚇！
除咗攬住，仲見到Chloe無着褲…
咁佢哋？
「天華，天華！！」媽媽叫Johnny，Johnny醒咗見到媽媽都嚇到慌哂。
「妳…咁早返？」
媽媽無答佢，講：「點解雅兒會响度？」
媽媽一講，Johnny亂哂咁叫Chloe：「Chloe，Chloe…」
「咩事呀？」叫幾叫Chloe醒咗，捽捽眼時見到Johnny爸媽，就講：「舅父舅母…」
「點解妳會响度？」爸爸問Chloe時，媽媽揮手示意佢停口，再用眼神望向Chloe下半身。
Chloe跟佢眼神望，知道自己無着褲，就即刻衝入Johnny間房着褲。
而家個廳得番Johnny一家。
「天華，到底發生咩事？」
「我…」發生得太突然，Johnny個腦仲load緊，媽媽講：「你哋拍拖？」
聽到媽媽講，Johnny點頭示意。
「你同雅兒拍拖？」爸爸講：「你哋表姐弟嚟喎？」
「我知…」Johnny講：「我真係鍾意雅兒。」
「得唔得嫁？」爸爸有疑問，哩個時候Chloe出嚟，媽媽講：「雅兒，我哋入房傾傾。」
「好。」Chloe有啲不安，不過都跟咗媽媽入房。
入到房之後，媽媽講：「妳同天華拍拖？」
「係。」
「妳哋拍咗幾耐？」
「都4年幾。」
「咁耐喇。」
「係呀。」Chloe微笑點頭。
「妳係真心鍾意天華？」
「係，我知道天華都係真心。」
「咁…」媽媽諗一陣，之後講：「妳係好女仔嚟，天華讀到大學搵到好工都因為妳…」
媽媽講完就停咗口，一時間dead air…
「咁我哋出返去睇吓佢老豆咩意思。」
「好…好。」
Chloe跟住媽媽出返去，Johnny見到Chloe行返出嚟就拖住佢。
「爸爸媽媽，我係真心鍾意Chloe。」Johnny講：「我哋都計劃結婚…」
Johnny講計劃結婚，Chloe即刻瞪大眼望住佢…
「你哋結婚，唔係玩玩吓？」
「唔係玩玩吓。」Johnny同Chloe神同步回答。
爸爸問媽媽：「妳點睇呀？」
「我呀，咁Chloe係好女仔，我都鍾意佢嘅。」媽媽講：「你又點睇？」
「我都鍾意。」爸爸講：「我想搞清楚，你哋結唔結得婚？」
「得嫁，可以嫁！」Johnny第一時間答：「以前啲人都係咁喇。」
媽媽講：「大姑婆個仔都係娶表妹，你唔記得喇？」
「係喎。」爸爸講。
「雖然合法，不過始終係親戚。」媽媽講：「如果要生仔嘅，驗咗先。」
「你哋都唔想個bb有缺憾喇，係咪？」
同Johnny生仔會有缺憾？
我會產前驗身，不過唔係要因為同Johnny生仔而驗呀？
雖然媽媽講嘅嘢係啱，亦都無挑剔，但係Chloe聽落唔好受。
「好，我同Chloe會驗身。」Johnny同Chloe講：「妳話係咪？」
「係。」Chloe個心無笑。
「老六知唔知？」
爸爸咁問，Chloe搖搖頭。
「佢份人咁死板，我哋都唔好同佢講。」媽媽講。
「咁好喇。」爸爸講：「天華，你要好好對雅兒呀。」
「收到！」聽到爸爸答應佢哋拍拖，Johnny勁開心攬住Chloe：「我哋可以光明正大喇！」
「喂呀！」爸媽望住，Chloe有啲怕醜：「唔好咁喇。」
「唔得，我要攬住、攬住…」Johnny攬住Chloe响間屋週圍走，爸媽見到佢哋咁開心，都望住佢哋發出笑聲。
（16）畢業後---完
註：哩度係有bug，請勿介意